“Ako ang GINOO nga Inyo Dios Balaan”
Mangin Suod sa Dios
“Ako ang GINOO nga Inyo Dios Balaan”
“BALAAN, balaan, balaan si Jehova.” (Bugna 4:8) Sa sini nga mga pinamulong, ginapakita sang Biblia nga wala sing tupong ang pagkabalaan ni Jehova, nga nagalakip sang iya kaputli kag pagkamatarong. Ang Dios indi gid makasala; indi sia madagtaan ukon mamantsahan sang sala sa bisan ano nga paagi. Ginapahangop bala sini nga wala na sing paglaum ang indi perpekto nga mga tawo nga matigayon ang maayo nga kaangtanan sa tuman ka balaan nga Dios? Indi gid! Binagbinagon naton ang nagahatag sing paglaum nga pinamulong sa Levitico kapitulo 19.
Ginsilingan ni Jehova si Moises: “Ipamolong sa bug-os nga katilingban sang katawohan sang Israel.” Ang masunod nga pinamulong ginsiling sang Dios sa tagsa ka Israelinhon paagi kay Moises: “Magpakabalaan kamo; kay Ako ang GINOO nga inyo Dios balaan.” (Bersikulo 2) Ang kada Israelinhon dapat mangin balaan. Ang mga tinaga nga “magpakabalaan kamo” nagapakita nga indi ini suhestyon kundi isa ka sugo. Ginasugo bala sang Dios ang butang nga indi mahimo sang mga tawo?
Talupangda nga nagsiling si Jehova nga balaan sia. Wala ini nagapahangop nga tupungan nila ang iya pagkabalaan, kundi ang iya pagkabalaan amo ang rason kon ngaa dapat tumanon ang iya sugo. Buot silingon, wala ginsilingan ni Jehova ang iya indi perpekto nga mga sumilimba sa Israel nga mangin pareho gid sa iya ka balaan. Imposible gid ina. “Pinasahi nga Balaan” si Jehova, amo nga wala na sing mas balaan pa sangsa iya. (Hulubaton 30:3, Biblia sang Katilingban sang mga Kristiano) Bangod balaan si Jehova, ginapaabot niya ang iya mga sumilimba nga mangin balaan sa ila bug-os nga masarangan, bisan pa indi sila perpekto. Paano sila mangin balaan?
Sa tapos mahatag ang sugo nga mangin balaan, ginpahibalo man ni Jehova paagi kay Moises ang mga kasuguan parte sa ila pagkabuhi. Dapat tumanon sang tagsa ka Israelinhon ang masunod: tahuron ang mga ginikanan kag mga tigulang (bersikulo 3, 32); ulikdan ang mga bungol, bulag, kag mga imol (bersikulo 9, 10, 14); mangin bunayag kag wala sing pinilian sa pagpakig-angot sa iban (bersikulo 11-13, 15, 35, 36); kag higugmaon ang isigkatawo subong sa ila kaugalingon. (Bersikulo 18) Kon ini kag ang iban pa nga sugo tumanon sang mga Israelinhon, ‘manginbalaan sila sa Dios.’—Numeros 15:40.
Ang sugo nga mangin balaan nagatudlo sa aton parte sa panghunahuna kag kinaiya ni Jehova nga Dios. Isa pa, para matigayon naton ang suod nga kaangtanan kay Jehova nga Dios, kinahanglan himuon naton ang aton labing masarangan nga tumanon ang iya mga talaksan sang balaan nga paggawi. (1 Pedro 1:15, 16) Kon padayon naton nga tumanon ining mga talaksan, matigayon naton ang pinakamaayo nga kabuhi.—Isaias 48:17.
Ang sugo nga mangin balaan nagapakita nga nagasalig si Jehova sa iya mga sumilimba. Wala sia nagapaabot nga himuon naton ang indi naton masarangan. (Salmo 103:13, 14) Bangod gintuga kita ni Jehova sa iya dagway, nahibaluan niya nga may ikasarang kita nga mangin balaan bisan pa limitado lamang ini. (Genesis 1:26) Indi bala makapahulag gid ini sa imo nga tun-an kon paano mangin suod pa gid sa balaan nga Dios, si Jehova?
[Retrato sa pahina 9]
May ikasarang kita nga mangin balaan
