Paggahom sang Diutay nga Grupo, Kaayuhan Para sa Madamo

SUGOD pa sa panahon sang mga apostoles, nagapili na ang Dios halin sa mga tawo sing pila ka matutom nga mga Cristiano, kag ginaadoptar sila subong iya mga anak. Daku gid ang pagbag-o nga naeksperiensiahan sining gin-adoptar nga mga anak amo nga ginlaragway ini sang Pulong sang Dios subong bag-o nga pagkabun-ag. Katuyuan sang bag-o nga pagkabun-ag nga ihanda ining ginbun-ag liwat nga mga alagad sang Dios para maggahom sa langit. (2 Timoteo 2:12) Para mangin mga gumalahom, ginbanhaw sila padulong sa kabuhi sa langit. (Roma 6:3-5) Didto, “magagahom sila sa duta subong mga hari” kaupod ni Cristo.—Bugna 5:10; 11:15.

Magluwas sa mga ginbun-ag liwat, may ginsambit pa ang Pulong sang Dios nga magabaton sing  walay katapusan nga kaluwasan. Sa Biblia (sa Hebreo nga Kasulatan subong man sa Cristianong Griegong Kasulatan), ginsambit ang katuyuan sang Dios nga luwason ang duha ka grupo sang mga tawo. Ang una amo ang diutay nga grupo nga magagahom sa langit kag ang ikaduha amo ang daku nga grupo sang mga sakop nga magaistar sa duta. Halimbawa, talupangda ang ginsulat ni apostol Juan sa iya kaupod nga mga tumuluo nga nakaeksperiensia sing bag-o nga pagkabun-ag. Nagsiling sia parte kay Jesus: “Sia ang nagapasag-uli nga halad para sa aton mga sala, pero indi lamang para sa aton [ang diutay nga grupo] kundi para man sa mga sala sang bug-os nga kalibutan [ang daku nga grupo].”—1 Juan 2:2.

Nagsulat man si apostol Pablo: “Paagi sa malangkagon nga pagpaabot ang tinuga [ang daku nga grupo] nagahulat sa pagpahayag sa mga anak sang Dios [ang diutay nga grupo].” (Roma 8:19-21) Paano naton hangpon ang ginsiling nanday apostol Juan kag Pablo? Mahangpan naton ini sa sini nga paagi: Ang mga nabun-ag liwat mangin bahin sang gobierno sa langit. Ano ang katuyuan sini? Para magdala sing walay katapusan nga kaayuhan sa minilyon nga magaistar diri sa duta subong sakop sang gobierno sang Dios. Gani, gintudluan ni Jesus ang iya mga disipulo nga mangamuyo: “Magkari ang imo ginharian. Matuman ang imo kabubut-on sa duta, subong sang sa langit.”—Mateo 6:10.

Ining kamatuoran parte sa kaluwasan para sa duha ka grupo makita man sa Hebreo nga Kasulatan. Halimbawa, talupangda ang ginsiling ni Jehova sa katigulangan ni Jesus nga si Abraham: “Paagi sa imo binhi [ang diutay nga grupo] ang tanan nga pungsod sang duta [ang daku nga grupo] pat-od nga magapakamaayo sang ila kaugalingon.” (Genesis 22:18, NW) Huo, pakamaayuhon ang tanan nga pungsod paagi sa “binhi” ni Abraham.

Sin-o ini nga “binhi”? Si Jesucristo upod ang mga nakaeksperiensia sing bag-o nga pagkabun-ag kag gin-adoptar subong mga anak sang Dios. Si apostol Pablo nagpaathag: “Kon kamo iya ni Cristo, binhi gid kamo ni Abraham.” (Galacia 3:16, 29) Kag ano ang mga pagpakamaayo para sa mga katawhan sang tanan nga pungsod paagi sa “binhi”? Ang pribilehiyo nga kahamut-an sang Dios kag magakalipay sa pagkabuhi sing walay katapusan sa isa ka paraiso nga duta. Ang salmista nga si David nagtagna: “Ang mga matarung magapanubli sang duta, kag magapuyo dira sa gihapon.”—Salmo 37:29; Isaias 45:18; Bugna 21:1-5.

Maathag nga pila lang ang magagahom sa langit, pero ang kaayuhan sang ila paggahom amo ang kabuhi nga walay katapusan diri sa duta para sa madamo kag ang mga pagpakamaayo nga nalakip sa sini. Kabay nga ikaw kag ang imo pamilya malakip sa magakalipay sa walay katapusan nga mga kaayuhan sang Ginharian sang Dios.

[Retrato sa pahina 12]

Minilyon ang pakamaayuhon sing kabuhi nga walay katapusan diri sa duta. Mangin isa ka bala sa ila?