Isa gid ka importante nga hitabo para sa aton ang 2020 nga rehiyonal nga kombension. Kay man, amo ini ang una nga tion nga ginrekord sing abanse ang kombension para matan-aw ini sang mga kauturan sa bilog nga kalibutan paagi sa Internet. Pero, sa Malawi kag Mozambique, natan-aw sang kalabanan nga kauturan ang kombension bisan pa wala sila sing Internet. Paano?

 Gin-aprobahan sang Coordinators’ kag Teaching committee sang Nagadumala nga Hubon nga i-broadcast ang kombension paagi sa TV kag radyo sa Malawi kag sa Mozambique. Ngaa kinahanglan ini himuon? Kay isa ang Malawi sa mga lugar nga puerte ka mahal sang Internet, gani diutay lang gid nga utod ang maka-access sa sini. Si William Chumbi, nga miembro sang Branch Committee sa Malawi, nagsiling: “Ang pagtan-aw sang kombension sa TV kag pagpamati sa radyo amo lang gid ang paagi para maka-attend sa kombension ang mga kauturan.” Si Luka Sibeko, nga miembro man sang Branch Committee sa Malawi, nagsiling: “Kon wala ini gin-broadcast sa TV kag sa radyo, diutay lang gid nga utod ang makabenepisyo sa sini nga kombension.” Sa Mozambique, pila lang ka katuran ang makasarang magbakal sing gadyet, gani labanlaban nga indi man sila makasarang magbayad sing Internet.

 Bangod sang COVID-19 nga pandemic, gina-broadcast na sa mga estasyon sang TV kag radyo ang mga miting sang kongregasyon. a Ginkontak sang mga kauturan ini nga mga estasyon kag nagpangabay kon bala puede dugangan ang oras sang aton programa para ma-broadcast ang kombension.

 Pero, nangin mabudlay gid ini para sa mga kauturan sa Malawi. Sa masami, isa lang gid ka oras ang ginahatag sang mga estasyon sa ila mga kostumer para ma-broadcast ang ila mga programa. Nagakabalaka ang mga estasyon kay basi matak-an ang mga magapamati kag magatan-aw kon tam-an ka lawig sang programa. Pero ginpaathag sang mga kauturan nga ang aton hilikuton nagabulig sa mga tawo. Bisan sa tion sang lockdown, padayon naton nga ginapaumpawan ang mga tawo paagi sa maayong balita halin sa Biblia. Makabulig gid ini sa mga tawo nga mangin maayo nga pumuluyo kag mangin malipayon ang ila pamilya. Sang nabatian ini sang mga estasyon, ginpasugtan nila ang pangabay sang mga kauturan nga dugangan ang oras sang aton programa.

 Sa Malawi, gin-broadcast ang kombension sa isa ka estasyon sang TV kag sa isa ka estasyon sang radyo. Ini nga mga estasyon matan-aw kag mabatian sang mga tawo sa bilog nga pungsod. Gani posible nga minilyon ka tawo ang makabenepisyo sa kombension. Sa Mozambique naman, ang kombension gin-broadcast sa isa ka estasyon sang TV kag sa 85 ka estasyon sang radyo.

 Sa sining duha ka pungsod, naggasto kita sing $28,227 b para i-broadcast ang kombension sa TV kag halos $20,000 naman para i-broadcast ini sa radyo. Ang bayad sa kada estasyon sang radyo mga $15 para sa gagmay nga estasyon asta sa $2,777 sa mga estasyon nga naga-broadcast sa bilog nga pungsod.

 Ginatinguhaan gid sang mga kauturan nga magamit sing maayo ang gin-donate nga mga pondo. Halimbawa, sa Malawi, nakakita sila sing mga estasyon nga nagpaayo sa ila, lakip ang isa ka estasyon nga naghatag sa ila sing 30 percent discount. Bangod sini, nakakinot kita sing $1,711. Sa Mozambique naman, may pila ka estasyon nga nagpaayo sa aton bangod kilala kita nga honest kag nagabayad sa insakto nga oras.

 Nagapasalamat gid ang aton mga kauturan kay natan-aw nila ukon nabatian ang kombension sa TV ukon sa radyo. Si Patrick, nga isa ka elder sa Malawi, nagsiling: “Nagapasalamat gid kami sa Nagadumala nga Hubon sa tanan nga ginhimo nila para sa amon sa sining tion sang pandemic.” Si Isaac, nga taga-Malawi man, nagsiling: “Wala kami sing gadyet, gani nagapasalamat gid kami sa sining kahimusan halin sa organisasyon ni Jehova para mapamatian namon ang kombension sa radyo. Bangod sini, nakabenepisyo gid ang amon bilog nga pamilya sa kombension. Nabatyagan gid namon nga palangga ni Jehova ang iya katawhan.”

 Ang 2020 nga kombension amo ang una nga kombension nga gintambungan sang isa ka utod sa Mozambique. Nagsiling sia: “Nalipay gid kami sa kahimusan nga matan-aw ang kombension sa TV. Nagpahanumdom ini sa akon nga si Jehova amo ang labing gamhanan nga Dios. Ang pandemic wala nakapugong sa iya nga hatagan kami sing espirituwal nga pagkaon kag iserbe ini mismo sa amon salas. Nakita ko man nga nagapalanggaanay gid ang katawhan ni Jehova. Para sa akon, amo gid ini ang matuod nga relihion.”

 Ang isa ka elder nga si Wyson, nagsiling: “Gusto ko gid pasalamatan ang matutom nga ulipon kay gin-atipan gid nila kami sa sining tion sang pandemic. Madamo gid ang nakabenepisyo sa sining kahimusan nga i-broadcast ang kombension sa radyo kag TV. Bisan madamo sa amon ang pigado sa sining bahin sang kalibutan, naka-attend kami sa kombension kag nakabenepisyo sa sini.”

 Gin-aprobahan man sang Coordinators’ kag Teaching committee nga i-broadcast ang 2021 nga rehiyonal nga kombension sa TV kag sa radyo sa pila ka lugar. Diin naghalin ang ginagasto para ma-broadcast ang kombension sa TV kag sa radyo? Sa mga donasyon sa worldwide work, nga ang kalabanan ginahatag gamit ang sarisari nga paagi sa pag-donate sa donate.mt1130.com. Salamat gid sa imo maalwan nga mga donasyon.