Ang pila ka eksperiensia sa Britanya makabulig sa imo para indi ka madulaan sing paglaum. Mahangpan mo man kon paano mo malaragwayon nga “ihaboy ang imo tinapay sa mga tubig,” para mabuligan ang mga wala pa magbaton sang kamatuoran.—Man. 11:1.

Importante ang imo pagbatas. Kinahanglan mo magpabilin sa kamatuoran kag mag-unong kay Jehova. (Deut. 10:20) Amo ini ang ginhimo ni Georgina. Sang nagtuon sia sing Biblia sa mga Saksi ni Jehova sang 1970, naakig ang iya bana nga si Kyriacos. Ginpunggan sia sang iya bana sa pagtuon, gindumilian ang mga Saksi nga magsulod sa ila balay, kag ginkuha ang tanan nga publikasyon sang mga Saksi ni Jehova nga iya makita.

Sang si Georgina nagsugod sa pagtambong sa mga miting sa kongregasyon, naakig pa gid si Kyriacos. Isa ka adlaw, nagkadto sia sa Kingdom Hall para makigbais. Sang nahibaluan sang isa ka sister nga maayo si Kyriacos maghambal sing Griego sangsa Ingles, gintawgan niya ang isa ka brother nga Griego sa iban nga kongregasyon para magbulig sa ila. Maayo ang nangin reaksion ni Kyriacos sa mainayuhon nga pagpakig-istorya sa iya sang brother, kag sa sulod sang pila ka bulan, nagtuon pa gani sila sing Biblia. Pero sang ulihi, nag-untat si Kyriacos sa pagtuon.

Sa sulod sang tatlo pa ka tuig, ginpamatukan niya gihapon si Georgina. Nagsiling si Kyriacos nga biyaan niya si Georgina kon magpabawtismo ini. Sa adlaw sang bawtismo ni Georgina, hanuot sia nga nangamuyo kay Jehova nga indi sia pagbiyaan ni Kyriacos. Sang nag-abot ang Saksi nga magsugat sa iya pakadto sa asembleya, si Kyriacos nagsiling sa ila: “Una lang kamo. Masakay lang kami sa amon salakyan.” Nagtambong sia sa sesyon sa aga kag ginsaksihan ang bawtismo sang iya asawa!

Pagkatapos sini, nagtahaw ang pagpamatok ni Kyriacos, kag amat-amat sia nga nagbag-o. Pagligad sang halos 40 ka tuig sa una niya nga pagpakig-istorya sa mga Saksi, nasaksihan ni Georgina ang iya bana nga ginbawtismuhan! Ano ang nakabulig kay Kyriacos? Sia nagsiling: “Nalipay gid ako sa determinasyon ni Georgina.” Si Georgina nagsiling: “Bisan pa sa pagpamatok sang akon bana, indi gid ako mag-untat sa pagsimba sa akon Dios. Pirme ako nagapangamuyo kay Jehova, kag wala gid madulaan sing paglaum.”

Ang isa pa nga makabulig sa imo tiayon amo ang pagpakita sang Cristiano nga personalidad. Si apostol Pedro naglaygay sa Cristiano nga mga asawa: “Magpasakop kamo sa inyo bana, agod ang bisan sin-o nga wala nagatuman sa pulong, madaug sila nga wala sing pulong paagi sa paggawi sang ila asawa.” (1 Ped. 3:1) Gintuman ni Christine ini nga laygay, bisan tinuig pa antes niya nakumbinsi ang iya bana. Sang nangin Saksi sia sang nagligad nga sobra 20 ka tuig, ang iya bana nga si John nagbatyag nga indi niya kinahanglan ang Dios. Indi gusto ni John nga mag-entra sa relihion, pero nakita niya nga importante gid kay Christine ang iya bag-o nga pagtuo. “Nakita ko nga nagapahalipay ini sa iya,” siling ni John. “Nangin mas mabakod sia, kag nakabulig ini sa akon sa madamo nga kabudlayan.”

Wala ginpilit ni Christine ang iya relihion sa iya bana, nga nagsiling: “Nahibaluan ni Christine nga halin sa umpisa mas maayo nga indi niya ako pagpiliton, kag mapinasensiahon sia nga naghulat sa akon nga makatuon suno sa akon ikasarang kag pamaagi.” Kon makabasa si Christine sing mga artikulo sa Ang Lalantawan ukon Magmata! nga sa banta niya manamian si John, pareho sang parte sa siensia kag kinaugali, ginapakita niya ini sa iya, nga nagasiling, “Sa banta ko, manamian ka magbasa sini.”

Sang ulihi, nagretiro si John kag nagpulupananom na lang sa hardin. Bangod mas madamo sia sing tion sa pagpanumdom sang madalom nga mga pamangkot parte sa kabuhi, nagsugod sia sa pagpamalandong, ‘Natabuan lang bala ang aton pagluntad, ukon gintuga kita para sa isa ka katuyuan?’ Isa ka adlaw, ang utod nga kaistorya ni John namangkot sa iya, “Gusto mo mag-study?” “Karon nga nagapati na ako sa Dios,” siling ni John, “ginbaton ko ang iya tanyag.”

Maayo gid nga wala madulaan sing paglaum si Christine! Pagkatapos sang 20 ka tuig nga pangamuyo nga batunon sang iya bana ang kamatuoran, nabawtismuhan si John. Sa karon, makugi sila sa pag-alagad kay Jehova. Si John nagsiling: “Duha ka butang ang nakakumbinsi sa akon—ang pagkamainayuhon kag pagkamainabyanon sang mga Saksi. Kag kon Saksi ni Jehova ang imo asawa, may matutom, masaligan, kag masinakripisyuhon ka nga tiayon.” Huo, gintuman ni Christine ang ginsiling sa 1 Pedro 3:1, kag epektibo gid ini!

Kamusta naman ang mga Bible study nga bangod sa isa ukon sa madamo nga rason nadula ang ila interes? “Sa kaagahon isab-ug ang imo binhi, kag sa kahaponon dili pagpunggi ang imo kamut,” sulat ni Hari Solomon, “kay wala ka makahibalo kon diin ang magauswag, kon ini ukon ina, ukon kon sila nga duha mangin-alangay nga maayo.” (Man. 11:6) Kon kaisa, ang binhi sang kamatuoran maligaran pa sang madamo nga tuig antes manubo. Bisan pa sa sini, mahimo marealisar sa ulihi sang isa ka tawo nga importante nga magpalapit sa Dios. (Sant. 4:8) Huo, ayhan maabot ang adlaw nga masorpresa ka.

Binagbinaga si Alice, nga nagsaylo sa Inglaterra halin sa India. Sang 1974 nagtuon sia sa Biblia. Ang iya lenguahe Hindi, pero gusto niya mag-uswag sa Ingles. Nagpadayon sia sa pagtuon sing pila ka tuig, kag nagtambong sa pila ka miting sa Ingles nga kongregasyon. Nahibaluan niya nga kamatuoran ang iya ginatun-an pero ginkabig niya ini nga daw lingawlingaw lang. Isa pa, daw mas interesado sia nga makakuarta kag magkadto sa mga party. Sang ulihi, nag-untat si Alice sa pagtuon.

Pagligad sang halos 30 ka tuig, si Stella, nga amo sadto ang nagtuon kay Alice, nakabaton sing sulat. Ini nagasiling: “Pat-od ko nga malipay ka gid sa paghibalo nga ang imo Bible study sang 1974 nabawtismuhan na sa distrito nga kombension sining karon lang. Daku gid ang imo papel sa akon kabuhi. Gintanom mo sa akon ang binhi sang kamatuoran, kag bisan pa indi ako handa sadto sa pagdedikar sang akon kabuhi sa Dios, ginhuptan ko ina nga binhi sang kamatuoran sa akon hunahuna kag tagipusuon.”

Ano ang natabo? Si Alice nagpaathag nga nagbatyag sia sing grabe nga depresyon sang napatay ang iya bana sang 1997. Nangamuyo sia sa Dios. Pagligad lang sang dies minutos, duha ka Saksi nga nagahambal sing Punjabi ang nagkadto sa iya puluy-an kag nagbilin sa iya sing tract nga Ano ang Paglaum Sang Napatay nga mga Hinigugma? Nagpati si Alice nga ginsabat ang iya pangamuyo kag nagdesisyon nga makig-upod sa mga Saksi ni Jehova. Pero sa diin niya sila makit-an? Nakakita sia sang daan nga diary nga nagaunod sang mga adres sang Punjabi nga kongregasyon nga ginhatag sa iya ni Stella. Nagkadto si Alice sa Kingdom Hall kag mainit sia nga gin-abiabi sang mga kauturan nga nagahambal sing Punjabi. “Nabatyagan ko gihapon ang ila pagpalangga, kag nakabulig ini sa akon nga maumpawan sa akon depresyon,” siling ni Alice.

Nangin regular ang iya pagtambong sa mga miting, nagpadayon sa pagtuon sa Biblia, kag nagtuon sing maayo sa paghambal kag pagbasa sing Punjabi. Sang 2003, nabawtismuhan sia. Ang iya sulat kay Stella naghinakop, “Madamo gid nga salamat sa pagtanom sadto nga mga binhi sang nagligad nga 29 ka tuig kag pagpakita sing maayo nga halimbawa sa akon.”

“Madamo gid nga salamat sa pagtanom sadto nga mga binhi sang nagligad nga 29 ka tuig kag pagpakita sing maayo nga halimbawa sa akon.”—Alice

Ano ang imo matun-an sa sini nga mga eksperiensia? Kon ang isa ka tawo gutom sa espirituwal, interesado, kag mapainubuson, patubuon ni Jehova ang kamatuoran sa iya tagipusuon, bisan pa mahimo madugay ini sangsa imo ginapaabot. Dumduma ang ginsiling ni Jesus sa iya ilustrasyon: “Ang binhi nagatubo kag nagataas, nga wala . . . mahibalui [sang manugsab-og] kon paano. Ang duta nagapatubas sing amat-amat sa iya kaugalingon, una ang dahon, madason ang uhay, sa katapusan ang matinggas nga uyas sa uhay.” (Mar. 4:27, 28) Ini nga pagtubo amat-amat kag nagakatabo “sa iya kaugalingon.” Ginapakita sini nga ang manugbantala sang Ginharian wala makahibalo kon paano ini nagatubo. Gani magpadayon sa pagsab-og sing bugana, kay sa ulihi mahimo ka mag-ani sing bugana.

Kag indi pagkalimti ang importansia sang pangamuyo. Sanday Georgina kag Christine padayon nga nangamuyo kay Jehova. Kon “magpadayon [ka] sa pagpangamuyo” kag indi madulaan sing paglaum, “sa tapus ang madamu nga adlaw,” mahimo mo masapwan liwat ang “tinapay” nga ginhaboy mo sa mga tubig.—Roma 12:12; Man. 11:1.