Ang anticristo indi lamang isa ka indibiduwal ukon organisasyon, kay suno sa Biblia “madamo na ang anticristo.” (1 Juan 2:​18) Sa baylo, ang termino nga “anticristo,” nga naghalin sa Griego nga tinaga nga nagakahulugan “batok (ukon kabaylo) sang Cristo,” nagapatuhoy sa bisan sin-o nga nagahimo sang masunod:

•   Nagapanghiwala nga si Jesus ang Cristo (Mesias) ukon nagapanghiwala nga sia ang Anak sang Dios.​—1 Juan 2:​22.

•   Nagapamatok sa Cristo, ang Hinaplas sang Dios.​—Salmo 2:​1, 2; Lucas 11:23.

•   Nagapakunokuno nga Cristo.​—Mateo 24:24.

•   Nagahingabot sa mga sumulunod sang Cristo, tungod para kay Jesus ang ginahimo sa ila pareho lang nga ginahimo man sa iya.​—Binuhatan 9:5.

•   Nagapangangkon sing sayop subong Cristiano pero nagahimo sing malain ukon nagapakunokuno.​—Mateo 7:​22, 23; 2 Corinto 11:13.

 Indi lamang mga indibiduwal nga nagahimo sini ang ginatawag sang Biblia nga mga anticristo, kundi subong grupo ginatawag man sila nga “ang anticristo.” (2 Juan 7) Ang anticristo una nga nagtuhaw sang panahon sang mga apostoles kag aktibo gid sila halin sadto. Amo gid ini ang gintagna sang Biblia nga matabo.​—1 Juan 4:3.

•   Nagapalapnag sila sing sayop nga mga ideya parte kay Jesus. (Mateo 24:​9, 11) Halimbawa, ang mga nagatudlo sang Trinidad ukon sang doktrina nga si Jesus amo ang Labing Gamhanan nga Dios nagasumpakil sa panudlo ni Jesus, nga nagsiling: “Ang Amay labaw pa sa akon.”​—Juan 14:28.

•   Wala ginabaton sang mga anticristo ang ginsiling ni Jesus kon paano nagapanghikot ang Ginharian sang Dios. Halimbawa, may mga lider sang relihion nga nagasiling nga ang Cristo nagapanghikot paagi sa mga gobierno sang tawo. Pero sumpakil ini sa panudlo ni Jesus, nga nagsiling: “Ang akon Ginharian indi bahin sini nga kalibutan.”​—Juan 18:36.

•   Suno sa ila, si Jesus ang ila Ginuo, pero wala nila ginatuman ang iya mga sugo, lakip ang sugo nga iwali ang maayong balita sang Ginharian.​—Mateo 28:19, 20; Lucas 6:​46; Binuhatan 10:42.