Ang Biblia Nagapabag-o sang Kabuhi

NGAA ginpautdan sang isa ka Rastafarian ang iya dreadlocks ukon sinalapid nga buhok? * Kag paano nadula ang iya dumot sa mga puti? Ngaa nagbag-o ang isa ka mapintas nga pamatan-on nga sang una nagapanukot para sa mga drug pusher? Binagbinaga kon ano ang masiling nila.

“Nadula na ang akon dumot.”—HAFENI NGHAMA

EDAD: 34

PUNGSOD: ZAMBIA

KABUHI SANG UNA: RASTAFARIAN

ANG AKON NAGLIGAD: Si Nanay taga-Namibia. Pero bangod sa inaway didto, nalagyo sia kag nag-entra sa South West Africa People’s Organization (SWAPO). Ini nga organisasyon nagrebelde sa pagginahom sang South Africa nga nagsakop sa Namibia sadto nga tion. Bangod sini, natawo ako sa isa ka refugee camp sa Zambia.

Nagasaylosaylo kami sa lainlain nga refugee camp asta nga nag-15 anyos ako. Ang mga kabataan sa mga kampo sang SWAPO ginatudluan nga suportahan kag ipalapnag ang hublag para sa kahilwayan. Pirme kami nila ginatudluan nga dumtan ang mga puti.

Sang 11 anyos ako, gusto ko nga mag-entra sa isa ka simbahan sang mga Cristiano sa kampo nga may mga Katoliko, Luterano, Anglikano, kag iban pa. Pero sang nag-istorya ako sa pastor, ginpalas-ay niya ako. Sugod sadto, wala na ako nagpati sa Dios. Sang 15 anyos ako, nag-entra ako sa hublag sang mga Rastafarian kay mahilig ako sa reggae nga musika kag gusto ko mahatagan sing hustisya ang nagaantos nga mga Aprikano. Ginpalaba ko ang akon buhok kag ginsalapid. Nagmarijuana man ako, nag-untat sa pagkaon sang karne, kag ginpakigbato ang kahilwayan sang mga negro. Pero, wala ko gin-untatan ang akon imoral nga pagkabuhi. Pirme ako gihapon nagalantaw sing bayolente nga mga pelikula kag nagapamuyayaw.

KON PAANO GINBAG-O SANG BIBLIA ANG AKON KABUHI: Sang 1995, sang mga 20 anyos ako, ginpamensaran ko sing maayo kon ano ang nagakatabo sa akon kabuhi. Gintun-an ko ang tanan nga mga balasahon sang mga Rastafarian nga akon makita. Ang iban sa sining mga publikasyon may mga teksto man sa Biblia, pero indi ako kumbinsido kon paano nila ini ginpaathag. Gani, ginbasa ko ang Biblia.

Sang ulihi, ginhatagan ako sang akon amigo nga Rastafarian sing libro halin sa mga Saksi ni Jehova para mas maintiendihan ko ang Biblia. Gintun-an ko ini upod sa Biblia. Sang ulihi, may  nakilala ako nga Saksi ni Jehova kag ginpadayon ko ang pagtuon upod sa ila.

Gintinguhaan ko gid nga untatan ang pagpahubog kag pagpanigarilyo. (2 Corinto 7:1) Ginhipid ko ang akon kaugalingon kag ginpautdan ang akon buhok. Gin-untatan ko man ang pagpamuyayaw kag ang pagtan-aw sing bold kag bayolente nga mga pelikula. (Efeso 5:3, 4) Sang ulihi, nadula na ang akon dumot sa mga puti. (Binuhatan 10:34, 35) Ano ang nakabulig sa akon? Gin-untatan ko ang pagpamati sa mga musika nga nagadabok sa kaugot sa iban nga rasa. Wala na ako nag-upod sa akon mga amigo sang una nga mahimo mag-impluwensia sa akon nga magbalik sa akon daan nga pagkabuhi.

Pagkatapos sini, nangita ako sing Kingdom Hall sang mga Saksi ni Jehova kag ginsilingan ko sila nga gusto ko mag-upod sa ila. Gani, gintun-an nila ako sa Biblia. Sang nagdesisyon na ako nga magpabawtismo sa mga Saksi ni Jehova, naakig gid ang akon pamilya. Nagsiling si Nanay nga puede ako magsulod sa iban nga “Cristiano” nga relihion basta indi lang sa Saksi. Pirme man ako ginasuyaan sang akon tiyo, nga isa ka kilala nga pulitiko, kay nag-upod ako sa mga Saksi.

Pero, sang matun-an ko kon paano gintratar ni Jesus ang mga tawo kag sang ginsunod ko ang iya mga laygay, nabuligan ako nga maatubang ang mga pagpamatok kag pagyaguta. Sang ginkomparar ko sa Biblia ang ginatudlo sang mga Saksi, nakumbinsi ako nga amo gid ini ang matuod nga relihion. Halimbawa, ginasunod nila ang sugo sang Biblia nga magwali sa iban. (Mateo 28:19, 20; Binuhatan 15:14) Kag wala sila nagaentra sa pulitika.—Salmo 146:3, 4; Juan 15:17, 18.

MGA BENEPISYO: Daku gid ang nabulig sa akon sang pagsunod sa mga prinsipio sa Biblia. Halimbawa, wala na ako nagauyang sing ginatos ka dolyar kada bulan kay wala na ako nagamarijuana. Wala naman ako naga-hallucinate kag nag-ayo na ang akon panglawas.

Ang akon kabuhi subong may direksion na kag katuyuan. Amo gid ini ang ginahandum ko halin pa sang una. Kag importante sa tanan, nabatyagan ko nga nagsuod na ako sa Dios.—Santiago 4:8.

“Natun-an ko nga kontrolon ang akon kaakig.”—MARTINO PEDRETTI

EDAD: 43

PUNGSOD: AUSTRALIA

KABUHI SANG UNA: DRUG PUSHER

ANG AKON NAGLIGAD: Ang amon pamilya pirme lang nagasaylosaylo. Gani, nakaistar kami sa gamay nga mga banwa, dalagku nga mga siudad, kag sa lugar nga ginaistaran sang mga tumandok sang Australia. Masadya kami didto upod sa akon mga tiyo kag mga pakaisa. Nagapamunit kami, nagapangayam, nagahimo sang mga boomerang, kag nagapangtigib.

Boksidor si Tatay kag gintudluan niya ako nga makig-away  sang gamay pa ako. Amo nga kapintas gid sa akon. Pirme man ako nagainom kag nagakadto sa mga bar sang tin-edyer pa ako. Pirme lang kami nagapangita kontra sang akon mga amigo. Nagadala kami sing kutsilyo kag mga baseball bat para gubaton ang mga 20 ukon kapin pa ka tawo.

Para makakuarta, nagabaligya ako sang droga kag sang mga kinawatan sang mga trabahador sa pier. Ako man ang nagapanukot para sa mga pusher. Ang indi magbayad, ginapahog ko nga tiruhon. Gusto ko nga mangin manugpatay sang tawo. Kag ang akon motto: “Kon indi ka magpatay, ikaw ang mapatay.”

KON PAANO GINBAG-O SANG BIBLIA ANG AKON KABUHI: Nabatian ko na ang mga Saksi ni Jehova sang gamay pa ako. Sang mga 20 na ang akon edad, nadumduman ko nga ginpamangkot ko si Nanay kon diin ko sila makita. Duha ka adlaw sang ulihi, nagbisita sa amon ang isa ka Saksi nga si Dixon. Pagkatapos sang amon pag-istoryahanay, ginhagad niya ako sa mga miting sang mga Saksi ni Jehova. Nagkadto ako, kag sugod sadto, sige-sige na ako nga naga-attend sa sulod na sang sobra 20 ka tuig. Ang tanan ko nga pamangkot ginasabat sang mga Saksi paagi sa Biblia.

Nalipay ako nga mahibal-an nga interesado si Jehova sa kada isa sa aton, bisan sa mga makasasala. (2 Pedro 3:9) Natun-an ko man nga mahigugmaon sia nga Amay kag bisan isikway ako sang tanan, indi gid niya ako pagpabay-an. Nalipay man ako kay natun-an ko nga patawaron niya ang akon mga sala kon magbag-o ako. Ang Efeso 4:22-24 nakabulig gid sa akon nga ‘ubahon ang daan nga personalidad’ kag “magsuklob sang bag-o nga personalidad nga gintuga suno sa kabubut-on sang Dios.”

Medyo nadugayan pa kag nabag-o ko ang akon kabuhi. Kon kaisa, masarangan ko nga indi mag-drugs sa sulod sang lima ka adlaw. Pero kon upod ko ang akon mga amigo kon Sabado ukon Domingo, naga-drugs naman ako. Sang ulihi, narealisar ko nga dapat mapalayo ako sa ila para madula ko ang akon bisyo. Gani nagsaylo ako sa iban nga lugar. Nagsiling ang pila ko ka amigo nga idul-ong nila ako, kag nagpasugot ako. Pero samtang nagabiyahe kami, nagsuyop sila sing marijuana kag gintunghulan naman nila ako. Ginsilingan ko sila nga ginbiyaan ko na ina nga bisyo. Dayon, nagbulagay na kami sa may border kag ako na lang ang nagpadayon sa pagbiyahe. Sang ulihi, nabalitaan ko na lang nga nanghold-up sila sang isa ka banko.

MGA BENEPISYO: Sang nagpalayo na ako sa akon mga amigo, mas madasig ang akon pagbag-o. Sang 1989, nagpabawtismo ako. Sang ulihi nangin Saksi ni Jehova man si Nanay, si Tatay, kag ang akon manghod nga babayi.

Karon, 17 na ako ka tuig nga kasal kag may 3 ka matahom nga kabataan. Bisan pa kon kaisa daw manginit na ako, natun-an ko nga kontrolon ang akon kaakig. Natun-an ko man nga palanggaon ang tanan nga tawo bisan ano man ang ila ‘tribo, rasa, kag hambal.’ (Bugna 7:9) Nabatyagan ko nga matuod gid ang ginsiling ni Jesus: “Kon magpabilin kamo sa akon pulong, mga disipulo ko gid kamo, kag mahibaluan ninyo ang kamatuoran, kag ang kamatuoran magahilway sa inyo.”—Juan 8:31,32.

[Nota]

[Blurb sa pahina 19]

Gin-untatan ko ang pagpamati sa mga musika nga nagadabok sa kaugot sa iban nga rasa

[Blurb sa pahina 20]

Pirme lang kami nagapangita kontra sang akon mga amigo. Nagadala kami sing kutsilyo kag mga baseball bat para gubaton ang mga 20 ukon kapin pa ka tawo