Pilipinas—Koleksion sang mga Piktyur 1 (Pebrero 2014 Asta Mayo 2015)
Ang mga Saksi ni Jehova nagakay-o kag nagapatindog sang mga bilding sa sanga talatapan sa Pilipinas sa Quezon City. Bangod ang mga literatura para sa Pilipinas ginaimprinta na subong sa sanga sa Japan, ang printery building sang una ginhimo na nga opisina sang mga departamento sang Computer, Local Design/Construction (LDC), Maintenance, Shipping, kag Translation. Ini nga koleksion sang mga piktyur nagapakita kon ano ang ginhimo sa anay printery kag iban pa nga bilding halin sang Pebrero 2014 asta sang Mayo 2015. Ini nga proyekto nakaiskedyul nga matapos sa Oktubre 2016.
Drowing sang kompleto na nga sanga sa Pilipinas. Ang mga bilding kag istruktura nga ginapatindog ukon ginakay-o nagalakip sang:
Bilding 4 (Residence)
Bilding 5 (Audio/Video, Service Department)
Bilding 6 (Landscaping, Vehicle Repair, Welding)
Bilding 7 (Computer, LDC, Maintenance, Shipping, Translation)
Pebrero 28, 2014—Bilding 7
Ginaputos sang temporaryo nga mga boluntaryo ang fiberglass para sa insulasyon agod indi ini mabasa. May ginasuksok sila bilang proteksion para indi magpalangatol ang ila panit.
Abril 2, 2014—Bilding 7
Ginatapos nila ang kisame sang estudyo sang Filipino Sign Language. Ang kuadrado nga mga buho sa kisame amo ang gamiton para sa HVAC, agod palareho ang buga sang aircon sa bilog nga estudyo.
Oktubre 21, 2014—ang site sa Quezon City
Pagkutkot para sa centralized system nga nagapabugnaw sang tubig. Ining bag-o nga system amo ang magasuplay sa bilog nga pasilidad sang sanga.
Disiembre 19, 2014—Overhead walkway nga nagaangot sang Bilding 1, 5, kag 7
Ang bag-o nga overhead walkway magaangot sang tanan nga dalagku nga bilding, lakip ang Bilding 1, diin nahamtang ang dining room. Makabulig gid ini ilabi na sa sobra 300 ka boluntaryo nga nagaobra sa Bilding 7.
Enero 15, 2015—Bilding 5
Ang 50 ka tonelada nga crane nga nagahakwat sang mga inug-atop. Sarisari nga kadakuon sang crane ang ginagamit kag gina-operate sang lokal nga mga kontraktor.
Enero 15, 2015—Bilding 5A (Circulation pod)
Ining duha ka andana kag 125 ka metro kuadrado nga bilding may duha ka kasilyas, may hagdanan, kag elebeytor. Bangod diri ginbutang ang mga kasilyas kag hagdanan, mas nagligwa ang Bilding 5. Diri ginbutang ang elebeytor imbes nga sa Bilding 5, gani ang gahod sini indi gid makadisturbo sa audio kag video nga mga rekording.
Enero 15, 2015—Bilding 5A (Circulation pod)
Nagbutang sing trapal ang mga nagatrabaho bilang proteksion sa sobra nga init, samtang nagatakod sila sing mga kabilya. Kon adlaw, ang init nagalab-ot sa 29 degrees Celsius kon Enero kag mga 34 degrees Celsius kon Abril.
Marso 5, 2015—Bilding 5
Ang mga boluntaryo nagadugang sing kahoy para mas mapag-on ang balayan sang atop. Sa Bilding 5, mga 800 ka bilog nga kahoy ang gingamit.
Marso 17, 2015—Bilding 5
Manomano nga nagamikskla para sa gamay nga proyekto. Lakip sa mga nagabulig sa konstruksion amo ang sobra sa 100 ka boluntaryo halin sa Australia, Canada, France, Japan, New Zealand, South Korea, Spain, Estados Unidos, kag iban pa nga pungsod.
Marso 25, 2015—Bilding 5
Nagapang-atop sang Bilding 5, diin nahamtang sang una ang Translation Department. Ginakay-o ang bilding kay diri ibutang ang Audio/Video kag Service Department.
Mayo 13, 2015—Bilding 5
Nagapang-utod sang mga metal paagi sa chop saw. Gamiton ini nga mga metal sa frame sang dingding sang mga opisina.
Basi Manamian Ka Man
PROYEKTO SA PAGTUKOD
Isa ka Libo ka Kingdom Hall kag Nagadugang Pa
Isa ka importante nga hitabo sa kasaysayan sang mga Saksi ni Jehova sa Pilipinas ang natabo bangod sa pinasahi nga programa sang pagpatindog sang mga Kingdom Hall.