1, 2. Ano ang ginhimo ni Jesus sa gab-i sang Nisan 14, 33 C.E.? (Tan-awa ang piktyur sa umpisa sini nga artikulo.)

GAB-I na, pero medyo masanag sa Jerusalem bangod ugsad ang bulan. Gab-i ini sang Nisan 14, 33 C.E. Si Jesus kag ang iya mga apostoles nagasaulog sang Paskua, bilang pagdumdom sang kaluwasan sang Israel gikan sa pagkaulipon sa mga Egiptohanon, 15 ka siglo na ang nagligad. Upod sa iya 11 ka matutom nga apostoles, ginsugdan karon ni Jesus ang isa ka pinasahi nga panihapon—nga mangin handumanan sang iya kamatayon antes matapos ini nga petsa. *—Mat. 26:1, 2.

² Si Jesus nangamuyo kag nagpasa sing tinapay nga wala sing lebadura sa mga apostoles, nga nagasiling: “Kuha kamo, kaon kamo.” Nagkuha sia sing kopa nga may alak, nagpasalamat liwat, kag nagsiling: “Inom kamo sa sini, kamo tanan.” (Mat. 26:26, 27) Si Jesus indi na magpasa sang iban nga pagkaon sa ila, pero madamo pa sia sing isugid sa iya matutom nga mga sumulunod sa sining importante gid nga gab-i.

3. Ano nga mga pamangkot ang sabton sa sini nga artikulo?

³ Gani didto ginsugdan ni Jesus ang Memoryal sang iya kamatayon, nga gintawag man nga “panihapon sang Ginuo.” (1 Cor. 11:20) Parte sa sini, ang pila mahimo mamangkot: Ngaa dapat dumdumon ang kamatayon ni Jesus? Ano ang kahulugan sang tinapay kag alak? Paano kita makahanda para sa Memoryal? Sin-o ang dapat magkaon kag mag-inom? Kag paano ginatamod sang mga Cristiano ang ila paglaum nga ginasiling sang Kasulatan?

4. Ano ang nangin posible bangod sang kamatayon ni Jesus?

⁴ Bangod mga kaanakan kita ni Adan, napanubli naton ang sala kag kamatayon. (Roma 5:12) Indi magawad sang indi himpit nga tawo ang iya kabuhi ukon ang kabuhi sang iban. (Sal. 49:6-9) Pero ginhatag ni Jesus ang iya himpit nga kabuhi para sa aton kag ginpresentar sa Dios ang balor sini nga gawad. Sa paghimo sini, ginpaposible ni Jesus nga maluwas kita sa sala kag kamatayon kag makabaton sing regalo nga kabuhi nga wala sing katapusan.—Roma 6:23; 1 Cor. 15:21, 22.

5. (a) Paano naton mahibaluan nga ginahigugma sang Dios kag sang Cristo ang mga tawo? (b) Ngaa dapat naton tambungan ang Memoryal sang kamatayon ni Jesus?

⁵ Ining gin-aman nga gawad nagapamatuod nga ginahigugma sang Dios ang mga tawo sa kalibutan. (Juan 3:16) Ang halad ni Jesus nagapamatuod man nga ginahigugma niya kita. Kay man, sang sia nangin “pangolo nga manugpangabudlay” sang Dios antes mangin tawo, si Jesus ‘nalipay sa mga anak sang mga tawo’! (Hulu. 8:30, 31) Bilang pagpasalamat sa Dios kag sa iya Anak, dapat kita mapahulag nga magtambong sa Memoryal sang kamatayon ni Jesus para matuman naton ini nga sugo: “Padayon ninyo nga himuon ini bilang pagdumdom sa akon.”—1 Cor. 11:23-25.

6. Paano naton dapat tamdon ang tinapay kag alak sa Memoryal?

⁶ Sang ginsugdan ni Jesus ang Memoryal, wala sia naghimo sing milagro agod mangin literal niya nga unod kag dugo ang tinapay kag alak. Sa baylo, nagsiling sia parte sa tinapay: “Ini nagakahulugan sang akon lawas.” Parte sa alak, sia nagsiling: “Ini nagakahulugan sang akon ‘dugo sang katipan,’ nga ibubo para sa madamo.” (Mar. 14:22-24) Gani, maathag nga ang tinapay kag alak dapat tamdon subong mga simbulo, ukon mga emblema.

7. Ano ang ginarepresentar sang tinapay nga ginagamit sa Memoryal?

⁷ Sa sinang importante gid nga okasyon sang 33 C.E., si Jesus naggamit sing tinapay nga wala sing lebadura nga nabilin sa panihapon sang Paskua. (Ex. 12:8) Sa Kasulatan, ang lebadura nagapatuhoy kon kaisa sa kaduluntan ukon sa sala. (Mat. 16:6, 11, 12; Luc. 12:1) Gani, ang paggamit ni Jesus sing tinapay nga wala sing lebadura importante gid bangod nagakaigo ini nga nagarepresentar sa iya lawas nga wala sing sala. (Heb. 7:26) Gani, amo ini ang mga sahi sang tinapay nga ginagamit sa Memoryal.

8. Ano ang ginarepresentar sang kopa sang alak sa Memoryal?

⁸ Ang alak nga gingamit ni Jesus sang Nisan 14, 33 C.E., nagarepresentar sa iya dugo, pareho sang mga kopa sang alak sa Memoryal subong. Sa Golgota, nga isa ka lugar sa gua sang Jerusalem, gin-ula ang iya dugo para “sa kapatawaran sang mga sala.” (Mat. 26:28; 27:33) Bangod ang tinapay kag alak sa Memoryal nagasimbulo sa hamili nga halad ni Jesus nga gin-aman para sa matinumanon nga mga tawo kag ginaapresyar naton ining mahigugmaon nga aman, nagakaigo lamang nga handaan naton tanan ang tuigan nga pagsaulog sang Panihapon sang Ginuo.

9. (a) Ngaa importante nga basahon naton ang naiskedyul nga pagbasa sa Biblia sa Memoryal? (b) Ano ang imo nabatyagan parte sa gawad?

⁹ Kon basahon naton ang naiskedyul nga pagbasa sa Biblia sa Memoryal nga makita sa Pag-usisa sa Kasulatan Adlaw-adlaw, mapamalandungan naton ang ginhimo ni Jesus antes mismo sang iya kamatayon. Makabulig ini para mahanda naton ang aton tagipusuon sa Panihapon sang Ginuo. * “Ginapaabot gid namon ang Memoryal,” siling sang isa ka utod. “Nangin pinasahi pa gid ini kada tuig. Nadumduman ko sang ara ako sa punerarya . . . nga nagatan-aw sa akon pinalangga nga amay kag bangod sini naapresyar ko pa gid ang gawad. . . . Nahibaluan ko ang tanan nga teksto kag kon paano ini ipaathag! Pero sang nabatyagan ko ang masubo nga realidad sang kamatayon nag-awas ang kalipay sa akon tagipusuon bangod sang mahimo sa aton sinang hamili nga gawad.” Huo, kon nagahanda para sa Memoryal, makabenepisyo gid kita sa pagpamalandong kon paano ang gawad ni Jesus nagahilway sa aton sa halit sang sala kag kamatayon.

10. Paano makaapektar sa aton ministeryo ang paghanda para sa Memoryal?

¹⁰ Ang paghanda para sa Memoryal mahimo maglakip sa pagdugang sang aton pagpakigbahin sa ministeryo sa pila ka paagi, ayhan subong auxiliary payunir sa panahon sang Memoryal. Samtang ginaimbitar naton ang mga ginatun-an sa Biblia kag ang iban pa sa Panihapon sang Ginuo, mangin malipayon kita sa pagsugid parte sa Dios, sa iya Anak, kag sa mga pagpakamaayo nga ginatigana para sa mga nagapahamuot kay Jehova kag nagadayaw sa iya.—Sal. 148:12, 13.

11. Paano nangin indi takus ang pila ka taga-Corinto sa pagkaon kag pag-inom sang mga emblema sa Memoryal?

¹¹ Samtang nagahanda ka para sa Panihapon sang Ginuo, binagbinaga ang ginsulat ni apostol Pablo sa mga Cristiano sa kongregasyon sang Corinto. (Basaha ang 1 Corinto 11:27-34.) Ginpadaku ni Pablo nga ang bisan sin-o nga indi takus nga magakaon sang tinapay kag magainom sa kopa “makasala may kaangtanan sa lawas kag sa dugo sang Ginuo,” si Jesucristo. Gani ang isa ka hinaplas dapat anay ‘mag-usisa sang iya kaugalingon kon bala takus sia’ kag dayon makakaon sia kag makainom sang mga emblema. Kay kon indi, sia “nagakaon kag nagainom sang paghukom batok sa iya kaugalingon.” Bangod sang indi nagakaigo nga paggawi, madamo sang mga taga-Corinto ang “maluya kag masakiton, kag madamo ang [nagtulog sa espirituwal nga] kamatayon.” Mahimo nga ang iban nagkaon kag nag-inom sing madamo antes ukon sa tion sang Memoryal, amo nga indi na sila alisto sa mental ukon espirituwal. Bangod sini, pat-od nga wala gid nahamuot sa ila ang Dios sang nagkaon sila kag nag-inom sang mga emblema.

12. (a) Diin ginpaanggid ni Pablo ang Memoryal, kag ano ang iya paandam sa mga nagakaon kag nagainom? (b) Ano ang dapat himuon sang isa nga nagakaon kag nagainom nga nakahimo sing serioso nga sala?

¹² Ginpaanggid ni Pablo ang Memoryal sa pagkaon upod sa iban, kag ginpaandaman niya ang mga nagakaon kag nagainom: “Indi kamo makainom sa kopa ni Jehova kag sa kopa sang mga demonyo; indi kamo makaambit sa ‘lamesa ni Jehova’ kag sa lamesa sang mga demonyo.” (1 Cor. 10:16-21) Kon ang isa nga nagakaon kag nagainom sang mga emblema sa Panihapon sang Ginuo nakahimo sing serioso nga sala, dapat sia magpabulig sa espirituwal. (Basaha ang Santiago 5:14-16.) Kon ina nga hinaplas nagpakita sang “mga bunga nga takus sa paghinulsol,” wala niya ginapasipalahan ang halad ni Jesus paagi sa pagkaon kag pag-inom sang mga emblema sa Memoryal.—Luc. 3:8.

13. Ngaa makabenepisyo kita kon ipangamuyo naton ang paglaum nga ginhatag sang Dios sa aton?

¹³ Samtang personal kita nga nagahanda para sa Memoryal, makabenepisyo gid kita kon ipangamuyo kag pamalandungan naton ang paglaum nga ginhatag sang Dios sa aton. Pat-od nga indi gusto sang dedikado nga alagad ni Jehova kag matutom nga sumulunod sang iya Anak nga indi pagtahuron ang halad ni Jesus paagi sa pagkaon kag pag-inom sang mga emblema sa Memoryal bisan pa wala sia sing maathag nga pamatuod nga hinaplas sia nga Cristiano. Kon amo, paano mapat-od sang isa kon bala magakaon sia kag magainom sang mga emblema?

14. Ano ang kaangtanan sang bag-o nga katipan sa pagkaon kag pag-inom sang mga emblema sa Memoryal?

¹⁴ Napat-od gid sang mga takus sa pagkaon kag pag-inom sang mga emblema sa Memoryal nga bahin sila sang bag-o nga katipan. Parte sa alak, si Jesus nagsiling: “Ini nga kopa nagakahulugan sang bag-o nga katipan pasad sa akon dugo.” (1 Cor. 11:25) Paagi kay manalagna Jeremias, gintagna sang Dios nga magahimo Sia sing bag-o nga katipan nga tuhay sa Kasuguan nga katipan nga ginhimo para sa mga Israelinhon. (Basaha ang Jeremias 31:31-34.) Ginhimo sang Dios ang bag-o nga katipan sa espirituwal nga mga Israelinhon. (Gal. 6:15, 16) Ini nga katipan ginpalig-on paagi sa halad sang Cristo kag nagsugod sa pagpanghikot paagi sa iya ginpatulo nga dugo. (Luc. 22:20) Si Jesus amo ang Manugpatunga sang bag-o nga katipan, kag ang mainunungon nga mga hinaplas nga bahin sini makabaton sang langitnon nga palanublion.—Heb. 8:6; 9:15.

15. Sin-o ang bahin sang katipan para sa Ginharian, kag ano nga pribilehiyo ang ila mabaton kon magpabilin sila nga matutom?

¹⁵ Nahibaluan sang mga indibiduwal nga may kinamatarong sa pagkaon kag pag-inom sang mga emblema sa Memoryal nga bahin na sila sang katipan para sa Ginharian. (Basaha ang Lucas 12:32.) Ang nangin hinaplas nga mga sumulunod ni Jesus nga nangin mainunungon sa iya kag nag-ambit sang iya mga pag-antos, magagahom sa langit kaupod niya. (Fil. 3:10) Bangod bahin sila sa katipan para sa Ginharian, ang matutom nga mga hinaplas magagahom upod sa Cristo subong mga hari sa langit sing wala katapusan. (Bug. 22:5) Sila ang may kinamatarong sa pagkaon kag pag-inom sang mga emblema sa Panihapon sang Ginuo.

16. Ipaathag sing malip-ot ang kahulugan sang Roma 8:15-17.

¹⁶ Ang mga may pamatuod lamang sang espiritu nga mga anak sila sang Dios ang dapat magkaon kag mag-inom sang mga emblema sa Memoryal. (Basaha ang Roma 8:15-17.) Talupangda nga si Pablo naggamit sing Aramaiko nga tinaga nga “Abba,” nga nagakahulugan sing “O Amay!” Ini nga tinaga mahimo gamiton sang isa ka bata kon ginatawag niya ang iya amay, kay ini nga termino kombinasyon sang mapinalanggaon nga termino nga “papa” kag sang matinahuron nga tinaga nga “amay.” Ang mga nakabaton sang ‘espiritu sang pag-adoptar subong mga anak’ amo ang ginpanganak sa espiritu nga mga anak sang Dios. Ang espiritu sang Dios nagasaksi sa ila espiritu, amo nga marealisar nila nga hinaplas sila nga mga anak ni Jehova. Indi lamang buot silingon sini nga nadula ang ila interes nga magkabuhi sa duta. Napat-od nila nga mangin manunubli sila kaupod ni Jesus sa Ginharian sa langit kon mangin matutom sila tubtob sa kamatayon. Sa karon, diutay na lamang ang nagkalabilin sang 144,000 nga matutom nga mga sumulunod sang Cristo, nga “ginhaplas . . . sang isa nga balaan,” si Jehova. (1 Juan 2:20; Bug. 14:1) Paagi sa iya espiritu, nagasinggit sila sing, “Abba, Amay!” Dalayawon gid ang ila suod nga kaangtanan sa Dios!

17. Ano ang paglaum sang mga hinaplas, kag paano nila ini ginatamod?

¹⁷ Kon hinaplas ka nga Cristiano, ang paglaum sa langit importante gid nga bahin sang imo mga pangamuyo. Kon ginasambit sang Biblia ang ‘pangako nga pagpakasal’ sa langitnon nga Nobyo, si Jesucristo, ginaaplikar mo ini sa imo kaugalingon, kag ginapaabot mo nga mangin bahin sang “nobya” sang Cristo. (2 Cor. 11:2; Juan 3:27-29; Bug. 21:2, 9-14) Kon ginapabutyag sang Dios paagi sa iya Pulong ang iya gugma sa iya espirituwal nga mga anak, nagasiling ka, “Ako ang ginapatuhuyan sini.” Kag kon ang Pulong ni Jehova nagahatag sing mga instruksion sa iya hinaplas nga mga anak, ang balaan nga espiritu nagapahulag sa imo nga magtuman kag magsiling sa imo tagipusuon, “Naaplikar ini sa akon.” Gani, ang espiritu sang Dios kag ang imo espiritu nagatingob sa pagsaksi nga sa langit ang imo paglaum.

18. Ano ang paglaum sang “iban nga mga karnero,” kag ano ang imo nabatyagan sa sini?

¹⁸ Kon bahin ka naman sang “dakung kadam-an” sang “iban nga mga karnero,” ang Dios nagahatag sa imo sing paglaum sa duta. (Bug. 7:9; Juan 10:16) Gusto mo magkabuhi sing wala katapusan sa Paraiso, kag nalipay ka sa pagpamalandong sa ginasiling sang Biblia parte sa kabuhi sa duta sa palaabuton. Ginapaabot mo nga maeksperiensiahan ang bugana nga paghidait kaupod sang imo pamilya kag sang iban pa nga mga matarong. Ginakalangkagan mo ang tion nga ang kakulang sa pagkaon, kaimulon, pag-antos, balatian, kag kamatayon wala na nagahalit sa mga tawo. (Sal. 37:10, 11, 29; 67:6; 72:7, 16; Isa. 33:24) Ginahandum mo nga abiabihon ang mga mabanhaw nga may paglaum nga mabuhi sing wala katapusan sa duta. (Juan 5:28, 29) Daku gid ang imo pagpasalamat kay ginpakamaayo ka ni Jehova sang paglaum sa duta! Bisan pa wala ka nagakaon kag nagainom sang mga emblema, nagatambong ka sa Memoryal subong pagpakita sang imo apresasyon sa halad-gawad ni Jesucristo.

19, 20. (a) Paano mo matigayon ang paglaum nga ginahatag sang Dios? (b) Ngaa dapat ka magtambong sa Panihapon sang Ginuo?

¹⁹ Sa duta man ukon sa langit ang imo paglaum, matigayon mo lamang ini kon magpakita ka sing pagtuo kay Jehova nga Dios, kay Jesucristo, kag sa gawad. Paagi sa pagtambong sa Memoryal, may kahigayunan ka nga pamalandungan ang imo paglaum kag kon daw ano ka importante ang kamatayon ni Jesus. Gani himua nga tulumuron nga mangin isa sa minilyon nga magatambong sa Panihapon sang Ginuo. Hiwaton ini pagtunod sang adlaw sa Biernes, Abril 3, 2015, sa mga Kingdom Hall kag sa iban pa nga lokasyon sa bilog nga kalibutan.

²⁰ Paagi sa pagtambong sa Memoryal, mahimo magdalom pa gid ang imo pagpasalamat sa halad-gawad ni Jesus. Ang pagpamati sing maayo sa diskurso mahimo magpahulag sa imo nga magpakita sing gugma sa imo isigkatawo paagi sa pagsugid sa ila sang imo natun-an parte sa gugma ni Jehova kag sa iya dalayawon nga katuyuan para sa mga tawo. (Mat. 22:34-40) Gani, pat-ura nga makatambong ka sa Panihapon sang Ginuo.