1, 2. Ngaa ang pagpangdaya lapnag karon, kag ano ang pila ka sahi sang pagpangdaya? (Tan-awa ang piktyur sa umpisa sang artikulo.)

ANG pagbutig, pagpanglimbong, kag pagpangdaya kinaandan na sa sini nga sistema sang mga butang. Indi na kita matingala sa sini. Maathag nga ginasiling sang Biblia nga si Satanas nga Yawa isa ka eksperto nga manuglimbong, kag sia ang manuggahom sa sini nga sistema. (1 Tim. 2:14; 1 Juan 5:19) Samtang nagahilapit na kita sa katapusan sining malaut nga sistema, nagadugang ang kaakig ni Satanas bangod “malip-ot na lamang ang iya tion.” (Bug. 12:12) Gani mapaabot naton nga ang mga naimpluwensiahan sang Yawa mangin mas malimbungon pa gid, ilabi na sa mga nagapasanyog sang matuod nga pagsimba.

² Ang nagapatalang nga mga impormasyon kag kabutigan parte sa mga alagad ni Jehova kag sa ila mga pagpati ginapakita kon kaisa sa media. Ang mga ulong dinalan sa mga pamantalaan, mga dokumentaryo sa telebisyon, kag mga Web page sa Internet ginagamit sa pagpalapnag sing mga kabutigan. Bilang resulta, ang pila ka tawo naligban, kag nagapati dayon sa sini nga mga kabutigan.

3. Ano ang makabulig sa aton para mabatuan ang pagpangdaya?

³ Nagapasalamat gid kita kay ara ang Pulong sang Dios, nga “mapuslanon . . . sa pagtadlong sa mga butang,” para mabatuan ining makapaluya nga mga taktika sang aton kaaway. (2 Tim. 3:16) Matun-an naton sa mga sinulatan ni apostol Pablo nga ang pila ka Cristiano sa Tesalonica sang unang siglo napatalang kay nagpati sila sa kabutigan. Ginlaygayan niya sila nga “indi madali malingkang sa [ila] pangatarungan.” (2 Tes. 2:1, 2) Ano nga mga leksion ang aton matun-an sa mahigugmaon nga laygay ni Pablo, kag paano naton ini maaplikar karon?

4. Paano ang mga Cristiano sa Tesalonica ginpaandaman parte sa pag-abot sang “adlaw ni Jehova,” kag paano kita ginapaandaman?

⁴ Sa iya nahauna nga sulat sa kongregasyon sang Tesalonica, ginpatalupangod ni Pablo ang pag-abot sang “adlaw  ni Jehova.” Indi niya gusto nga ang iya mga kauturan madulman kag indi makapangaman. Sa baylo, ginpalig-on niya sila subong “mga anak sang kapawa” nga ‘magpabilin nga nagamata kag nagahupot sang ila kaligdong.’ (Basaha ang 1 Tesalonica 5:1-6.) Sa karon, ginahulat naton ang kalaglagan sang Babilonia nga Daku, ang bug-os kalibutan nga emperyo sang butig nga relihion. Mangin tanda ini sang pagsugod sang dakung adlaw ni Jehova. Nagapasalamat gid kita kay nahangpan naton sing labi pa kon paano tumanon ni Jehova ang iya katuyuan. Paagi man sa kongregasyon, regular naton nga matigayon ang suno sa tion nga mga pahanumdom para mahuptan naton ang aton kaligdong. Kon pamatian naton ining sulitsulit nga mga paandam, magabakod ang aton determinasyon nga ihatag sa Dios ang ‘sagrado nga pag-alagad lakip ang aton ikasarang sa pagpangatarungan.’—Roma 12:1.

5, 6. (a) Ano ang ginsiling ni Pablo sa iya ikaduha nga sulat sa mga taga-Tesalonica? (b) Ano ang himuon sang Dios sa indi madugay paagi kay Jesus, kag ano ang dapat naton ipamangkot sa aton kaugalingon?

⁵ Wala madugay sa tapos ginpadala ni Pablo ang iya una nga sulat sa mga Cristiano sa Tesalonica, nagpadala sia sa ila sing ikaduha nga sulat. Sa amo nga sulat, ginpatalupangod niya ang nagahilapit nga kapipit-an sa tion nga ipadapat na ni Ginuong Jesus ang paghukom sang Dios sa “mga wala nagakilala sa Dios kag [sa] mga wala nagatuman sa maayong balita.” (2 Tes. 1:6-8) Sa kapitulo 2 sini nga sulat, mabasa nga ang pila sa kongregasyon ‘nagpadala sa ila balatyagon’ parte sa adlaw ni Jehova, asta nga nagpati sila nga ara na gid ini. (Basaha ang 2 Tesalonica 2:1, 2.) Limitado lamang sadto ang nahangpan sang mga Cristiano parte sa katumanan sang katuyuan ni Jehova. Bisan si Pablo nagbaton sa sini sang nagsiling sia: “Ang aton ihibalo indi bug-os kag ang aton pagpanagna indi bug-os; apang kon ang bug-os mag-abot, ang indi bug-os madula.” (1 Cor. 13:9, 10) Pero ang mga paandam sang Dios nga ginsulat nanday Pablo, apostol Pedro, kag sang iban pa nga matutom nga hinaplas nga mga kauturan sadto makabulig na sa ila para mahuptan ang ila pagtuo.

⁶ Para matadlong ang mga butang, gingiyahan sang Dios si Pablo sa pagpaathag nga ang daku nga apostasya kag “ang tawo sang pagkamalinapason” magaabot antes sang adlaw ni Jehova. * Pagkatapos sini, sa iya ginpat-od nga tion, “pagadulaon” ni Ginuong Jesus ang  tanan nga nagpadaya. Ginpakita sang apostol ang rason sang paghukom sa ila. Ina “bangod wala nila ginbaton ang gugma sa kamatuoran agod maluwas sila.” (2 Tes. 2:3, 8-10) Maayo gid nga pamangkuton naton ang aton kaugalingon: ‘Daw ano kadaku ang akon gugma sa kamatuoran? Nahibaluan ko bala ang bag-o nga mga pagpaathag nga mabasa sa sini nga magasin kag sa iban pa nga base sa Biblia nga mga publikasyon nga ginaaman para sa kongregasyon sang katawhan sang Dios sa bilog nga kalibutan?’

7, 8. (a) Ano ang mga katalagman nga kinahanglan pakigbatuan sang mga Cristiano sadto? (b) Ano nga butang ang makatalagam gid sa matuod nga mga Cristiano subong?

⁷ Matuod, indi lamang mga apostata kag mga panudlo nila ang makatalagam sa mga Cristiano. Ginsulatan ni Pablo si Timoteo nga “ang gugma sa kuarta amo ang gamot sang tanan nga sahi sang makahalalit nga mga butang.” Ginpadaku ni Pablo nga “paagi sa paghingamo sini nga gugma ang iban nagtalang gikan sa pagtuo kag nagbuno sang ila kaugalingon sang madamo nga kasakit.” (1 Tim. 6:10) Subong man, “ang mga buhat sang unod” isa gihapon ka katalagman.—Gal. 5:19-21.

⁸ Pero mahangpan mo kon ngaa nagpaandam gid si Pablo sa mga taga-Tesalonica parte sa serioso nga katalagman nga ginahimo sini nga mga tawo nga gintawag niya nga “butig nga mga apostoles.” Ang pila sa ila nagahambal sing “tiko nga mga butang agod ipahilayo ang mga disipulo kag pasundon sa ila.” (2 Cor. 11:4, 13; Binu. 20:30) Ginhatagan ni Jesus sing komendasyon ang kongregasyon sang Efeso bangod “indi [sila] makaagwanta sa malain nga mga tawo.” ‘Natilawan’ kag napamatud-an sang mga taga-Efeso nga yadto nga mga indibiduwal butig nga mga apostoles. (Bug. 2:2) Naglaygay man si Pablo sa iya ikaduha nga sulat sa mga taga-Tesalonica: “Karon ginasugo namon kamo, mga kauturan, sa ngalan ni Ginuong Jesucristo, nga magpalayo kamo sa tagsa ka utod nga nagalakat sing di-matinumanon.” Dayon, ginsambit niya sing espesipiko ang mga Cristiano nga “indi luyag mag-obra.” (2 Tes. 3:6, 10) Kon yadto nga mga tawo makabig nga nagalakat sing di-matinumanon, ano pa gid ayhan ang mga nagasugod sa paggawi subong apostata! Huo, ang suod nga pagpakig-upod sa sini nga mga indibiduwal sadto makatalagam gid kag dapat sila likawan—kag matuod man ini sa karon.—Hulu. 13:20.

9. Ngaa dapat kita maghalong kon ang isa nagapamilit sang iya personal nga ideya ukon nagapakalain sa iban?

⁹ Nagahilapit na gid kita sa pagsugod sang dakung kapipit-an kag sa katapusan sining malaut nga sistema, gani ang mga paandam sang Dios sang unang siglo importante gid sa karon. Pat-od nga indi naton gusto ‘wasihon ang katuyuan’ sang wala tupong nga kaayo ni Jehova kag ang promisa nga kabuhi nga wala sing katapusan, sa langit man ukon sa duta. (2 Cor. 6:1) Kon may nagatambong sa aton mga miting nga nagapamilit sang iya personal nga mga ideya ukon espikulasyon sa Kasulatan ukon nagapakalain sa iban, dapat gid kita maghalong.—2 Tes. 3:13-15.

10. Sa ano nga mga tradisyon dapat magpabilin ang mga Cristiano sa Tesalonica?

¹⁰ Ginpalig-on ni Pablo ang iya mga kauturan sa Tesalonica nga ‘magtindog sing malig-on’ kag magpabilin sa ila natun-an. (Basaha ang 2 Tesalonica 2:15.) Ano ining “mga tradisyon” nga gintudlo sa ila? Indi ini mga tradisyon sang butig nga relihion, nga ginapagua nga pareho ini ka importante sa mga panudlo sang Kasulatan. Sa baylo, ginapatuhuyan ni Pablo ang mga panudlo nga nabaton niya kag sang iban kay Jesus subong man ang mga butang nga halin sa Dios nga ginpaalinton sang mga apostoles, nga ang kalabanan sa sini nangin bahin sang Kasulatan. Ginhatagan ni Pablo sing komendasyon ang kongregasyon sang Corinto bangod, subong sang ginsulat niya, “sa tanan nga butang ginadumdom ninyo ako kag ginasunod gid ninyo ang  mga tradisyon subong sang ginliton ko ini sa inyo.” (1 Cor. 11:2) Ini nga mga panudlo may masaligan nga ginhalinan, gani dapat gid ini patihan.

11. Sa ano nga mga paagi mahimo maapektuhan ang iban sang pagpangdaya?

¹¹ Sang nagsulat si Pablo sa mga Hebreo, ginpatalupangod niya ang duha ka rason nga mahimo madula sang isa ka Cristiano ang iya pagtuo kag indi na magtindog sing malig-on. (Basaha ang Hebreo 2:1; 3:12.) Ginsambit niya ang “maanod palayo” kag ang “pagpalayo.” Ang baruto nga ginaanod palayo gikan sa pangpang sang suba mahimo nga daw indi matalupangdan sa umpisa. Pero amat-amat ini nga nagapalayo. Sa pihak nga bahin, mahimo man hungod nga itulod sang tawo ang iya baruto palayo sa pangpang. Ginalaragway gid sining duha ka halimbawa ang kahimtangan sang pila nga nabiktima sang pagpangdaya, kay gintugutan nila nga magluya ang ila pagsalig sa kamatuoran.

12. Ano nga mga hilikuton karon ang makahalit sa aton espirituwalidad?

¹² Mahimo nga amo sini ang sitwasyon sang pila sa Tesalonica. Kamusta naman subong? Madamo nga hilikuton ang nagaubos sang aton tion. Hunahunaa kon daw ano kadamo nga oras ang ginahinguyang sa mga kalingawan, sa paggamit sang mga social network, pagbasa kag pagsabat sang mga e-mail, ukon paghibalo sang pinakaulihi nga mga balita sa sports. Ang bisan diin sa sini nga mga hilikuton mahimo magtublag sa isa ka Cristiano kag magpatahaw sang iya kakugi. Bilang resulta, mahimo maapektuhan ang iya tinagipusuon nga pangamuyo, pagtuon sa Pulong sang Dios, pagtambong sa mga miting, kag pagbantala sing maayong balita. Ano ang aton himuon para indi kita madali malingkang sa aton pangatarungan?

13. Subong sang gintagna, ano ang panimuot sang madamo, kag ano ang makabulig para indi magluya ang aton pagtuo?

¹³ Ang isa ka butang nga kinahanglan gid naton himuon amo ang pagdumdom pirme nga ara na kita sa “katapusan nga mga adlaw” kag kon ano ang posible nga epekto sang pagpakig-upod sa mga nagabalewala sa sini. Si apostol Pedro nagsulat parte sa sini nga tion: “Ang mga mayubiton magaabot nga may pagyubit, nga ginapasundan ang ila mga kailigbon kag nagasiling: ‘Diin na ining ginsaad nga presensia niya? Sugod sang nagtulog sa kamatayon ang aton mga katigulangan, ang tanan nga butang nagapadayon nga amo gid gihapon kutob sa ginsuguran sang pagpanuga.’” (2 Ped. 3:3, 4) Ang aton pagbasa sang Pulong sang Dios kada adlaw kag ang regular nga pagtuon sa sini magabulig sa aton nga magkonsentrar sa kon diin na kita sa lakat sang panahon—nga nagapahanumdom sa aton nga yara na kita sa “katapusan nga mga adlaw.” Ang gintagna nga apostasya madugay na nga nagluntad kag nagapadayon ini asta subong. “Ang tawo sang pagkamalinapason” ara gihapon kag padayon nga nagapamatok sa mga alagad sang Dios. Gani, kinahanglan kita magpabilin nga nagabantay sa nagahilapit nga adlaw ni Jehova.—Sof. 1:7.

14. Ngaa isa ka pangamlig ang pagpabilin nga masako sa pag-alagad sa Dios?

¹⁴ Ginapamatud-an sang mga eksperiensia nga ang panguna nga paagi para magpabilin nga alisto kag malikawan nga malingkang sa aton pangatarungan amo ang regular nga pagbantala sing maayong balita sang Ginharian. Gani, sang ginsugo ni Cristo Jesus, nga Ulo sang kongregasyon, ang iya mga sumulunod nga maghimo sing mga disipulo sa mga tawo sang tanan nga pungsod, kag magpanudlo sa ila nga tumanon ang mga butang nga iya gintudlo, nagahatag sia sing laygay nga magaamlig sa iya mga sumulunod. (Mat. 28:19, 20) Para matuman ang iya sugo, kinahanglan mangin makugi kita sa pagbantala nga hilikuton. Mahanduraw mo bala nga ang imo mga kauturan sa Tesalonica mahimo nga nagbantala kag nagtudlo sing pakulahaw, nga nagabatyag nga ang ila ginahimo isa lamang ka rutina? Dumduma ang ginsiling ni Pablo sa ila:  “Indi ninyo pagpalunga ang kalayo sang espiritu. Indi ninyo pagtamaya ang mga pagpanagna.” (1 Tes. 5:19, 20) Huo, ang mga tagna nga aton ginatun-an kag ginatudlo sa iban makalilipay gid!

15. Anong mapuslanon nga mga butang ang mahimo naton binagbinagon sa pangpamilya nga pagsimba?

¹⁵ Siempre, luyag gid naton buligan ang aton pamilya nga mag-uswag sa ila ikasarang sa pag-alagad sa latagon. Napamatud-an sang madamo nga kauturan nga ang isa ka paagi para mahimo ini amo ang paglakip sang pagpraktis sa ministeryo sa ila pangpamilya nga pagsimba. Ayhan makabulig gid ang pagbinagbinag kon paano balikan sang mga miembro sang pamilya ang mga interesado. Ano ang mahimo nila ihambal sa ila pagbalik? Ano nga mga topiko ang dapat nila gamiton para magpadayon ang interes sang ila mga ginaduaw liwat? San-o mas maayo himuon ang pagduaw liwat? Madamo man ang naghatag sing pila ka tion sa ila pangpamilya nga pagsimba sa paghanda sa mga miting agod mangin pamilyar sila kon ano ang binagbinagon. May mahimo ka pa bala para makahanda sa pagpakigbahin sa mga miting? Ang imo pagpakigbahin magapabakod sang imo pagtuo kag magabulig sa imo nga indi malingkang sa imo pangatarungan. (Sal. 35:18) Huo, ang pangpamilya nga pagsimba isa ka proteksion batok sa mga espikulasyon kag mga pagpangduhaduha.

16. Ano ang makabulig sa hinaplas nga mga Cristiano para indi sila malingkang sa ila pangatarungan?

¹⁶ Samtang ginapamalandungan naton kon paano ginpakamaayo ni Jehova ang iya katawhan sa sulod sang mga tinuig paagi sa pagpauswag sang ila paghangop sa mga tagna sang Biblia, maapresyar gid naton ang makalilipay nga padya sa palaabuton. Ang mga hinaplas may paglaum nga makaupod si Cristo sa langit. Ini nga paglaum makabulig gid sa ila para indi sila malingkang sa ila pangatarungan! Mapatuhoy gid naton sa ila ang ginsiling ni Pablo sa mga taga-Tesalonica: “Obligado kami nga magpasalamat pirme sa Dios tungod sa inyo, mga kauturan nga hinigugma ni Jehova, bangod kutob sa ginsuguran ginpili kamo sang Dios . . . paagi sa pagpakabalaan sa inyo sang espiritu kag paagi sa inyo pagtuo sa kamatuoran.”—2 Tes. 2:13.

17. Paano ka napalig-on sang ginasiling sa 2 Tesalonica 3:1-5?

¹⁷ Ang mga nagalaum sang kabuhi nga wala sing katapusan sa duta dapat man magtinguha nga indi sila madali malingkang sa ila pangatarungan. Kon amo sini ang imo paglaum, tumana pirme ang mahigugmaon nga pagpalig-on nga ginsulat ni Pablo para sa pareho niya nga mga hinaplas sa Tesalonica. (Basaha ang 2 Tesalonica 3:1-5.) Dapat nga apresyahon gid sang kada isa sa aton ining mahigugmaon nga pahanumdom. Huo, ang mga sulat para sa mga taga-Tesalonica nagahatag sing importante nga mga pahanumdom parte sa mga espikulasyon ukon indi masaligan nga mga ideya. Samtang nagahilapit na gid ang katapusan, nagapasalamat gid ang mga Cristiano sa sini nga mga paandam.