Madamo nga tawo sa bilog nga kalibutan ang nagabatyag sing kasubo kag pamatyag nila wala sila sing suod nga mga abyan. Ang pila ka doktor nagapati nga ang pagbulig sa iban isa ka paagi para madula ang kasubo.

•   “Ang pagbulig sa iban nga nagakinahanglan nagahatag sang kahulugan sa aton kabuhi kag makabulig ini nga mabatuan ang pagbatyag nga nagaisahanon.”—U.S. National Institutes of Health.

 Ang Biblia nagahatag sang praktikal nga laygay kon ano ang aton himuon para buligan ang iban. Kon sundon naton ang ginasiling sini, makabulig ini sa aton nga mabatuan ang pagbatyag sang kasubo.

 Mangin maalwan. Tinguhai nga mag-upod sa iban, ilabi na sa personal. Maghatag. Kon himuon mo ini, maapresyar nila ang imo kaayo kag magaresulta ini sa inyo pag-abyanay.

•   Prinsipio sa Biblia: “Himua nga kinabatasan ang paghatag sa iban, kag sila magahatag sa inyo.”—Lucas 6:38.

 Gamita ang imo tion sa pagbulig sa iban. Mangita sang paagi nga mabuligan ang mga tawo nga nabudlayan. Pareho sang pagpamati sa ila ukon pagbulig sa praktikal nga mga paagi. Kon himuon mo ini, magahaganhagan ang ila ginabatyag.

•   Prinsipio sa Biblia: “Ang matuod nga abyan nagahigugma sa tanan nga tion.”—Hulubaton 17:17.

 Para sa dugang nga impormasyon kon paano mangin maayo ang relasyon sa iban, basaha ang artikulo nga “Relasyon sa Pamilya kag mga Abyan.”