Ang Biblia Nagapabag-o sang Kabuhi

NGAA ginbalikan sang isa ka pamatan-on nga babayi ang iya namat-an nga relihioso nga mga prinsipio? Basaha ang iya ginsiling.

“May Katuyuan na ang Akon Kabuhi.”—LISA ANDRÉ

NATAWO: 1986

PUNGSOD: LUXEMBOURG

KABUHI SANG UNA: REBELDE NGA BATA

ANG AKON NAGLIGAD: Nagdaku ako sa Bertrange, isa ka matinlo, matawhay, kag mainuswagon nga banwa nga malapit sa siudad sang Luxembourg. Lima kami ka mag-ulutod kag ako ang kamanghuran. Mga Saksi ni Jehova ang akon mga ginikanan kag gintinguhaan nila nga ipatudok sa amon nga mag-ulutod ang Cristiano nga mga kinaiya.

Sang tin-edyer na ako, ginduhaduhaan ko ang panudlo sang mga Saksi ni Jehova. Sang primero, ginbalewala ko lang ini, pero amat-amat nga nagluya ang akon pagtuo. Ginhimo sang akon mga ginikanan ang tanan para giyahan ako sa husto nga direksion, pero wala ko ginbaton ang ila bulig. Wala sila kahibalo nga nagaupod ako sa mga pamatan-on nga wala nagarespeto sa awtoridad. Gusto ko maeksperiensiahan ang ila kahilwayan. Naga-party kami pirme, naga-sex, nagadroga, kag nagapahubog. Nanamian gid ako sadto makig-upod sa sini nga mga tawo nga makapagusto sa ila kabuhi.

Pero ang matuod, indi ako malipayon. Wala sing katuyuan ang akon kabuhi kon kaupod ko sila. Daw wala sila sing labot sa mga nagakatabo sa palibot. Pero ako nabalaka gid sa lapnag nga inhustisya sa kalibutan. Samtang nagaligad ang tion, labi pa gid ako nga nasubuan.

KON PAANO GINBAG-O SANG BIBLIA ANG AKON KABUHI Isa ka adlaw, sang 17 anyos ako, grabe gid ang akon depresyon. Natalupangdan ini ni Nanay kag ginsilingan niya ako nga tun-an liwat ang Biblia. Ginpalig-on niya ako nga usisaon ang ginatudlo sini kag magdesisyon kon bala sundon ko ini. Ang amon paghambalanay nagbulig sa akon nga magbag-o. Nagpasugot ako nga magpa-Bible study sa akon magulang nga babayi nga si Caroline kag sa iya bana nga si Akif. Si Akif wala nagdaku sa Saksi nga pamilya, pero nangin Saksi sia sang ulihi. Gani, wala ako natahap magpabutyag sa iya, kag nakabulig gid ini sa akon.

Nahibaluan ko nga ang akon pagkabuhi indi nagakaigo para sa isa ka Saksi. Pero para sa  akon, pagusto lang ako kon ano ang himuon ko sa akon kabuhi. Sang nagtuon ako sa Biblia, narealisar ko nga ang akon ginahimo makaapektar kay Jehova. (Salmo 78:40, 41; Hulubaton 27:11) Naintiendihan ko man nga makaapektar ini sa iban.

Samtang padayon ko nga ginausisa ang Biblia, nakita ko ang makapakumbinsi nga mga pamatuod nga Pulong gid ini sang Dios. Halimbawa, natun-an ko ang madamo nga tagna sa Biblia nga sibu gid nga natuman. Bangod sini nga ihibalo, nadula ang mga pagpangduhaduha ko sadto.

Mga isa ka tuig sugod sang gintun-an ko ang Biblia, ginbisitahan namon sang akon mga ginikanan ang akon magulang nga lalaki nga nagaboluntaryo sa sanga talatapan sang mga Saksi ni Jehova sa Germany. Natandog ako sang nakita ko nga malipayon gid ang akon magulang. Amo yadto nga kalipay ang gusto ko! Nagdayaw man ako sa iban nga Saksi nga nagaboluntaryo didto. Lain gid sila sa indi masaligan kag mahuyugon sa kinalipay nga mga kaupdanan ko sang una. Pagkatapos sadto, nangamuyo ako sing sinsero kay Jehova kag nagpromisa nga alagaron sia. Sang 19 anyos ako, nagpabawtismo ako bilang simbulo sang akon dedikasyon kay Jehova.

MGA BENEPISYO: May katuyuan na ang akon kabuhi. Nalipay gid ako nga tudluan ang iban sa Biblia kag buligan sila nga makatuon parte kay Jehova kag sa iya mga promisa sa palaabuton. Maayo man ang epekto sini sa akon pamilya, kay wala na sila nagakabalaka kon ano ang matabo sa akon.

Ginatinguhaan ko nga indi na pagpamensaron ang kabuhi ko sang una. Ginadumdom ko pirme nga napatawad na ako ni Jehova kag palangga gid niya ako. Nagapati gid ako sa ginasiling sang Hulubaton 10:22 (NW): “Ang pagpakamaayo ni Jehova nagapamanggad sa tawo kag wala sia nagadugang sing kasakit sa sini.”

[Blurb sa pahina 12]

“Naga-party kami pirme, naga-sex, nagadroga, kag nagapahubog”

[Blurb sa pahina 13]

“Ginatinguhaan ko nga indi na pagpamensaron ang kabuhi ko sang una”