Ang isa ka klase sang balyena nga ginatawag nga Cuvier’s beaked whale, makasarang magsalom sa kadalumon nga 2,992 metros, diin ang pressure mga 30,300 kilopascals (4,390 psi). Ini nga balyena makatener man sa dalom tubig sa malawig nga tion. Ang isa sini narekord nga nakasalom sing 3 ka oras kag 42 minutos antes magbutwa para magginhawa. Paano masarangan sini nga sapat ining grabe nga pressure kag paano ini mabuhi sa diutay lang kaayo nga oxygen sa malawig nga tion?

 Pareho sang iban nga mga mammal sa dagat, ang mga gusok sini nagapilo kag nagakupos ang baga sini. Nadiskobrehan sang mga researcher nga gamay lang nga oxygen ang ginagamit sini nga mga mammal kon maghinay ang pitik sang ila tagipusuon kag kon maglaban ang ilig sang dugo sa ila utok, tagipusuon, kag mga maskulo imbes nga sa ila bilog nga lawas.

 Dugang pa, ini nga mga mammal may pondo sang oxygen sa ila mga maskulo paagi sa isa ka protina nga ginatawag myoglobin. Ginapagua sang myoglobin ang oxygen suno sa kinahanglanon samtang nagasalom ini nga mga balyena. Mas madamo nga myoglobin ang ara sa mga maskulo sini sangsa ara sa mga tawo kag mga sapat sa duta.

 Ang isa ka researcher nagsiling parte sa Cuvier’s beaked whale: “Grabe gid kadalom ang masalom sini nga mga sapat. Base sa amon natun-an parte sa mga lawas sang sapat, ang kadalumon nga masalom sini nga balyena kag ang kalawigon sini nga pagsalom, sobra gid sa ginapaabot namon.” Gusto gid maintiendihan sang mga scientist kon paano mahimo sini nga mga balyena ini nga pagsalom kay posible makabulig ini sa mga doktor nga mapanami pa gid ang ila paagi sa pagbulong sa mga balatian pareho sang nag-collapse nga baga.

 Ano sa banta mo? Ang ikasarang bala sang Cuvier’s beaked whale nga makasalom sing madalom kag malawig resulta sang ebolusyon? Ukon gindesinyo ini?