Nahibaluan Mo Bala?

Sin-o ang “kapitan sang templo,” kag ano ang iya mga responsibilidad?

Ang “kapitan sang templo” amo ang kaupod sang Judiyo nga mga lider sang relihion nga nagpaaresto kanday apostol Pedro kag Juan samtang nagabantala sila. (Binuhatan 4:1-3) Wala ginasugid sang Biblia kon ano ang mga responsibilidad sang kapitan sang templo, pero makabulig sa aton ang pila ka sinulatan sa kasaysayan.

Mahimo nga sang tion ni Jesus, ang saserdote nga ikaduha sa mataas nga saserdote amo ang kapitan sang templo. Sia ang nagapatuman sang kalinong sa gua kag sa sulod sang templo sang Jerusalem. Ginadumalahan niya ang pagsimba sa templo kag ang mga guardia sang templo. Ang mga kapitan naman sa idalom niya amo ang nagadumala sa mga manugbantay. Ini nga mga manugbantay amo ang nagabukas sang templo kon aga kag nagasira sini kon gab-i. Ginapat-od man nila nga wala sing may makasulod sa ginadilian nga mga lugar kag ginaguardiahan ang bahandian sang templo.

Ang mga saserdote kag mga Levinhon nga nagaalagad sa templo naorganisar sa 24 ka dibisyon. Ang kada dibisyon nagaalagad sing isa ka semana, duha ka beses kada tuig. Mahimo nga ang kada dibisyon may kaugalingon nga kapitan.—1 Cronica 24:1-18.

Ining mga kapitan sang templo impluwensiado nga mga tawo. Kaupod sila sang mga puno nga saserdote nga nagkunsabo nga ipapatay si Jesus. Ginsugo man nila ang ila mga tinawo nga dakpon si Jesus.—Lucas 22:4, 52.

Ang Mateo 3:4 nagsiling nga si Juan Bautista nagkaon sing “apan kag dugos.” Kinaandan bala nga pagkaon ang apan sadto nga tion?

Ang iban wala nagapati nga nagkaon si Juan sing mga insekto, kay ang ginapatuhuyan kuno ni Mateo amo ang mga liso sang kahoy nga locust, ukon isa ka sahi sang prutas ukon isda. Pero, ang Griegong tinaga nga gingamit ni Mateo nagapatuhoy sa isa ka sahi sang tibakla nga ginatawag Acrididae ukon apan. Madamo sing desyerto nga apan sa Israel kag kilala ini nga nagapanong kag nagapierde sang pananom.—Joel 1:4,7; Nahum 3:15.

Nanamitan gid magkaon sang apan ang mga taga-Asiria kag taga-Etiopia, kag asta subong, ginakaon ini sang mga Bedouin kag Yemenite nga mga Judiyo. Sa Israel naman, ang apan ginakabig nga pagkaon sang mga pigado. Sa tapos makuha ang ulo, tiil, kag tiyan, mahimo ini sanlagon, ugahon ukon kaunon nga hilaw. Kon kaisa, ginaasinan nila ang apan ukon ginahuluman sa langgaw ukon dugos. Ang istoryador nga si Henri Daniel-Rops nagsiling nga daw pasayan ang sabor sini.

Sa kamingawan nagawali si Juan amo nga mahapos lang sia makakuha sing apan. (Marcos 1:4) Mga 75 porsiento sang apan, protina, gani masustansia gid ini kaunon upod sa dugos.

[Retrato sa pahina 28]

Mga sulugon sa Asiria nga nagabitbit sing apan kag prutas nga granada

[Credit Line]

From the book Discoveries Among the Ruins of Nineveh and Babylon (1853)