Simple nga ginpaathag sang una nga tulun-an sa Biblia nga Genesis ang ginhalinan sang uniberso: “Sa ginsuguran gintuga sang Dios ang mga langit kag ang duta.” (Genesis 1:1) Sang natuga na sang Dios ang mga tanom kag sapat, gintuga niya ang una nga mga tawo, sanday Adan kag Eva. Lain sila sa mga sapat bangod ang mga tawo may pila ka kinaiya nga pareho sa Dios, lakip ang kahilwayan sa pagpili. Gani sila ang manabat sang ila mga ginahimo. Kon sundon nila ang Dios, mahimo sila mangin bahin sa katuyuan sang Dios bilang una nga ginikanan sang mga tawo sa bilog nga kalibutan nga may paghidait kag himpit nga kabuhi sa duta sing dayon.

Pero, may isa ka anghel, ukon espiritu nga tinuga nga naghingalit sa kahigayunan nga gamiton ang tawo sa iya sakon nga handum. Gani, nangin Satanas sia, nga buot silingon “Manugpamatok.” Gingamit niya ang isa ka man-ug para limbungan si Eva paagi sa pagsiling nga mangin mas maayo ang iya kahimtangan kon wala ang paggiya sang Dios. Ginsunod nanday Adan kag Eva si Satanas, amo nga nadula ang ila maayo nga kaangtanan sa ila Manughimo. Bangod sang ila sala nga pagpili, nadula sang aton una nga ginikanan ang kabuhi nga wala sing katapusan kag ginpapanubli nila sa aton ang sala, pagkadihimpit, kag ang indi malikawan nga kamatayon.

Ginpahayag dayon sang Dios ang iya intension nga kay-uhon ining masubo nga kahimtangan kag ginhatagan ang kaliwatan ni Adan sing paagi para makatigayon sing kabuhi nga wala katapusan. Gintagna sang Dios nga ang isa ka “binhi,” isa ka pinasahi nga indibiduwal, amo ang magalaglag kay Satanas. Dulaon man niya ang tanan nga halit nga ginhimo nanday Satanas, Adan, kag Eva. (Genesis 3:15, New World Translation of the Holy Scriptures with References, NW) Sin-o ini nga “binhi”? Mahibaluan ini sa ulihi.

Padayon nga gintinguhaan ni Satanas nga punggan ang maayo nga katuyuan sang Dios. Nagdamo pa gid ang kalautan. Determinado ang Dios nga laglagon ang mga malaut paagi sa anaw. Ginsugo niya ang matarong nga si Noe nga magtukod sang arka, isa ka daku nga kahon, agod maluwas sila sang iya pamilya, lakip ang mga sapat nga ginsugo sa iya nga pasudlon sa sini.

Isa ka tuig matapos nga magsugod ang Anaw, naggua si Noe kag ang iya pamilya sa isa ka natinluan nga duta. Pero wala pa mag-abot ang “binhi.”

—Base sa Genesis, kapitulo 1-11; Judas 6, 14, 15; Bugna 12:9.