1. Para kay Jesus, daw ano ka importante ang pagbantala? Ipaathag.

GUSTO gid ni Jesus mag-istorya parte sa Ginharian sang Dios. Suno sa rekord sang Biblia, mas madamo nga beses sia nga nagahambal parte sa Ginharian sangsa bisan ano nga topiko—ginpatuhuyan niya ini sing sobra sa 100 ka beses sa bilog niya nga pagministeryo. Para sa iya, importante gid ang Ginharian.—Basaha ang Mateo 12:34.

2. Pila mahimo ang nakabati sang ginhatag ang sugo nga narekord sa Mateo 28:19, 20, kag ngaa makasiling kita sini? (Tan-awa ang footnote.)

² Wala madugay pagkatapos mabanhaw si Jesus, nakigkita sia sa sobra 500 ka tawo nga mahimo mangin manugbantala sang Ginharian. (1 Cor. 15:6) Posible nga sa sini nga tion sia nagsugo nga ipalab-ot ang mensahe sang Ginharian sa “mga tawo sa tanan nga pungsod”—nga mabudlay gid himuon sadto! * Nagtagna si Jesus nga ining daku nga hilikuton magapadayon tubtob sa “hingapusan sang sistema sang mga butang,” kag amo gid sini ang natabo. Mahimo  gid nga nagapakigbahin ka sa katumanan sini nga sugo kag tagna.—Mat. 28:19, 20.

3. Ano ang tatlo ka butang nga nagabulig sa aton nga matuman ang sugo nga ibantala ang maayong balita?

³ Pagkatapos magsugo si Jesus nga magbantala, nagpasalig sia sa iya mga sumulunod: “Kaupod ninyo ako.” (Mat. 28:20) Gani ining daku nga hilikuton sa pagbantala pagahimuon sa iya panuytoy. Kag ang aton Dios naghatag sa aton “sang tagsa ka maayong butang” para buligan kita sa pagtuman sini nga sugo. (Heb. 13:20, 21) Sa sini nga artikulo, binagbinagon naton ang tatlo sining maayong mga butang: (1) ang mga kagamitan nga ginhatag sa aton, (2) ang mga pamaagi nga gingamit naton, kag (3) ang paghanas nga aton nabaton. Una, binagbinaga ang pila ka kagamitan naton sa nagligad nga 100 ka tuig.

4. Ngaa naggamit kita sang lainlain nga kagamitan sa pagbantala?

⁴ Ginpaanggid ni Jesus ang “pulong sang Ginharian” sa binhi nga ginsab-ug sa lainlain nga klase sang duta. (Mat. 13:18, 19) Ang hardinero may lainlain nga gamit sa paghanda sang duta nga iya tamnan. Sing kaanggid, ang aton Hari nag-aman man sing mga kagamitan para buligan kita sa paghanda sang tagipusuon sang minilyon agod batunon nila ang mensahe sang Ginharian. Ang pila sini nga kagamitan nakabulig sa sulod sang mga napulo ka tuig, samtang ang iban nangin epektibo asta subong. Pero tanan ini nakabulig sa aton nga mapauswag ang aton ikasarang bilang mga ebanghelisador.

5. Ano ang testimony card, kag paano ini gingamit?

⁵ Ang isa ka kagamitan nga nakabulig sa madamo nga magsugod sa pagministeryo amo ang testimony card, nga una nga gingamit sang mga manugbantala sang Ginharian sang 1933. Mga tres por singko ka pulgada ini kadaku kag may nasulat nga malip-ot nga mensahe base sa Biblia. Kon kaisa nagahimo sing bag-o nga card nga may bag-o nga mensahe. Simple lang ang presentasyon! Mga dies anyos sadto si C. W. Erlenmeyer sang una niya ini nga gingamit sa pagpanaksi. Sia nagpaathag: “Ang kinaandan nga introduksion amo, ‘Palihug basa sini nga card.’ Pagkatapos basa sang tagbalay, ginatanyag namon ang literatura kag dayon nagalakat kami.”

6. Paano nakabulig ang testimony card?

⁶ Nakabulig man ang testimony card sa madamo nga paagi. May pila ka manugbantala nga gusto gid makigbahin sa pagbantala, ugaling nahuya sila kag indi sila kahibalo kon ano ang ila ihambal. Ang iban naman kadamo sang ginahambal. Ginasugid nila sa tagbalay ang tanan nila nga nahibaluan sa pila lang ka minuto, kag kon kaisa indi mataktikanhon ang ila presentasyon! Pero, sa malip-ot kag napili sing maayo nga mga tinaga, ang testimony card na ang “nagapakig-istorya” para sa manugbantala.

7. Ano ang mga kabudlayan sang pila sa paggamit sang card?

⁷ Pero, may mga kabudlayan man ang paggamit sini. Si Grace A. Estep, nga madugay na nga Saksi, naghinumdom: “Kon kaisa ginapamangkot kami, ‘Ti ano kuno ang ginasiling sini? Isugid na lang bala sa akon.’” Dugang pa, ang iban nga tagbalay indi makabasa sang nasulat sa card. Kag may ara man nga ginakuha nila ang card sa manugbantala kag dayon ginasirado ang puertahan, kay abi nila ginhatag na ini sa ila. May iban nga nagapamatok gid sa aton mensahe, gani ginagisi nila ang card. Bisan pa amo sini, nakatuon magbantala ang mga kauturan sa mga tawo kag nakilala sila bilang mga representante sang Ginharian.

8. Ipaathag kon paano gingamit ang madaladala nga mga radyo pono. (Tan-awa ang piktyur sa umpisa sini nga artikulo.)

⁸ Ang isa pa ka kagamitan sang dekada  1930 kag 1940 amo ang madaladala nga radyo pono, nga gintawag nga Aaron sang pila ka utod kay amo na ini ang nagapakig-istorya para sa ila. (Basaha ang Exodo 4:14-16.) Kon magpasugot ang tagbalay, ginapatokar sang manugbantala ang apat ka minuto kag tunga nga pamulongpulong base sa Biblia, dayon matanyag sia sang pila ka literatura. Kon kaisa, bilog nga pamilya ang nagapamati sa ginrekord nga mensahe sang Biblia! Sugod sang 1934, naghimo ang Watch Tower Society sang madaladala nga mga radyo pono nga gindesinyo para sa pagministeryo. Sang ulihi, naghimo sang mga rekording nga may 92 ka lainlain nga topiko.

9. Daw ano ka epektibo ang paggamit sang radyo pono?

⁹ Sang nabatian sang tagbalay nga si Hillary Goslin ang isa ka pamulongpulong nga base sa Biblia, isa ka semana niya nga ginhulam ang radyo pono sang manugbantala para mapabati niya sa iya mga kaingod ang mensahe sang Ginharian. Sang nagbalik ang manugbantala, may nakita sia nga bag-o nga mga interesado nga nagahulat sa iya. Sang ulihi, ang pila sa ila nagdedikar kay Jehova, kag ang duha ka bata nga babayi ni Hillary nag-eskwela sa Gilead School kag gin-asayn sa iban nga pungsod. Pareho sang testimony card, madamo ang nabuligan sang radyo pono nga makasugod sa pagbantala. Sang ulihi, paagi sa Teokratikong Eskwelahan Para sa Ministeryo, gintudluan sila sang Hari kon paano magbantala.

10, 11. Paano gingamit ang mga pamantalaan kag radyo sa pagpalapnag sang kamatuoran sa Biblia, kag ngaa nangin epektibo ini?

¹⁰ Sa panuytoy sang Hari, naggamit ang katawhan sang Dios sang lainlain nga pamaagi para mapalab-ot ang maayong balita sa madamo nga tawo. Importante gid ini ilabi na sang “diutay lamang ang mangangani.” (Basaha ang Mateo 9:37.) Sang ika-20 nga siglo, gingamit ang mga pamantalaan para malab-ot ang madamo nga tawo sa mga lugar nga diutay lang ang katawhan ni Jehova. Kada semana, nagapadala si Charles Taze Russell sang nasulat nga sermon sa isa ka kompanya sang pamantalaan. Dayon ginapadala ini nga sermon sa mga pamantalaan sa Canada, Estados Unidos, kag Europa. Ginabulubanta nga sang 1913, ang mga sermon ni Utod Russell nabasa sang 15,000,000 ka tawo paagi sa 2,000 ka pamantalaan!

¹¹ Sang napatay si Utod Russell, isa pa gid ka epektibo nga pamaagi sa pagpalapnag sang maayong balita ang gingamit. Sang Abril 16, 1922, ginhatag ni Joseph F. Rutherford ang isa sa una niya nga mga pamulongpulong sa radyo nga napamatian sang mga 50,000 ka tawo. Dayon sang Pebrero 24, 1924, nag-broadcast ang una nga estasyon sang radyo sang organisasyon nga WBBR. Parte sa sining bag-o nga pamaagi sa paglab-ot sa mga tawo, ang Disiembre 1, 1924, nga The Watch Tower nagsiling: “Nagapati kami nga ang radyo amo ang pinakabarato kag pinakaepektibo nga pamaagi sa pagpalapnag sang mensahe sang kamatuoran.” Pareho sang pamantalaan, nakabulig man ang radyo para malab-ot ang madamo sa mga lugar nga diutay lang ang manugbantala sang Ginharian.

12. (a) Ano nga sahi sang pagpanaksi sa publiko nga mga duog ang nanamian mo gid? (b) Ano ang makabulig para mabatuan naton ang kakulba sa pagpanaksi sa publiko nga mga duog?

¹² Ginapalig-on sa karon ang pagpanaksi sa publiko nga mga duog: sa mga paradahan sang bus, estasyon sang tren, palarkingan, plasa, kag mga tiendahan. Kon nakulbaan ka sa paghimo sang pila sini, mangamuyo kag hunahunaa ang ginsiling sang madugay na nga nagalakbay nga manugtatap nga si Angelo Manera, Jr.: “Ginatamod namon ang tagsa ka bag-o nga sahi sang pagministeryo bilang  lain naman nga paagi sa pag-alagad kay Jehova, isa naman ka paagi sa pagpamatuod sang amon pagkamainunungon sa iya, bag-o nga pagtilaw sa amon integridad, kag gusto gid namon pamatud-an nga handa kami sa pag-alagad sa iya bisan ano man ang iya ginapatuman.” Mahimo nga wala pa kita maanad sa sining bag-o nga pamaagi, pero nagabulig ini sa aton nga mapabakod ang aton pagsalig kag pagtuo kay Jehova kag mapauswag ang aton espirituwalidad.—Basaha ang 2 Corinto 12:9, 10.

13. Ano ang nabulig sang aton website nga jw.org, kag ano ang imo eksperiensia sang ginsugid mo ini sa mga tawo?

¹³ Madamo nga manugbantala ang nalipay gid sa pagsugid sa mga tawo parte sa aton website nga jw.org, diin mabasa nila kag ma-download ang base sa Biblia nga mga literatura sa sobra 700 ka lenguahe. Kada adlaw, sobra sa 1.6 ka milyon ang nagabisita sa aton website. Pareho sang radyo sadto, mapalab-ot man subong sang aton website ang maayong balita sa mga tawo, bisan sa malayo nga mga lugar.

14. Ano nga paghanas ang kinahanglan sang mga manugbantala sang Ginharian, kag ano nga eskwelahan ang nakabulig sa ila nga mangin epektibo nga mga manunudlo?

¹⁴ Ginbinagbinag naton ang pila ka kagamitan kag pamaagi nga gingamit sa pagpalapnag sang maayong balita. Pero ano nga paghanas ang aton nabaton? Ano abi kon ang tagbalay mamatok sa nabatian niya sa radyo pono ukon interesado sia sa nabasa niya sa testimony card? Dapat mahibaluan sang mga manugbantala kon paano nila atubangon sing mataktikanhon ang pagpamatok kag kon paano nila matudluan sing epektibo ang mga interesado. Pat-od gid nga paagi sa espiritu sang Dios, nakita ni Nathan H. Knorr nga kinahanglan hanason ang mga manugbantala kon paano makig-istorya sa pagministeryo. Ano ang solusyon? Ang Teokratikong Eskwelahan Para sa Ministeryo, nga una nga gin-organisar sa mga kongregasyon sang 1943. Nabuligan kita sini nga eskwelahan nga mangin epektibo nga mga manunudlo.

15. (a) Ano ang naeksperiensiahan sang iban sang naghatag sila sang ila bahin sa Teokratikong Eskwelahan Para sa Ministeryo? (b) Paano nangin matuod sa imo ang promisa ni Jehova nga mabasa sa Salmo 32:8?

¹⁵ Madamo ang wala naanad sa pagpamulongpulong sa atubangan sang madamo nga tawo. Si Julio S. Ramu naghinumdom sang naghatag sia sang una niya nga pamulongpulong sa eskwelahan sang 1944. Ano ang iya topiko? Ang parte kay Doeg, ang tawo nga ginsambit sa lima lang ka bersikulo sa Biblia! “Nagapalangurog ang akon tuhod kag  kamot, kag nagasantikanay ang akon mga ngipon,” siling ni Julio, kag nagsiling pa sia nga kinahanglan niya maghimo sang pamulongpulong base sa sining lima ka teksto. “Tatlo ka minuto ang akon pamulongpulong. Bisan pa una ko yadto nga beses nga magpamulongpulong sa plataporma, gintapos ko gid ini.” Ginlakip man sa eskwelahan ang mga kabataan, bisan pa indi mahapos para sa iban ang magpamulongpulong sa kongregasyon. Si Angelo Manera, nga ginsambit kaina, naghinumdom sang una nga naghatag sang bahin ang bata pa nga estudyante. “Grabe gid ang iya kakulba nga sang nagsugod sia sa iya bahin, naghibi sia. Pero determinado sia nga ihatag ini, amo nga sige ang iya hibi asta makatapos sia.” Naeksperiensiahan mo na bala nga wala ka nagkomento ukon nagpakigbahin sa mga miting kay nahuya ka ukon daw indi mo ini masarangan? Mangayo sing bulig kay Jehova nga mabatuan mo ang imo kahadlok. Buligan ka niya pareho sang pagbulig niya sa mga estudyante sadto sang Teokratikong Eskwelahan Para sa Ministeryo.—Basaha ang Salmo 32:8.

16. Ano ang katuyuan sang Gilead School (a) sang una kag (b) sugod sang 2011?

¹⁶ Ginahanas ang katawhan ni Jehova indi lamang paagi sa Teokratikong Eskwelahan Para sa Ministeryo. Ang mga misyonero kag ang iban nakabenepisyo gid sa pag-eskwela sa Gilead School. Suno sa isa ka instruktor, ang katuyuan sang eskwelahan amo ang “pagpatudok sa mga estudyante sang mas mabaskog nga handum sa pagbantala.” Ginsugdan ang Gilead sang 1943, kag halin sadto sobra na sa 8,500 ang nahanas. Ang mga misyonero nga ginhanas sa Gilead nagaalagad sa mga 170 ka pungsod. Sugod sang 2011, ang mga ginaagda sa Gilead amo ang mga espesyal payunir, mga nagalakbay nga manugtatap, mga Bethelite, ukon mga misyonero nga wala pa makaeskwela sa sini.

17. Daw ano ka epektibo ang paghanas sa Gilead?

¹⁷ Daw ano ka epektibo ining dugang nga paghanas? Binagbinaga ang halimbawa. Sang Agosto 1949, wala pa napulo ang manugbantala sa Japan. Antes matapos ina nga tuig, 13 ka misyonero nga ginhanas sa Gilead ang masako sa pagbantala didto. Subong, mga 216,000 na ang manugbantala sa Japan, kag halos 42 porsiento ang mga payunir!

18. Ano ang iban pa nga eskwelahan nga nakabulig sa kalipikado nga mga Saksi nga mag-uswag sa espirituwal?

¹⁸ Ang iban pa nga eskwelahan, pareho sang Kingdom Ministry School, Pioneer Service School, School for Kingdom Evangelizers, School for Circuit Overseers and Their Wives, kag School for Branch Committee Members and Their Wives, nakabulig gid sa pag-uswag sang espirituwalidad sang katawhan ni Jehova kag paghanas sa ila. Pat-od gid nga padayon nga ginahanas sang Hari ang iya mga sakop!

19. Ano ang pagpati ni Charles Taze Russell parte sa pagbantala nga hilikuton, kag paano ini nangin matuod?

¹⁹ Sobra na 100 ka tuig ang nagligad sugod sang ginbun-ag ang Ginharian sang Dios. Ang aton Hari, si Jesucristo, padayon nga nagahanas sa aton. Antes mapatay si Charles Taze Russell sang 1916, nagapati gid sia nga mangin dalayawon ang kasangkaron sang pagbantala sa ulihi. Ginsilingan niya ang iya amigo: “Kadasig magdaku sang aton hilikuton, kag padayon pa ini nga magadaku, kay ang pagbantala parte sa ‘maayong balita sang ginharian’ pagahimuon sa bilog nga kalibutan.” (Faith on the March, ni A. H. Macmillan, p. 69) Husto gid sia! Kag nagapasalamat gid kita nga ang Dios sang paghidait padayon nga nagabulig sa aton sa sining makalilipay nga hilikuton! Matuod gid nga ginahatagan niya kita sing “tagsa ka maayong butang” nga kinahanglan naton para mahimo ang iya kabubut-on!