“Nagpakilooy Sia sa GINOO”
Mangin Suod sa Dios
“Nagpakilooy Sia sa GINOO”
“DAW indi na ako mapatawad,” siling sang lalaki nga nagsupak sa mga sugo sang Dios nga gintudlo sa iya sang bata pa sia. Sang gusto na niya magbag-o, abi niya indi na gid sia mapatawad sang Dios. Pero nalugpayan sia sang ginsugid sang Biblia parte kay Manases, nga mabasa sa 2 Cronica 33:1-17. Kon nagabatyag ka man sini, malugpayan ka sang halimbawa ni Manases.
Nagdaku si Manases sa diosnon nga pamilya. Ang iya amay nga si Ezequias, isa sa pinakamaayo nga hari sang Juda. Natawo si Manases mga tatlo ka tuig sa tapos ginpalawig sang Dios paagi sa milagro ang kabuhi sang iya amay. (2 Hari 20:1-11) Para kay Ezequias, ang iya bata isa ka regalo nga resulta sang kaluoy sang Dios, kag gintudluan niya ini nga higugmaon ang matuod nga pagsimba. Pero, bisan pa diosnon ang mga ginikanan, may mga bata gihapon nga nagalisa. Kag amo ini ang ginhimo ni Manases.
Mga 12 anyos pa lang si Manases sang mapatay ang iya amay. Makapasubo nga “ginhimo [ni Manases] ang malaut sa itololok sang GINOO.” (Bersikulo 1, 2) Naimpluwensiahan bala sia sang mga manuglaygay nga nagabalewala sang matuod nga pagsimba? Wala sing ginsiling ang Biblia. Pero mabasa nga grabe sia kapintas kag nagsimba sia sa iban nga dios. Nagpatindog sia sing mga altar para sa butig nga mga dios kag naghimo sing espiritismo. Ginhalad man niya ang iya mga anak kag ginbutangan niya sing imahen ang templo ni Jehova sa Jerusalem. Wala gid sia namati sa sulitsulit nga paandam ni Jehova, ang Dios nga naghimo sing milagro para matawo sia.—Bersikulo 3-10.
Sang ulihi, gintugutan ni Jehova nga mabihag si Manases nga nakadenahan pakadto sa Babilonia. Samtang didto sia, ginbinagbinag ni Manases ang iya ginpanghimo. Narealisar niya ayhan nga wala gid nakabulig sa iya ang wala sing kabuhi nga mga imahen? Nadumduman niya ayhan ang mga gintudlo sa iya sang iya amay? Ano man ang rason, nagbag-o si Manases. Aton mabasa: “Nagpakilooy sia sa GINOO nga iya Dios kag nagpaubus sang iya kaugalingon sing daku . . . Nagpangamuyo sia sa iya.” (Bersikulo 12, 13) Pero, mapatawad pa bala sang Dios ang tawo nga grabe ang mga sala?
Natandog gid si Jehova sang sinsero nga paghinulsol ni Manases. Ginpamatian Niya ang iya pakitluoy “kag ginpabalik sia sa Jerusalem sa iya ginharian.” (Bersikulo 13) Para pamatud-an ang iya paghinulsol, ginkay-o ni Manases ang iya mga sala. Gindula niya ang pagsimba sa mga imahen sa iya ginharian kag ginsugo ang katawhan nga ‘mag-alagad sa GINOO.’—Bersikulo 15-17.
Kon nagabatyag ka nga daw indi ka na gid mapatawad sang Dios, dumduma ang halimbawa ni Manases. Ginpasulat ini sang Dios sa iya Pulong. (Roma 15:4) Gusto gid ni Jehova nga mabal-an naton nga sia “handa sa pagpatawad.” (Salmo 86:5) Wala niya ginatan-aw ang sala kundi ang tagipusuon sang nakasala. Ang nakasala nga nagahinulsol, nagapangamuyo, nagabag-o, kag nagatinguha nga himuon ang husto ‘makapakilooy sa GINOO’ pareho sa ginhimo ni Manases.—Isaias 1:18; 55:6, 7.
Bahin sang Biblia nga mahimo basahon sa Enero:
