•   “Nagreport ang China nga sa sini nga tuig, naagyan nila ang pinakamainit kag ang ikatlo nga pinakamalawig nga tingadlaw sa ila kasaysayan.”—The Guardian, Septiembre 7, 2022.

•   “Ikalima na ini nga tuig nga ginaantos sang pila ka lugar sa Africa ang grabe nga tigpalamangag.”—UN News, Agosto 26, 2022.

•   “Sobra katunga sa mga pungsod sa Europe ang posible makaeksperiensia sang tigpalamangag kag mahimo amo ini ang pinakagrabe nga tigpalamangag sa sulod sang 500 ka tuig.”—BBC News, Agosto 23, 2022.

 Madamo nga mga eksperto ang nagapati nga ini nga mga tigpalamangag padayon nga magalala. May paglaum pa bala nga mag-ayo ang sitwasyon sa palaabuton? Ano ang ginasiling sang Biblia?

 Ang Biblia nagtagna parte sa aton panahon subong:

•   “Sa nagkalainlain nga lugar may kakulang sa pagkaon.”—Lucas 21:11.

 Sa masami, ang tigpalamangag nagaresulta sa kakulang sa pagkaon. Ini nga kakulang sa pagkaon, kag ang pag-antos kag ang kamatayon nga epekto sini, katumanan sang tagna sa Biblia.—Bugna 6:6, 8.

 Ginasugid sang Biblia ang panguna nga rason kon ngaa nagagrabe pa gid ang tigpalamangag. Nagasiling ini:

•   “Wala sing ikasarang ang tawo sa pagtuytoy sang iya tikang.”—Jeremias 10:23.

 Buot silingon indi gid masarangan sang mga tawo nga ‘tuytuyan ang ila tikang,’ ukon gamhan ang ila kaugalingon. Ang ila sala nga mga desisyon amo sa masami ang rason kon ngaa may tigpalamangag kag may kakulang sa tubig.

•   Madamo nga mga scientist ang nagapati nga ang ginahimo sang mga tawo amo mismo ang ginabangdan sang global warming, nga nagaresulta sa grabe nga tigpalamangag sa bilog nga kalibutan.

•   Ang sakon nga mga tawo kag ang mga tawo nga nagahimo sang mga kasuguan nga wala ginapamensar ang palaabuton, amo ang ginabangdan sang pagkaubos sang kagulangan, polusyon, kag pagkaubos sang duna nga manggad sang duta bangod sa indi maalamon nga paggamit sini. Bilang resulta, mahimo man nga maghubas ang mga ginahalinan sang suplay sang tubig.

 Pero ang Biblia nagahatag sang paglaum.

 Ang Biblia nagpromisa nga solbaron sang Dios ang krisis sa tubig. Paano?

1.  1. Ang Dios ‘magalaglag sa mga nagalaglag sang duta.’ (Bugna 11:18) Dulaon niya ang ginabangdan sang kakulang sa tubig. Nalakip sa sini ang malain kag sakon nga mga tawo nga nagahalit sa aton palibot.—2 Timoteo 3:1, 2.

2.  2. “Ang kigas nga duta mangin punong sang mga tabun-ak.” (Isaias 35:1, 6, 7) Kay-uhon sang Dios ang mga halit nga resulta sang tigpalamangag kag himuon niya ang duta nga isa ka paraiso nga may bastante nga tubig.

3.  3. “Ginaatipan mo ang duta, ginahimo mo ini nga mangin mapatubason kag matambok.” (Salmo 65:9) Pakamaayuhon gid sang Dios ang duta kag mangin bugana ukon madamo ang pagkaon kag may matinlo nga tubig para sa tanan.