Daw indi bala mapatihan nga mabuhi liwat ang mga patay? Nagapati sa sini si apostol Pablo. Gingiyahan sia sang Dios sa pagsulat: “Kon sa sini lang nga kabuhi kita nagalaum sa Cristo, mas makaluluoy kita sangsa kay bisan sin-o. Apang karon ginbanhaw na ang Cristo, ang una nga bunga sa mga nagtulog sa kamatayon.” (1 Corinto 15:19, 20) Kumbinsido si Pablo nga matuod ang pagkabanhaw. Gingarantiyahan ini sang pagkabanhaw ni Jesus mismo. * (Binuhatan 17:31) Amo ina ang rason kon ngaa gintawag ni Pablo si Jesus nga “una nga bunga”—sia ang una nga ginbanhaw nga nakatigayon sing kabuhi nga wala sing katapusan. Kon si Jesus ang una, buot silingon may iban pa nga banhawon.

Ari ang isa pa ka rason kon ngaa mapatihan mo ang paglaum nga pagkabanhaw. Si Jehova amo ang Dios sang kamatuoran. Ang “Dios . . . indi makabutig.” (Tito 1:2) Si Jehova wala gid nagabutig, kag indi gid sia magbutig. Ihatag bala niya ang paglaum nga pagkabanhaw, kag ipakita nga masarangan niya ini himuon, kag dayon indi niya ini pagtumanon? Imposible gid ina!

Ngaa ginsaad ni Jehova ang palaabuton nga pagkabanhaw? Bangod sang iya gugma. “Kon ang tawo mapatay, mabuhi pa bala sia liwat?” pamangkot ni Job. “Magapanawag ka, kag magasabat ako. Ginahandum mo gid nga makita ang imo binuhatan.” (Job 14:14, 15) Kumbinsido gid si Job nga ang iya mahigugmaon kag langitnon nga Amay magahandum sa pagbanhaw sa iya. Nagbag-o bala ang Dios? “Ako si Jehova; wala ako nagabag-o.” (Malaquias 3:6) Ginahandum gihapon sang Dios nga ang mga patay mabanhaw nga mapagros ang panglawas kag malipayon. Amo gid ini ang handum sang mahigugmaon nga ginikanan nga  namatyan sing bata. Ang kinatuhayan lang kay may gahom ang Dios sa paghimo sang iya mga handum.—Salmo 135:6.

Hatagan ni Jehova sing gahom ang iya Anak sa paghatag sing indi matupungan nga kalipay sa mga nagalalaw sa pagkapatay sang ila mga hinigugma. Kag ano ang ginbatyag ni Jesus tuhoy sa pagkabanhaw? Antes ginbanhaw si Lazaro, nakita ni Jesus ang kasubo sang mga utod kag mga abyan ni Lazaro, kag ‘nagtulo man ang iya luha.’ (Juan 11:35) Isa ka bes, nasugata ni Jesus ang balo sa Nain, nga napatyan sang bugtong nga anak. “Naluoy [si Jesus] sa iya, kag nagsiling sia sa iya: ‘Indi ka na maghibi.’” Ginbanhaw ni Jesus ang iya anak. (Lucas 7:13) Nabatyagan gid ni Jesus ang kasubo bangod sa kamatayon. Malipay gid sia kon himuon niya ang kasubo nga mangin kalipay sa bilog nga kalibutan!

Naglalaw ka na bala? Mahimo nga pamatyag mo ang kamatayon isa ka problema nga wala sing solusyon. Pero may solusyon ini—ang pagkabanhaw nga himuon sang Dios paagi sa iya Anak. Dumduma nga gusto sang Dios nga makita mo ina nga solusyon. Gusto niya nga didto ka para hakson mo liwat ang imo mga hinigugma. Hunahunaa nga ululupod kamo nga nagaplano para sa wala sing katapusan, kag indi na gid kamo magbulagay!

Si Lionel, nga ginsambit kaina, nagsiling: “Sang ulihi natun-an ko ang parte sa pagkabanhaw. Sang primero, daw indi ako magpati, kag wala ako sing salig sa tawo nga nagsugid sini sa akon. Pero gintan-aw ko ini sa Biblia kag nasapwan ko nga matuod ini! Nalangkag na gid ako nga makita liwat si Lolo.”

Gusto mo bala makahibalo sing dugang pa? Malipay ang mga Saksi ni Jehova nga ipakita sa imo Biblia kon ngaa kumbinsido sila sa palaabuton nga pagkabanhaw. *