“Lapnag sa bug-os nga kalibutan ang pagpamintas sa mga babayi, daw epidemia ini nga dapat aksionan gilayon,” siling sang World Health Organization. Ginbanta sina nga organisasyon nga halos 30 porsiento “sang tanan nga babayi nga may bana ukon ginapuyopuyo nakaagi sing pisikal kag/ukon seksuwal nga pagpamintas” sang ila bana ukon ginapuyopuyo. Sining karon lang, ginbanta sang UN nga 137 ka babayi ang ginapatay kada adlaw sa bug-os nga kalibutan sang ila bana ukon ginapuyopuyo ukon sang iban nga miembro sang ila pamilya. a

Mapakita sang statistic ang kalala sini nga problema, pero indi sini malaragway ang emosyonal kag pisikal nga pag-antos sang kada biktima.

Biktima ka bala sang pagpamintas sa puluy-an? Ukon may kilala ka bala nga amo sina? Kon huo, binagbinaga ang base sa Biblia nga makabulig.

 Kon biktima ka, indi ka ang may sala

 Makapangayo ka sing bulig

 May mabulig sa imo

 Matapos ang pagpamintas sa puluy-an

 Kon paano ka makabulig sa biktima

Kon ano ang ginasiling sang Biblia: “Ang kada isa sa aton manabat sa Dios.”—Roma 14:12.

Dumduma ini: Ang nagapamintas amo ang may salabton sa iya ginahimo.

Kon ikaw ang ginabasol sang nagapamintas sa imo, nagsala sia. Ang mga asawa dapat ginahigugma, wala ginapintasan.—Colosas 3:19.

Kon kaisa, impluwensiado ang nagapamintas sang iya personalidad, ginhalinan nga pamilya, ukon pag-abuso sa makahulubog nga ilimnon. Pero bisan pa, sia gihapon ang may salabton sa Dios sa iya ginahimo sa imo, kag sia lang gid ang makabag-o sini.

Kon ano ang ginasiling sang Biblia: “Magamadinalag-on ini [ang mga plano] kon may madamo nga manuglaygay.”—Hulubaton 15:22.

Dumduma ini: Mabuligan ka sang iban kon pamatyag mo nabutang ka sa katalagman ukon indi ka kahibalo sang imo himuon.

Ngaa kinahanglan mo ang bulig sang iban? Posible nga madamo ka sang ginapensar kon nagadesisyon sa pag-atubang sini, basi nabudlayan ka kon ano ang imo pasulabihon:

• Ang imo personal nga kaayuhan

• Ang kaayuhan sang imo kabataan

• Ang imo pinansial nga ikasarang

• Ang imo gugma sa nagapamintas sa imo

• Ang imo handum nga magbag-o ang nagapamintas sa imo kag ang inyo relasyon

Normal nga magbatyag ka nga daw indi ka kabalo sang imo himuon ukon nabudlayan ka. Kay sin-o ka makapangayo sang bulig?

Ang isa ka masaligan nga abyan ukon miembro sang pamilya posible makahatag sang praktikal kag emosyonal nga bulig. Daku gid ang mabulig sa imo kon mag-istorya ka sa isa nga nagaulikid sa imo.

Ang mga hotline ukon kontak para sa mga biktima sang pagpamintas sa puluy-an posible nga makabulig sa tion sang emerhensia. Ang mga maistorya mo sa sini nga mga hotline makahatag sa imo sing giya para maproteksionan mo ang imo kaugalingon. Kon batunon sang nagapamintas nga sia ang may problema kag luyag gid niya magbag-o, mabuligan sia sang hotline sang dapat niya himuon.

May iban pa nga makabulig sa tion sang emerhensia kon kinahanglanon gid. Posible ini sila mga doktor, nars, ukon iban pa nga nakabaton sing paghanas para makabulig.

Kon ano ang ginasiling sang Biblia: “Malapit si Jehova b sa mga nagaantos; ginaluwas niya ang mga nalisdan.”—Salmo 34:18.

Dumduma ini: Nagpromisa ang Dios nga buligan ka.

Nagaulikid gid si Jehova sa imo. (1 Pedro 5:7) Nahangpan niya ang imo hunahuna kag balatyagon. Mapaumpawan ka niya paagi sa iya Pulong, ang Biblia. Luyag man niya nga mangamuyo ka sa iya. Kon mangamuyo ka, makapangayo ka sa iya sing kaalam kag kusog para atubangon ang imo sitwasyon.—Isaias 41:10.

Kon ano ang ginasiling sang Biblia: “Magapungko ang kada isa sa ila sa idalom sang ila puno sang ubas kag sa idalom sang ila kahoy nga higuera, kag wala sing magapahadlok sa ila.”—Miqueas 4:4.

Dumduma ini: Ang Biblia nagpromisa nga sa indi madugay magaluntad ang kalinong sa mga puluy-an.

Si Jehova nga Dios lang gid ang makahatag sing permanente nga solusyon sa tanan naton nga problema. Ang Biblia nagpromisa: “Pahiran niya ang tagsa ka luha sa ila mga mata, kag wala na sing kamatayon, ukon paglalaw ukon paghibi ukon kasakit pa.” (Bugna 21:4) Sa sina nga tion, indi mo na madumduman ang imo malaw-ay nga mga eksperiensia kay buslan ini sing kalipay. (Isaias 65:17) Amo ini ang malinong nga palaabuton nga ginatanyag sa imo sang Biblia.