GINPAMANGKOT sang isa ka manugpanalawsaw ang 800 ka pamatan-on halin sa sobra isa ka dosena nga mga relihion kon bala ginasabat ni Jesus ang mga pangamuyo. Sobra 60 porsiento ang nagapati nga ginasabat gid niya ini. Pero ginkurisan sang isa ka pamatan-on ang ngalan nga Jesus kag gin-islan sing “Dios.”

Ano sa banta mo? Kay sin-o kita dapat mangamuyo, kay Jesus bala ukon sa Dios? * Para masabat ini, binagbinagon anay naton ang gintudlo ni Jesus sa iya mga disipulo kon paano mangamuyo.

Gintudlo kag ginpakita ni Jesus kon kay sin-o kita dapat mangamuyo.

ANG IYA PANUDLO: Sang namangkot ang isa sang mga disipulo ni Jesus, “Ginuo, tudlui kami kon paano magpangamuyo,” nagsabat si Jesus: “Kon magpangamuyo kamo, magsiling, ‘Amay.’” (Lucas 11:1, 2) Dugang pa, sa iya Sermon sa Bukid, ginpalig-on ni Jesus ang mga nagapamati nga mangamuyo. Nagsiling sia: “Mangamuyo sa imo Amay.” Ginpasalig pa niya sila: “Nahibaluan sang Dios nga inyo Amay kon ano nga mga butang ang kinahanglan ninyo antes pa kamo mangayo sa iya.” (Mateo 6:6, 8) Sa ulihi niya nga gab-i subong tawo, nagsiling si Jesus sa iya mga disipulo: “Kon magpangayo kamo sa Amay sang bisan ano nga butang sa akon ngalan ihatag niya ini sa inyo.” (Juan 16:23) Gani gintudluan niya kita nga magpangamuyo sa iya Amay nga Amay man naton, nga amo si Jehova nga Dios.—Juan 20:17.

ANG IYA HALIMBAWA: Pareho sa ginatudlo ni Jesus sa iban, nangamuyo sia: “Nagadayaw ako sing dayag sa imo, Amay, Ginuo sang langit kag duta.” (Lucas 10:21) Sa isa pa ka higayon, “si Jesus nagtangla kag nagsiling: ‘Amay, nagapasalamat ako sa imo nga ginpamatian mo ako.’” (Juan 11:41) Kag sang nagatagumatayon sia, nangamuyo sia: “Amay, sa imo mga kamot ginatugyan ko ang akon espiritu.” (Lucas 23:46) Sa pagpangamuyo sa iya Amay sa langit—ang “Ginuo sang langit kag duta”—naghatag si Jesus sing halimbawa nga dapat naton sundon. (Mateo 11:25; 26:41, 42; 1 Juan 2:6) Amo bala sina ang paghangop sang mga disipulo ni Jesus sang una sa iya instruksion?

Pagligad sang pila ka semana sang nakabalik na si Jesus sa langit, ginpigos kag ginpahog sang mga manugpamatok ang iya mga disipulo. (Binuhatan 4:18) Pat-od gid nga nangamuyo sila, pero kay sin-o? “Nahiusa sila nga nagpangamuyo sa Dios,” nga padayon sila nga buligan “paagi sa ngalan sang [iya] balaan nga alagad nga si Jesus.” (Binuhatan 4:24, 30) Ginsunod gid nila ang halimbawa ni Jesus. Nangamuyo sila sa Dios, indi kay Jesus.

Pagligad sang pila ka tuig, ginlaragway ni apostol Pablo kon paano sila nangamuyo sang iya mga kaupod. Nagsulat sia sa iya mga masigka-Cristiano: “Nagapasalamat kami pirme sa Dios nga Amay sang aton Ginuong Jesucristo kon nagapangamuyo kami tungod sa inyo.” (Colosas 1:3) Nagsulat man si Pablo sa iya mga masigkatumuluo tuhoy sa ‘pagpasalamat pirme sa aton Dios kag Amay sa ngalan sang aton Ginuong Jesucristo tungod sa tanan nga butang.’ (Efeso 5:20) Sa sini nga ginsiling ni Pablo, makita  naton nga ginpalig-on niya ang iban nga magpangamuyo sa iya “Dios kag Amay . . . sa tanan nga butang”—pero paagi sa ngalan ni Jesus.—Colosas 3:17.

Pareho sa mga Cristiano sadto, mapakita naton ang aton gugma kay Jesus paagi sa pagsunod sang iya laygay kon paano kita mangamuyo. (Juan 14:15) Samtang nagapangamuyo kita sa aton langitnon nga Amay, kag sa iya lamang, labi pa nga maapresyar naton ang ginasiling sang Salmo 116:1, 2: “Ginahigugma ko ang GINOO, bangud nga nagapamati sia sang akon tingug . . . magapanawag ako sa iya tubtub nga nagakabuhi ako.” *