Paano Mo Makilala ang Dios kag Mangin Malapit sa Iya?

I-PLAY

Ang sabat sang Biblia

Makilala mo ang Dios kag mangin malapit ka sa iya kon tun-an mo ang parte sa Dios kag himuon ang mga butang nga makapalipay sa iya. Paagi sa sini, ang Dios ‘magapalapit sa imo.’ (Santiago 4:8) Ginapasalig kita sang Biblia nga “indi sia malayo sa tagsa sa aton.”—Binuhatan 17:27.

Mga butang nga dapat mo himuon para makilala ang Dios

Basaha ang Biblia

Ang ginasiling sang Biblia: “Ang pagsulat sa bug-os nga Kasulatan gintuytuyan sang Dios.—2 Timoteo 3:16.
Buot silingon: Ang Dios amo ang Awtor sang Biblia. Ginpasulat niya ang iya panghunahuna sa mga manunulat sang Biblia. Mabasa naton sa sining espesyal nga libro kon ano ang kabubut-on sang Dios para sa aton. Mabasa man naton diri ang mga bahin sang iya personalidad, pareho sang gugma, katarungan, kag kaluoy.—Exodo 34:6; Deuteronomio 32:4.
Ang puede mo himuon: Basaha ang Biblia adlaw-adlaw. (Josue 1:8) Pamalandungi ukon pamensari sing maayo ang imo nabasa, kag pamangkuta ang imo kaugalingon: ‘Ano ang ginatudlo sini sa akon parte sa Dios bilang isa ka Persona?’—Salmo 77:12.

Bilang halimbawa, basaha ang Jeremias 29:11, kag dayon pamangkuta ang imo kaugalingon: ‘Ano ang gusto sang Dios para sa akon—paghidait ukon kalaglagan? Isa bala sia ka Dios nga nagadumot ukon gusto niya sang maayo nga palaabuton para sa akon?’

Obserbahi ang mga tinuga sang Dios

Ang ginasiling sang Biblia: ‘Ang indi makita nga mga kinaiya sang Dios, maathag nga makita halin pa sang pagtuga sa kalibutan, bangod makita ini sa mga butang nga gintuga.’—Roma 1:20.
Buot silingon: Makilala naton ang personalidad ukon mga kinaiya sang isa ka imbentor ukon artist, paagi sa iya mga imbension ukon mga drowing. Pareho sa sini, makilala man naton ang personalidad ukon mga kinaiya sang Dios paagi sa iya mga gintuga. Halimbawa, makita sa kapasidad kag pagkakomplikado sang utok sang tawo ang kaalam sang Dios. Kag makita man sa kontrolado nga enerhiya nga nagahalin sa adlaw kag sa iban pa nga mga bituon ang gahom sang Dios.—Salmo 104:24; Isaias 40:26.
Ang puede mo himuon: Obserbahi kag tun-i ang mga tinuga sang Dios sa palibot mo. Samtang ginahimo mo ini, pamangkuta ang imo kaugalingon, ‘Ano ang ginatudlo sining dalayawon nga mga desinyo parte sa Dios?’ a Siempre, madamo nga butang parte sa aton Manunuga ang indi naton matun-an sa mga tinuga sa palibot naton. Amo ina ang rason kon ngaa ginhatag sang Dios sa aton ang Biblia.

Gamita ang ngalan sang Dios

Ang ginasiling sang Biblia: “Amligan ko sia bangod kilala niya ang akon ngalan. Manawag sia sa akon, kag sabton ko sia.”—Salmo 91:14, 15.
Buot silingon: Ang Dios, nga ang ngalan amo si Jehova, nagahatag sing espesyal nga atension sa mga tawo nga nakakilala sa iya ngalan kag nagagamit sini sing matinahuron. b (Salmo 83:18; Malaquias 3:16) Ginpakilala sang Dios ang iya kaugalingon sa aton sang ginsugid niya sa aton ang iya ngalan. “Ako si Jehova. Amo ina ang akon ngalan,” siling niya.—Isaias 42:8.
Ang puede mo himuon: Gamita ukon sambita ang ngalan ni Jehova.

Magpangamuyo kay Jehova

Ang ginasiling sang Biblia: “Si Jehova malapit sa tanan nga nagapanawag sa iya.”—Salmo 145:18.
Buot silingon: Si Jehova malapit sa mga nagapangamuyo sa iya nga may pagtuo. Ang pangamuyo bahin sang pagsimba, kag ginapakita sini nga ginarespeto gid naton ang Dios.
Ang puede mo himuon: Pirme magpangamuyo sa Dios. (1 Tesalonica 5:17) Isugid sa iya ang tanan mo nga ginakabalak-an kag ang tanan mo nga ginabatyag.—Salmo 62:8. c

Pabakura ang pagtuo sa Dios

Ang ginasiling sang Biblia: “Kon wala sing pagtuo imposible nga mapahamut-an ang Dios.”—Hebreo 11:6.
Buot silingon: Para mangin malapit kita sa Dios, dapat kita magtuo sa iya. Sa Biblia, ang pagtuo wala lamang nagakahulugan sang pagpati nga may Dios. Dapat bug-os ang aton pagsalig sa iya, sa iya mga promisa, kag sa mga pagsulundan nga iya ginapatuman. Importante gid kaayo ang pagsalig para mangin mabakod ang isa ka relasyon.
Ang puede mo himuon: Kinahanglan sang ihibalo para mangin matuod ang pagtuo. (Roma 10:17) Gani tun-i ang Biblia para mapamatud-an mo nga masaligan gid ang Dios kag ang iya mga laygay. Gusto gid sang mga Saksi ni Jehova nga buligan ka nga matun-an ang Biblia. d

Himua ang mga butang nga makapalipay sa Dios

Ang ginasiling sang Biblia: “Amo ini ang kahulugan sang gugma sa Dios, nga tumanon naton ang iya mga sugo.”—1 Juan 5:3.
Buot silingon: Malapit si Jehova sa mga nagapalangga sa iya kag nagahimo sang tanan nila nga masarangan para tumanon ang iya mga sugo.
Ang puede mo himuon: Samtang ginatun-an mo ang Biblia, tinguhai nga mabal-an kon ano ang gusto kag indi gusto sang Dios. Pamangkuta ang imo kaugalingon, ‘Ano ang kinahanglan ko bag-uhon para malipay sa akon ang Manunuga?’—1 Tesalonica 4:1.

Sunda ang mga laygay sang Dios para maeksperiensiahan mo nga nagaulikid sia sa imo

Ang ginasiling sang Biblia: “Tilawi ninyo kag tan-awa nga si Jehova maayo.”—Salmo 34:8.
Buot silingon: Ginaagda ka sang Dios nga pamatud-an nga maayo sia. Kay kon maeksperiensiahan mo ang iya gugma kag pagsuporta, gustuhon mo gid nga mangin malapit sa iya.
Ang puede mo himuon: Samtang ginabasa mo ang Biblia, sunda ang mga laygay sang Dios kag maeksperiensiahan mo ang kaayuhan nga resulta sini. (Isaias 48:17, 18) Tun-i man ang eksperiensia sang mga tawo nga ginbuligan sang Dios nga maatubang ang ila mga problema, makay-o ang ila kabuhi kag ang kabuhi sang ila mga pamilya, kag mabatyagan ang matuod nga kalipay. e

Sala nga mga pagpati parte sa pagkilala sa Dios

Sala nga pagpati: Ang Dios gamhanan kaayo kag tuman ka dungganon amo nga indi sia puede mangin malapit sa aton.

Ang matuod: Bisan pa nga ang Dios amo ang labing gamhanan kag ang pinakadungganon sa tanan, ginaagda niya kita nga magpalapit sa iya. Madamo kita sing mabasa sa Biblia nga halimbawa sang mga lalaki kag mga babayi nga nangin suod nga mga abyan sang Dios.—Binuhatan 13:22; Santiago 2:23.

Sala nga pagpati: Indi naton makilala ang Dios bangod misteryo sia.

Ang matuod: May mga butang nga mabudlay intiendihon parte sa Dios. Halimbawa, ang Dios espiritu kag indi makita. Pero puede gihapon naton makilala ang Dios. Ang matuod, ang Biblia nagasiling nga dapat naton sia makilala para makatigayon kita sang kabuhi nga wala sing katapusan. (Juan 17:3) Ginasugid sa aton sang Biblia sa mga termino nga maintiendihan naton, ang mga impormasyon parte sa aton Manunuga, ang iya mga kinaiya, ang iya mga katuyuan para sa mga tawo kag sa duta, kag ang mga pagsulundan nga iya ginapatuman. (Isaias 45:18, 19; 1 Timoteo 2:4) Kag sa nasambit na, ginapakilala man sang Biblia ang ngalan sang Dios. (Salmo 83:18) Gani indi lang naton makilala ang Dios, kundi puede kita mangin malapit sa iya.—Santiago 4:8.

a Para sa mga halimbawa sang kaalam sang Dios nga makita sa mga butang sa palibot naton, tan-awa ang mga artikulo sa “Gindesinyo Bala Ini?”

b Madamo ang nakahibalo nga ang ngalan nga Jehova nagakahulugan sing “Ginapahanabo Niya nga Mangin Amo.” Paagi sa pagpakilala sang iya ngalan sa aton, daw pareho lang nga nagasiling ang Dios nga, ‘Tumanon ko ang akon kabubut-on kag katuyuan. Pirme ko gid ginatuman ang akon mga promisa.’

c Tan-awa ang artikulo nga “Ngaa Mangamuyo? Sabton Bala Ako sang Dios?”

d Para sa dugang nga impormasyon, tan-awa ang video nga Paano Ginahimo ang Pagtuon sa Biblia?

e Tan-awa ang mga artikulo nga “Ang Biblia Nagapabag-o sang Kabuhi.”