“Magkasadya kamo tungod sa inyo paglaum. Batasa ninyo ang kabudlayan. Magpadayon kamo sa pagpangamuyo.”—Roma 12:12, Bag-ong Kalibutan nga Badbad.

 “Magkalipay sa inyo paglaum, magpailub sa inyo kangitngitan, magpadayon sing malig-on sa pangamuyo.”—Roma 12:12, Ang Biblia sang Philippine Bible Society.

 Sa sini nga bersikulo, ginpalig-on ni apostol Pablo ang mga Cristiano sa Roma nga himuon ang tatlo ka butang nga makabulig sa ila nga mangin matutom kon ginahingabot sila kag kon makaatubang sila sang iban pa nga mga kabudlayan.

 “Magkasadya kamo tungod sa inyo paglaum.” Ang mga Cristiano may makalilipay nga paglaum nga mabuhi sing wala katapusan, ang iban sa langit kag ang kalabanan sa paraiso sa duta. (Salmo 37:29; Juan 3:16; Bugna 14:1-4; 21:3, 4) Nalakip sa ila ginalauman amo nga sa ulihi, makita nila nga solbaron sang Ginharian sang Dios a ang tanan nga problema nga nagapaantos sa mga tawo. (Daniel 2:44; Mateo 6:10) Ang mga nagasimba sa Dios puede magkasadya bisan pa nagabatas sila sang mga kabudlayan, kay kumbinsido sila nga ang ila paglaum malig-on kag malipay ang Dios sa ila kon magbatas sila.—Mateo 5:11, 12; Roma 5:3-5.

 “Batasa ninyo ang kabudlayan.” Sa Biblia, ang Griego nga verb nga gin-translate nga “batasa” masami nagakahulugan sing “magpabilin sa baylo nga magpalagyo; magpadayon; pirme malig-on.” Ang mga sumulunod sang Cristo ‘indi bahin sang kalibutan,’ b gani kabalo sila nga hingabuton sila, kag kinahanglan nila ang pagbatas. (Juan 15:18-20; 2 Timoteo 3:12) Kon ang isa ka Cristiano matutom nga nagaalagad sa Dios bisan pa may ginabatas sia nga kabudlayan, magabakod pa gid ang iya pagtuo nga padyaan sia sang Dios sa ulihi. (Mateo 24:13) Bangod sining mabakod nga pagtuo, mabatas niya nga may pagpailob kag kalipay ang mga kabudlayan.—Colosas 1:11.

 “Magpadayon kamo sa pagpangamuyo.” Para makapabilin nga matutom sa Dios, sulitsulit nga ginapalig-on ang mga Cristiano nga pirme magpangamuyo. (Lucas 11:9; 18:1) Pirme man sila nagapagiya sa Dios kag nagasalig sa iya sa tanan nila nga ginahimo. (Colosas 4:2; 1 Tesalonica 5:17) Kumbinsido sila nga sabton sang Dios ang ila mga pangabay kay ginatuman nila ang iya mga sugo kag ginahimo nila ang ila masarangan para malipay sia. (1 Juan 3:22; 5:14) Kabalo sila nga kon pirme sila nagapangamuyo hatagan sila sang Dios sang kusog para mangin matutom sila bisan ano pa nga kabudlayan ang ila maeksperiensiahan.—Filipos 4:13.

 Ginhimo ni Pablo ini nga sulat para sa mga Cristiano nga nagaistar sa Roma sang mga 56 C.E. Sa kapitulo 12 sini nga sulat, naghatag sia sang praktikal nga laygay kon paano ipakita ang Cristiano nga mga kinaiya, kon paano makig-angot sa mga kauturan kag sa iban, kag kon paano makapabilin nga mahidaiton kon ginahingabot. (Roma 12:9-21) Tayming gid ini nga laygay sa mga Cristiano sa Roma kay wala madugay mapintas sila nga ginhingabot.

 Pila ka tuig sang ulihi, sang 64 C.E., nasunog ang siudad sang Roma. Madamo nga tawo ang nagsiling nga si Emperador Nero ang nagpasunog sini. Suno kay Tacitus, nga isa ka Romano nga historian, para indi sia ang manabat ginpasibangdan ni Nero ang mga Cristiano nga sila ang nagpangsunog. Nagresulta ini sa mapintas nga paghingabot sa mga Cristiano. Ang laygay ni Pablo kon paano batason ang paghingabot nakabulig sa ila nga atubangon ining mabudlay nga sitwasyon nga may pagtuo kag dignidad. (1 Tesalonica 5:15; 1 Pedro 3:9) Makatuon gid ang mga alagad sang Dios subong sa ila halimbawa.

 Tan-awa ining malip-ot nga video para mahibaluan mo ang sumaryo sang libro sang Roma.