Ang Matun-an Naton kay Jesus

Parte sa mga Pangamuyo nga Ginapamatian sang Dios

Si Jesus pirme nagakadto sa isa ka lugar nga wala sing makaisturbo sa iya agod mangamuyo, kag ginsilingan man niya ang iya mga sumulunod nga amo sini ang himuon. Ang Biblia nagsiling: “Sang nakatapos sia pangamuyo sang didto sia sa isa ka duog, ang isa sa iya mga disipulo nagsiling sa iya: ‘Ginuo, tudlui kami kon paano magpangamuyo’ . . . Nagsiling sia sa ila: ‘Kon magpangamuyo kamo, magsiling, “Amay, pakabalaanon ang imo ngalan.”’” (Lucas 5:16; 11:1, 2) Gani ginpakita ni Jesus nga mangamuyo lamang kita sa iya Amay nga si Jehova. Sia lamang ang aton Manunuga kag ang “Nagapamati sang pangamuyo.”—Salmo 65:2.

Ang tanan bala nga pangamuyo ginapamatian sang Dios?

Ang pagsulitsulit sang saulado nga pangamuyo wala ginapamatian sang Dios. Si Jesus nagsiling: “Kon ikaw nagapangamuyo, indi pagsulitsulita ang amo gihapon nga mga butang.” (Mateo 6:7) Ang aton mga ginahambal sa Dios dapat halin sa aton tagipusuon. Isa ka bes, nagsiling si Jesus sa iya mga sumulunod nga mas ginabaton sang Dios ang mga pangamuyo sang makasasala nga tawo nga luyag magbag-o sangsa mga pangamuyo sang bugalon nga tawo nga estrikto nga nagasunod sa relihioso nga mga kustombre. (Lucas 18:10-14) Gani, para pamatian ang aton mga pangamuyo, dapat tumanon gid naton sing mapainubuson ang ginasiling sang Dios sa aton. Si Jesus nagsiling man: “Ginahambal ko ini nga mga butang suno gid sa gintudlo sa akon sang Amay. . . pirme ko ginahimo ang mga butang nga kalahamut-an sa iya.” (Juan 8:28, 29) Si Jesus nagsiling sa pangamuyo: “Indi ang akon kabubut-on, kundi ang imo kabubut-on ang matuman.”—Lucas 22:42.

 Ano dapat ang aton ipangamuyo?

Bangod ginpakalain ang ngalan sang Dios, si Jesus nagsiling: “Mangamuyo kamo sa sining paagi: ‘Amay namon nga yara sa langit, pakabalaanon ang imo ngalan. Magkari ang imo ginharian. Matuman ang imo kabubut-on sa duta, subong sang sa langit.’” (Mateo 6:9, 10) Dapat kita mangamuyo nga mag-abot ang Ginharian sang Dios bangod amo ini ang gobierno nga gamiton sang Dios para matuman ang iya kabubut-on sa langit kag sa duta. Si Jesus nagsiling nga puede man kita makapangamuyo sing ‘pagkaon nga kinahanglanon naton sa kada adlaw.’ Puede man naton mapangabay kay Jehova ang parte sa trabaho, puluy-an, panapton, ikaayong lawas, kag iban pa. Subong man, nagsiling si Jesus nga mangamuyo kita sing kapatawaran sa aton mga sala.—Lucas 11:3, 4.

Dapat man bala naton ipangamuyo ang iban nga tawo?

Nangamuyo man si Jesus para sa iban nga tawo. Ang Biblia nagasiling: “Gindala sa iya ang mga bata agod itungtong niya ang iya mga kamot sa ila kag magpangamuyo para sa ila.” (Mateo 19:13) Si Jesus nagsiling kay apostol Pedro: “Nagpangamuyo ako para sa imo agod indi madula ang imo pagtuo.” (Lucas 22:32) Ginsilingan ni Jesus ang iya mga sumulunod nga kinahanglan nga ipangamuyo nila ang iban nga tawo, bisan yadtong mga nagahingabot kag mga nagainsulto sa ila.—Mateo 5:44; Lucas 6:28.

Ngaa dapat kita magpadayon sa pagpangamuyo?

May tion gid pirme si Jesus para mangamuyo kag ginsilingan man niya ang iya mga sumulunod nga ‘magpangamuyo pirme kag indi magpangampo.’ (Lucas 18:1) Ginaagda kita ni Jehova nga ipabutyag pirme sa iya ang mga butang nga aton ginakabalak-an. “Padayon sa pagpangayo, kag hatagan kamo,” siling ni Jesus. Apang, indi buot silingon sini nga may kondisyon pa si Jehova sa pagbulig sa mga nagahigugma kag nagarespeto sa iya subong isa ka Amay. Sa baylo, nagsiling si Jesus: “Kon kamo bisan malaut makahibalo maghatag sang maayo nga mga dulot sa inyo mga anak, labi pa gid nga ang Amay sa langit magahatag sang balaan nga espiritu sa mga nagapangayo sa iya!”—Lucas 11:5-13.

Para sa dugang pa nga impormasyon, tan-awa ang kapitulo 17 sang libro nga Ano Gid ang Ginatudlo Sang Biblia? *

[Nota]