Huo. Ginasugiran kita sang Biblia kon ano ang dapat naton himuon para indi na kita pagkonsiensiahon. (Salmo 32:1-5) Kon nakahimo kita sang sala kag nagahinulsol gid kita patawaron kita sang Dios kag buligan niya kita para maumpawan kita. (Salmo 86:5) Ginpakita sang Biblia nga kon kaisa maayo man kon ginakonsiensia kita, kay makabulig ini sa aton nga untatan ang malain naton nga ginahimo kag tinguhaan nga indi na ini pagsuliton. (Salmo 51:17; Hulubaton 14:9) Gani, ginalaygayan kita sang Biblia nga likawan nga basulon sing sobra ang aton kaugalingon, kag magsiling nga wala na gid kita sing paglaum ukon wala na gid kita sing pulos para sa Dios. Kon amo sini ang pagtan-aw naton sa aton kaugalingon, maapektuhan kita sang “sobra nga kasubo.”—2 Corinto 2:7, Ang Pulong sang Dios.

•  Ano ang mga rason kon ngaa ginakonsiensia kita?

•  Ano ang himuon ko kon ginakonsiensia ako?

•  Mga teksto sa Biblia parte sa pagpatawad kag kon ginakonsiensia ka

 Madamo sing posible nga rason kon ngaa ginakonsiensia kita. Mahimo nga nabatyagan naton nga nagsunggod sa aton ang aton pinalangga ukon wala naton nahimo ang dapat naton himuon. Kon kaisa, ginakonsiensia kita bisan wala man kita sing nahimo nga sala. Halimbawa, may ginhimo kita nga pagsulundan para sa aton kaugalingon nga dapat naton sundon. Pero sa kada tion nga indi naton ini masunod, mahimo nga konsiensiahon kita. Amo nga ginapalig-on kita sang Biblia nga indi kita magpaabot sing sobra sa aton kaugalingon.—Manugwali 7:16.

 Kon ginakonsiensia ka, indi magbatyag nga wala ka na sing paglaum. Sa baylo, dapat may himuon ka para matadlong ang imo panghunahuna. Paano?

•   Akua ang imo mga sala. Mangamuyo kay Jehova a nga Dios kag pangabaya sia nga patawaron ka. (Salmo 38:18; Lucas 11:4) Makasalig ka nga pamatian ka sang Dios kon nagahinulsol ka gid kag ginatinguhaan mo nga indi na masulit ang imo sala. (2 Cronica 33:13; Salmo 34:18) Makita sang Dios kon ano ang ara sa imo tagipusuon nga indi makita sang mga tawo. Kon makita sang Dios nga ginatinguhaan gid naton nga untatan ang aton sala nga ginahimo, “matutom sia kag matarong, gani patawaron niya kita sa aton mga sala.”—1 Juan 1:9; Hulubaton 28:13.

   Pero kon may nahimuan kita sing sala, dapat naton ini akuon kag mangayo sing patawad sa sina nga tawo. Mabudlay ini himuon kay nagakinahanglan ini sing kaisog kag pagpaubos. Pero may maayo nga resulta kon mangayo kita sing patawad. Una, mahaw-asan ka sa imo ginabatyag. Kag ikaduha, magaayuhay kamo liwat sang nahimuan mo sing sala.—Mateo 3:8; 5:23, 24.

•   Pamensara ang mga teksto parte sa kaluoy sang Dios. Halimbawa, binagbinaga ang 1 Juan 3:19, 20. Ini nga teksto nagasiling nga “ginapakamalaut kita sang aton tagipusuon.” Gani ginabasol naton ang aton kaugalingon kag nagabatyag kita nga indi kita palangga sang Dios. Pero nagasiling man ini nga “ang Dios labaw pa sa aton tagipusuon.” Ano ang buot sini? Kilala gid niya kita, kag naintiendihan niya ang aton mga ginabatyag kag ang indi naton mahimo. Kabalo man sia nga indi kita perpekto amo kon ngaa pirme kita makahimo sing sala. b (Salmo 51:5) Amo nga ginabaton niya gihapon ang mga nagahinulsol gid sa ila mga sala.—Salmo 32:5.

•   Indi na pagpamensara pirme ang mga sala nga nahimo mo sang una. Mabasa sa Biblia ang parte sa mga lalaki kag mga babayi nga nakahimo sing sala pero nagbag-o sang ulihi. Ang isa ka halimbawa amo si Saulo nga taga-Tarso, nga nakilal-an sang ulihi nga si apostol Pablo. Sang Fariseo pa sia, mapintas niya nga ginhingabot ang mga sumulunod ni Jesus. (Binuhatan 8:3; 9:1, 2, 11) Pero sang nabal-an niya nga bangod sa iya ginahimo ginapamatukan niya ang Dios kag ang Mesias, ukon ang Cristo, naghinulsol sia, ginbag-o niya ang iya pagkabuhi, kag nangin maayo sia nga halimbawa para sa mga Cristiano. Sigurado nga ginhinulsulan gid ni Pablo ang iya mga ginhimo sang una kag wala na niya ini ginapamensar pirme. Kabalo si Pablo nga ginpatawad na sia sang Dios. Gani, nangin mapisan sia nga manugbantala kag nagpokus sia sa iya paglaum nga kabuhi nga wala sing katapusan.—Filipos 3:13, 14.

 Jeremias 31:34: “Patawaron ko ang ila kasaypanan, kag indi ko na pagdumdumon ang ila sala.”

 Buot silingon: Kon napatawad na kita sang Dios, indi na niya pag-ungkaton liwat ang sala nga nahimo naton. Matuod gid ang iya pagpatawad.