Si Smita, * 35 anyos nga babayi sa Dhaka, Bangladesh, kilala nga mahigugmaon kag matinatapon. Mapisan sia kag malipayon nga asawa nga luyag magbulig sa iban nga mahibaluan ang parte sa Dios. Nakibot gid ang iya pamilya kag mga abyan sang hinali lang nga nagmasakit sia kag wala pa gani nasemanahan napatay sia!

Si James kag ang iya asawa, nga mga treintahon, may maayo man nga reputasyon pareho kay Smita. Isa ka bes sang tigpamulak, namasyar sila sa ila mga abyan sa West Coast sa Estados Unidos. Wala na sila nakapauli sa New York. Nadisgrasya sila kag napatay, kag nasubuan gid ang ila mga hinigugma kag mga katrabaho.

Lapnag gid ang kalainan kag pag-antos subong. Ang inaway nagapatay sang mga sibilyan kag mga soldado. Nangin biktima sang krimen kag kasingki ang mga inosente. Bisan ano ang edad ukon kahimtangan sa kabuhi sang isa, mahimo sia maaksidente ukon magbalatian. Wala sing pili nga ginahapay sang mga kalamidad ang mga komunidad. Lapnag ang pagpasulabi kag inhustisya. Kag mahimo isa ka man sa mga biktima.

Gani, natural lang nga mamangkot:

• Ngaa nagakatabo ang malain sa maayo nga mga tawo?

• Ang Dios bala ang balasulon sa sini?

• Natabuan lang bala ang mga kalamidad, ukon hinimuan ini sang tawo?

• Karma bala ini, buot silingon, resulta sang hinimuan sang isa sang una, nga nagapaantos sa iya?

• Kon may labing gamhanan nga Dios, ngaa wala niya ginaamligan sa kahalitan ang maayo nga mga tawo?

• Madula pa ayhan ang kalainan kag pag-antos?

Para masabat ini, dapat mahangpan anay naton ang duha ka importante nga pamangkot: Ngaa nagakatabo ang malain nga mga butang, kag ano ang himuon sang Dios?