Madula Pa Bala ang Terorismo?
Pagkatapos sang pag-atake sang mga terorista, mahimo nagapamangkot ka dayon: ‘Nagaulikid gid bala ang Dios sa mga tawo? Ngaa nagakatabo ini? Madula pa bala ang terorismo? a Paano ko mabatuan ang kahadlok nga ginabatyag ko?’ May makapaumpaw nga sabat sa sini ang Biblia kag sigurado nga malipay ka gid sa imo mabal-an.
Ano ang ginabatyag sang Dios parte sa terorismo?
Ginakaugtan gid sang Dios ang kapintas kag terorismo. (Salmo 11:5; Hulubaton 6:16, 17) Kag ginsaway ni Jesus, nga amo ang representante sang Dios, ang iya mga disipulo sang nagpakita sila sing kapintas. (Mateo 26:50-52) Ang iban nga naghimo sing kapintas nagsiling nga ginhimo nila ini para sa ngalan sang Dios, pero wala gid sila ginhatagan sang Dios sing kinamatarong sa paghimo sini. Ang matuod, wala niya gani ginapamatian ang ila mga pangamuyo.—Isaias 1:15.
Nagaulikid ang Dios sa tanan nga nagaantos, pati na sa mga biktima sang pag-atake sang mga terorista. (Salmo 31:7; 1 Pedro 5:7) Ginasugid man sang Biblia nga may himuon ang Dios para dulaon ang kapintas.—Isaias 60:18.
Ang rason sang terorismo
Ginasugid sang Biblia kon ano gid ang rason sang terorismo: “Ginagamhan sang tawo ang iya isigkatawo sa iya kahalitan.” (Manugwali 8:9) Halin pa sang una, ginagamit na sang mga tawo nga may poder ukon posisyon ang terorismo para piguson ang iban. Bangod sini, nagabato man ang mga ginapigos paagi sa terorismo.—Manugwali 7:7.
Madula ang terorismo
Nagpromisa ang Dios nga dulaon niya ang kahadlok kag ang kapintas kag siguraduhon niya nga may paghidait na sa duta. (Isaias 32:18; Miqueas 4:3, 4) Ari ang iya himuon:
Dulaon niya ang rason sang terorismo. Buslan sang Dios ang gobierno sang mga tawo sang iya gobierno kag magagahom ini sa bilog nga kalibutan. Ang Manuggahom sini nga gobierno amo si Jesucristo. Tratuhon niya ang tanan nga tawo sing patas kag siguraduhon niya nga wala na sing magapamigos kag magapamintas. (Salmo 72:2, 14) Sa sina nga tion, wala na sing terorismo. Ang mga tawo ‘mangin malipayon na sa bugana nga paghidait.’—Salmo 37:10, 11.
Dulaon niya ang tanan nga epekto sang terorismo. Bangod sa terorismo, madamo nga tawo ang nag-antos kay ang iban sa ila nahalitan sa pisikal ukon na-trauma. Pero nagpromisa ang Dios nga ayuhon niya ini tanan. (Isaias 65:17; Bugna 21:3, 4) Nagpromisa man sia nga banhawon niya ang mga patay kag magakabuhi sila sa malinong na nga duta.—Juan 5:28, 29.
Ginasugid sang Biblia ang pila ka rason kon ngaa makapati gid kita nga dali na lang ini himuon sang Dios. Pero, mahimo magpalibog ka, ‘Ngaa wala pa gindula sang Dios ang terorismo subong?’ Para masabat ina, tan-awa ang video nga Ngaa Ginapasugtan sang Dios ang Pag-antos?
a Ang “terorismo” amo ang pagpamintas ukon pagpahog sa mga tawo para bag-uhon ang sistema sa pulitika, sa relihion, ukon sa komunidad. Masami ini nga ginahimo sa mga sibilyan. Pero, mahimo nga sarisari ang opinyon sang mga tawo sa kon ano gid ang terorismo.
Basi Manamian Ka Man
IBAN PA NGA TOPIKO
Kon Paano Kontrolon ang Kabalaka
Ano nga praktikal nga mga tip kag mga teksto sa Biblia ang makabulig sa imo nga mabatuan ang indi kinahanglanon nga pagkabalaka?
IBAN PA NGA TOPIKO
Makalaum Kita nga Mangin Maayo ang Aton Sitwasyon sa Palaabuton
Ngaa ang mga promisa sa Biblia lain gid sa mga promisa kag mga prediksion sang mga tawo?
SABAT SA MGA PAMANGKOT SA BIBLIA
Ano ang Ginharian sang Dios?
Binagbinaga kon ngaa ang gobierno sang Dios labaw sa tanan nga gobierno.
ANG LALANTAWAN
Ano ang Himuon sang Ginharian sang Dios?
Kabalo si Jesus nga ang Ginharian sang Dios amo lamang ang gobierno nga makasolbar sang mga problema sa duta. Ano na ang nahimo sang Ginharian nga nangin rason para saligan naton ini?
IBAN PA NGA TOPIKO
Masabat Bala ang Pagpangayo sang Hustisya?
Ginapakita sang Biblia nga ang matuod nga hustisya ukon katarungan halin sa Dios, kay importante sa iya ang kabuhi sang tanan nga tawo.
IMPORTANTE NGA MGA PANUDLO SANG BIBLIA
Ngaa Ginapasugtan sang Dios ang Pag-antos?
Madamo ang nagapamangkot kon ngaa nagadumtanay kag nagaantos ang mga tawo sa kalibutan. Ginasugid sang Biblia ang makalilipay kag makapaumpaw nga sabat.
