May Yara Bala “Makapahamulag sa Aton sa Gugma sang Dios”?
Mangin Suod sa Dios
May Yara Bala “Makapahamulag sa Aton sa Gugma sang Dios”?
SIN-O sa aton ang indi luyag nga higugmaon? Matuod gid nga nalipay kita kon mabatyagan naton nga ginahigugma kita sang aton pamilya kag mga abyan. Apang, makapasubo nga ang mga relasyon sa karon madasig lang maguba kag magbag-o pagligad sang pila ka tion. Mahimo nga paslawon kita, biyaan, ukon sikwayon pa gani sang aton mga ginahigugma. Apang, may isa ka persona nga wala gid nagabag-o ang iya gugma. Amo ini ang gugma ni Jehova nga Dios para sa iya mga sumilimba nga matahom nga ginlaragway sa Roma 8:38, 39.
“Kumbinsido ako,” siling ni apostol Pablo, nga wala sing “makapahamulag sa aton sa gugma sang Dios.” Wala nagpatuhoy si Pablo sa iya lamang kaugalingon kundi para sa “aton” tanan nga matutom nga nagaalagad sa Dios. Agod ipadaku ang iya buot silingon, ginsulat ni Pablo ang pila ka mga butang nga indi makapahamulag sa gugma ni Jehovah sa iya matutom nga mga alagad.
“Bisan ang kamatayon ukon ang kabuhi.” Ang gugma ni Jehova para sa iya mga alagad wala nagakadula kon mapatay sila. Subong pamatuod, nagapabilin gihapon sila sa memorya sang Dios, kag pagabanhawon niya sila sa matarong nga bag-ong kalibutan sa palaabuton. (Juan 5:28, 29; Bugna 21:3, 4) Sa karon, ang gugma sang Dios sa iya mainunungon nga mga sumilimba wala nagabag-o bisan ano pa ang ila maeksperiensiahan sa sining sistema sang mga butang.
“Ukon ang mga anghel ukon ang mga panguluhan.” Ang mga tawo mahapos lang maimpluwensiahan sang mga yara sa poder ukon may awtoridad. Apang, indi nila maimpluwensiahan si Jehova. Ang gamhanan nga mga espiritu nga tinuga, subong sang anghel nga nangin si Satanas, indi makapugong sa Dios nga higugmaon ang iya mga sumilimba. (Bugna 12:10) Bisan pa pamatukan sang gobierno ang matuod nga mga Cristiano, indi gid magbag-o ang pagtamod sang Dios sa ila.—1 Corinto 4:13.
“Ukon ang mga butang karon ukon ang mga butang nga maabot.” Ang gugma sang Dios wala nagalubad sa pagligad sang tion. Bisan ano pa ang matabo sa iya mga alagad sa karon ukon sa palaabuton, padayon niya sila nga higugmaon.
“Ukon ang mga kagamhanan.” Ginpatuhuyan na ni Pablo ang langitnon kag dutan-on nga mga puersa subong sang “mga anghel” kag “mga gobierno,” apang karon ginsambit naman niya ang tuhoy sa “mga kagamhanan.” Ang Griegong tinaga nga gingamit diri madamo sing kahulugan. Apang, bisan diin man ang iya ginatumod, isa ka butang ang aton mapat-od: Wala sing kagamhanan sa langit ukon sa duta nga makapahamulag sa gugma ni Jehova sa iya mga katawhan.
“Ukon ang kataason ukon ang kadalumon.” Ginahigugma gid ni Jehova ang iya katawhan sa maayo man ukon mabudlay nga mga kahimtangan.
“Ukon ang iban pa nga tinuga.” Sa paglakip ni Pablo sang iban pa, buot silingon, bisan ano nga tinuga, ginpadaku niya nga wala gid sing makapahamulag sa gugma ni Jehova para sa mainunungon niya nga mga sumilimba.
Indi pareho sa gugma sang tawo nga mahimo magbag-o ukon maglubad, ang gugma sang Dios para sa mga nagatuo sa iya indi gid magbag-o kag wala sing katapusan. Pat-od gid nga ining ihibalo nagapasuod sa aton kay Jehova kag nagapahulag sa aton nga himuon ang aton labing masarangan agod pamatud-an man ang aton gugma sa iya.
