Lugpayi ang Namatyan, Pareho sa Ginhimo ni Jesus

SI Lazaro, nga taga-Betania, may grabe nga balatian. Ang iya utod nga sanday Marta kag Maria nagpadala sing mga mensahero para pabal-on ang ila abyan nga si Jesus. Pero napatay si Lazaro. Sang nalubong na sia, ginbisitahan sang mga abyan kag mga kaingod sanday Marta kag Maria para “lugpayan sila.” (Juan 11:19) Pag-abot ni Jesus, ginkadtuan niya dayon ining pinalangga niya nga mga abyan. Kon binagbinagon naton ang ginsiling kag ginhimo niya, matun-an naton kon paano lugpayan ang mga namatyan.

Kadtui Sila

Para makakadto sa Betania, mga duha ka adlaw ang lalakton ni Jesus halin sa Jerico. Matabok sia sa Suba Jordan kag maagi sa takason kag nagalikoliko nga dalan. Sang malapit na si Jesus, ginsugata sia dayon ni Marta. Kag sang nabatian ni Maria nga ara si Jesus, nagdalidali man sia sa pagsugata sa iya. (Juan 10:40-42; 11:6, 17-20, 28, 29) Ang presensia ni Jesus nakalugpay gid sa nasubuan nga mag-utod.

 Ang aton presensia makalugpay man sa mga namatyan. Sanday Scott kag Lydia, nga napatyan sang ila anom ka tuig nga bata nga si Theo bangod sa aksidente, nagsiling: “Kinahanglan namon ang suporta sang amon pamilya kag mga abyan. Nagkadto sila sa ospital bisan tungang gab-i na.” Ano ang ginhambal sang ila mga abyan? “Sadto nga tion, indi kinahanglan nga istoryahon gid nila kami. Nabatyagan namon nga nagaulikid sila bangod sa ila presensia.”

Mabasa sa Biblia nga sang makita ni Jesus ang mga nagahinibi kay Lazaro, “natandog gid ang iya tagipusuon” kag “naghibi” sia. (Juan 11:33-35, 38, APD) Wala ginkabig ni Jesus nga indi bagay sa lalaki ang maghibi sa atubang sang iban. Nabatyagan niya kon daw ano kasakit ang mapatyan. Ano ang matun-an naton sa sini? Kon magduaw sa namatyan, indi kita dapat mahuya nga maghibi upod sa mga nagahibi. (Roma 12:15) Pero, indi pagpilita ang mga namatyan nga maghibi, kay ang iban indi gusto maghibi kon damo tawo.

Pamatii Sila

Mahimo nga may gusto ihambal si Jesus para malugpayan sanday Marta kag Maria, pero ginpahambal niya anay sila. (Juan 11:20, 21, 32) Sang nag-istorya sia kay Marta, namangkot sia, kag dayon namati sa iya.—Juan 11:25-27.

Kinahanglan nga mamati kita sing maayo para mapakita naton ang pag-ulikid kag malugpayan ang namatyan. Mahimo naton ini paagi sa pagpamangkot para mapautwas nila ang ila ginabatyag. Pero indi sila pagpilita nga mag-istorya kon indi nila gusto. Basi kapoy lang sila kag gusto magpahuway.

Ang mga namatyan mahimo nga daw wala sing mabatyagan kag kon kaisa ginasulitsulit nila ang ila ginahambal. Ang iban naman nagahaya gid. Sanday Maria kag Marta pareho nga nagsiling kay Jesus: “Ginuo, kon yari ka lang diri, wala kuntani mapatay ang akon utod.” (Juan 11:21, 32) Ano ang ginhimo ni Jesus? Pasensioso sia nga namati sing maayo sa ila. Wala niya sila ginsaway. Naintiendihan niya nga grabe gid ang ila kasubo.

Kon indi ka kabalo sang imo ihambal sa namatyan, makasiling ka, “Ari lang ako kon gusto mo nga may istoryahon ka.” Dayon, ihatag sa iya ang imo atension kag tinguhai nga hangpon ang iya ginabatyag.

Mabudlay mabal-an kon ano gid ang ginabatyag sang namatyan. “Nagabag-obag-o ang amon ginabatyag,” siling ni Lydia. “Kon kaisa, nagahinibi kami bisan may mga bisita. Gusto namon nga pabakuron kami sang iban. Gintinguhaan gid sang amon mga abyan nga intiendihon kami.”

Amo gid sini ang ginhimo ni Jesus. Kabalo sia nga ang kada isa may ‘iya kaugalingon nga kalalat-an kag kalisud.’ (2 Cronica 6:29) Lainlain ang sabat ni Jesus sa mag-utod. Sige ang hambal ni Marta, gani gin-istorya sia ni Jesus. Si Maria naman nagahibi, gani dali lang ang pag-istorya ni Jesus sa iya. (Juan 11:20-28, 32-35) Ano ang matun-an naton sa sini? Paistoryaha lang ang mga namatyan. Mahimo nga  malugpayan gid sila kon mamati ka samtang ginapautwas nila ang ila kasubo.

Lugpayi Sila

Sang magsiling sanday Maria kag Marta kay Jesus nga: “Kon yari ka lang diri,” wala naglain ang iya buot kag wala man sia namasol. Makapabakod gid ang iya sabat kay Marta: “Ang imo utod mabanhaw.” (Juan 11:23) Ang malip-ot nga ginhambal ni Jesus nagpahanumdom sa iya nga may paglaum.

Kon nagaistorya sa mga namatyan, dumduma nga makabulig gid ang sinsero kag positibo nga mga tinaga, bisan malip-ot lang ini! Puede mo ini ihambal ukon isulat. Ang mga sulat ukon mga kard makalugpay gihapon sa mga namatyan kay mabasa nila ini liwat. Pagligad sang siam ka bulan nga napatay si Bob nga bana ni Kath, ginbasa niya liwat ang mga kard nga iya nabaton. “Mas daku ang nabulig sini sa akon,” siling niya. “Sa sini ko nabatyagan nga nalugpayan ako.”

Ano ang puede mo isulat? Mahimo mo isulat ang parte sa napatay—ang inyo pag-updanay kag ang mga nanamian mo sa iya. Si Kath nagsiling: “Ang maayo nga mga butang nga ginahambal parte kay Bob, nagapayuhum kag nagapahibi sa akon. Nagakadlaw ako sa makahalam-ut nga mga istorya parte sa iya, kag madumduman ko ang amon malipayon nga kabuhi. Madamo sining mga kard nga ginatago ko gid, may mga bersikulo sa Biblia.”

Buligi Sila

Para buligan ang pamilya ni Lazaro, nahimo ni Jesus ang indi naton mahimo. Ginbanhaw niya si Lazaro. (Juan 11:43, 44) Pero may masarangan man kita himuon pareho sang pagdigamo, pagpadayon sa mga bisita, pagpanglaba, pagbantay sa mga bata, pagtanyag sang salakyan, kag iban pa. Simple lang ini nga pagpakita sang matuod nga gugma nga ginapasalamatan gid sang mga namatyan.

Siempre, mahimo nga kinahanglan man nila mag-isahanon. Pero, indi pagkalipati nga kamustahon sila pirme. “Wala ko kabalo kon asta san-o ako maumpawan ukon masubuan liwat,” siling sang namatyan nga iloy. Ginaduaw sang iban ang mga namatyan sa importante nga mga petsa, pareho sang anibersaryo sang kasal ukon sa petsa sang pagkapatay. Kon himuon mo ini, mangin matuod ka nga abyan sa mabudlay nga mga kahimtangan.—Hulubaton 17:17.

Lakip sa lugpay ni Jesus amo ang paglaum nga gintudlo niya sa iya mga disipulo: “Si Lazaro nga aton abyan nagapahuway, apang makadto ako didto agod pukawon sia sa katulugon.” (Juan 11:11) Ginpasalig ni Jesus ang iya mga sumulunod nga banhawon ang mga patay. Ginpamangkot niya si Marta: “Nagapati ka bala sini?” Si Marta nagsabat: “Huo, Ginuo.”—Juan 11:24-27.

Nagapati ka bala nga banhawon ni Jesus ang mga patay? Kon amo, isugid ining makalilipay nga paglaum sa mga namatyan. Buligi sila. Ang imo ginahambal kag ginahimo makalugpay gid sa ila.—1 Juan 3:18.

[Mapa sa pahina 9]

(Para sa aktual nga pormat, tan-awa ang publikasyon)

PEREA

Suba Jordan

Jerico

Betania

Dagat Asin

Jerusalem

SAMARIA