Dapat Pa Bala Sundon ang mga Kasuguan sang Biblia Parte sa Insakto kag Sala?
Madamo nga tawo ang nagapati nga indi na maaplikar sa aton tion subong ang mga kasuguan sang Dios parte sa sex kag pag-asawahay. Amo man sini ang ginapatihan bisan sang iban nga nagapangangkon nga mga Cristiano. Ginbag-o pa gani sang iban nga mga simbahan ang ila mga panudlo parte sa kon ano ang insakto kag sala para pasundan ang pagpati sang mga tawo. Dapat pa bala sundon ang mga kasuguan sang Biblia parte sa insakto kag sala? Huo. Ipaathag sa sini nga artikulo kon ngaa dapat naton ini sundon.
Kinahanglan sang mga tawo ang mga kasuguan sang Dios parte sa insakto kag sala
Kinahanglan gid sang mga tawo nga magsalig sa Manunuga kay amo sina ang pagkadesinyo sa aton. Ang Biblia nagasiling: “Wala sing ikasarang ang tawo sa pagtuytoy sang iya tikang.” (Jeremias 10:23) Gintuga kita ni Jehova a nga Dios nga may ikasarang sa pagdesisyon. Pero, wala niya dira ginlakip ang awtoridad nga magdesisyon para sa aton kaugalingon kon ano ang insakto kag sala. Gusto niya nga magsalig kita sa iya.—Hulubaton 3:5.
Mabasa naton sa Biblia ang mga kasuguan sang Dios parte sa moral. Ari ang duha ka rason kon ngaa importante gid ini nga mga kasuguan:
Gintuga kita sang Dios. (Salmo 100:3) Si Jehova nga Dios ang aton Manunuga. Gani, kabalo gid sia kon ano ang aton himuon para mangin mapagros kita kag kon ano ang kinahanglan naton para mangin malipayon kita, may kalinong sa hunahuna, kag mangin positibo. Kabalo man sia nga indi gid maayo ang mangin resulta kon indi naton pagsundon ang iya mga kasuguan. (Galacia 6:7) Isa pa, gusto ni Jehova ang pinakamaayo nga kabuhi para sa aton. Amo kon ngaa nga ginasugid sang Biblia nga ang Dios amo ang Isa nga “nagatudlo sa imo para sa imo kaayuhan, ang nagatuytoy sa imo sa dalanon nga dapat mo laktan.”—Isaias 48:17.
Sa masami, indi gid maayo ang resulta kon ang aton lang gusto ang aton sundon. Para sa madamo nga tawo, insakto ukon sala ang ila ginahimo depende sa kon ano ang ginasiling sang ila tagipusuon ukon kon ano ang ila mga gusto kag mga handum. Pero, ang Biblia nagasiling nga “ang tagipusuon madaya labaw sa tanan nga butang kag makatalagam.” (Jeremias 17:9) Gani, kon ang aton mga gusto ukon mga handum wala nabase sa kaalam sang Dios, posible gid nga hinulsulan naton sa ulihi ang aton desisyon.—Hulubaton 28:26; Manugwali 10:2.
Nagakaigo bala nga wala na ginatudlo sang mga lider sang relihion ang ginasiling sang Biblia parte sa insakto kag sala?
Indi! Ginatudlo sang Biblia ang kamatuoran parte sa Dios kag kon ano ang gusto niya nga himuon naton. (1 Corinto 6:9-11; Galacia 5:19-23) Gusto niya nga mabal-an sang mga tawo ini nga kamatuoran. (1 Timoteo 2:3, 4) Gani, dapat itudlo sang tanan nga ministro nga mga Cristiano kon ano ang ginasiling sang Pulong sang Dios.—Tito 1:7-9.
Indi gusto sang madamo nga tawo nga sundon ang mga kasuguan sang Biblia parte sa insakto kag sala. Gani, nagapalapit sila sa mga manunudlo sang relihion nga “nagahambal sang mga butang nga luyag nila mabatian.” (2 Timoteo 4:3, footnote) Pero, ginapaandaman kita sang Pulong sang Dios: “Makaluluoy ang mga nagasiling nga ang maayo malain kag ang malain maayo.” (Isaias 5:20) Maathag nga silutan sang Dios ang mga lider sang relihion nga wala nagtudlo sa mga tawo kon ano gid ang ginasiling sang Dios parte sa insakto kag sala.
Ginapalig-on bala sang mga kasuguan sang Biblia ang mga tawo nga mangin panatiko?
Wala. Ginasunod sang mga tawo nga nagatuman sa Dios ang halimbawa kag panudlo ni Jesucristo. Gintudluan niya ang iya mga sumulunod nga indi paghukman ang iban. Sa baylo, dapat nila higugmaon kag respetuhon ang tanan nga tawo.—Mateo 5:43, 44; 7:1.
Gintudluan ni Jesus ang iya mga sumulunod nga sundon ang mga kasuguan sang Dios sa moral. Pero, nagsiling man si Jesus nga may mga tawo nga mahimo lain ang pagpati kag indi magsunod sa sini. (Mateo 10:14) Wala man niya ginhatagan sing awtoridad ang iya mga sumulunod nga gamiton ang pulitika ukon ang iban pa nga paagi para piliton ang iban nga sundon ang mga kasuguan sang Dios.—Juan 17:14, 16; 18:36.
Ano ang mga benepisyo kon sundon sang isa ka tawo ang mga kasuguan sa Biblia?
Kon sundon sang isa ka tawo ang mga kasuguan sang Dios parte sa insakto kag sala, madamo sia sing mabaton nga benepisyo subong kag sa palaabuton. (Salmo 19:8, 11) Ari ang pila ka benepisyo:
a Jehova ang ngalan sang Dios suno sa Biblia.—Salmo 83:18.
Basi Manamian Ka Man
MAGMATA!
Importante ang Maayo nga Pamatasan
Ang pagtudlo sa imo mga bata sang maayo nga pamatasan makabulig sa ila kon magdaku sila.
MAGMATA!
Talaksan sa Moral nga Makabulig Gid sa Imo
Kinaandan na nga pagtamod ang, ‘Kon sa pamatyag mo maayo, himua ini. Sunda ang imo tagipusuon.’ Maalamon bala ina nga panghunahuna? Hibalua kon ano ang mga talaksan nga ginatudlo sang Biblia nga masaligan mo gid.
MAGMATA!
Sala Bala ang Pag-sex Antes sang Kasal?
Hibalua ang ginasiling sang Biblia parte sa pag-sex antes sang kasal kag sang iban pa nga porma sang seksuwal nga buluhaton.
IMPORTANTE NGA MGA PANUDLO SANG BIBLIA
Sin-o ang Awtor sang Biblia?
Kon ginsulat ini sang mga tawo, eksakto bala nga tawgon ini nga Pulong sang Dios? Kay sin-o panghunahuna ang ara sa Biblia?
