Ang mag-abyan nagaistoryahanay agod mangin suod sila. Sing kaanggid, ginaagda kita sang Dios nga makighambal sa iya, kag nagahatag ini sing kahigayunan nga mangin abyan niya. Nagsiling sia: “Magapanawag kamo sa akon kag magadangop kamo kag magapangamuyo sa akon, kag magapamati ako sa inyo.” (Jeremias 29:12) Samtang nagapakighambal ka sa Dios, magasuod ka sa iya, kag magasuod sia sa imo. (Santiago 4:8) Ang Biblia nagapasalig sa aton: “Si Jehova malapit sa tanan nga nagapanawag sa iya.” (Salmo 145:18) Kon pirme kita nagapangamuyo sa Dios, mas nagasuod kita sa iya.

Nagsiling si Jesus: “Sin-o sa inyo ang magahatag sing bato sa iya anak kon magpangayo sia sing tinapay? Ukon magahatag sing man-ug kon magpangayo sia sing isda? Gani, kon kamo . . . makahibalo maghatag sing maayo nga regalo sa inyo mga anak, daw ano pa gid ang inyo Amay sa langit! Ihatag gid niya ang maayo nga mga butang sa mga nagapangayo sa iya.” (Mateo 7:9-11) Huo, ginaagda ka sang Dios nga mangamuyo bangod ‘nagaulikid sia sa imo’ kag luyag ka niya buligan. (1 Pedro 5:7) Ginaagda ka pa gani niya nga isugid sa iya ang imo mga problema. Nagasiling ang Biblia sa aton: “Indi kamo magkabalaka sa bisan ano nga butang, kundi sa tanan nga butang paagi sa pangamuyo kag pag-ampo nga may pagpasalamat, ipahibalo sa Dios ang inyo mga pangabay.”—Filipos 4:6.

Naobserbahan sang mga eksperto sa kinaugali sang tawo nga minilyon ang nagabatyag nga kinahanglan nila mangamuyo. Lakip sa ila ang pila ka atiesta kag agnostiko. * Nagapamatuod ini nga ang tawo gintuga nga may espirituwal nga kinahanglanon. Nagsiling si Jesus: “Malipayon ang mga mahunahunaon sa ila espirituwal nga kinahanglanon.” (Mateo 5:3) Ang isa ka paagi agod mapun-an ina nga kinahanglanon amo ang regular nga pagpakighambal sa Dios.

Kon batunon naton ang pangagda sang Dios nga mangamuyo sa iya, ano nga mga benepisyo ang mapaabot naton?