May kilala ka bala nga pamatan-on nga may serioso nga problema sa iya panglawas? May balatian ka bala ukon diperensia amo nga indi mo mahimo ang mahimo sang pareho mo nga pamatan-on?

 Kon amo, natural lang nga maluyahan ka kon kaisa. Pero, ang Biblia nagasugid sang duha ka kamatuoran nga makalugpay gid sa imo.

•   Ang imo Manunuga, si Jehova nga Dios, nakahibalo sang imo kahimtangan. Labaw sa tanan, “nagaulikid sia sa [imo].”—1 Pedro 5:7.

•   Katuyuan ni Jehova nga Dios nga dulaon ang tanan nga balatian! Mabasa mo ini sa Biblia sa Isaias 33:24 kag Bugna 21:1-4.

 Madamo nga pamatan-on nga nagaatubang sang mga problema sa panglawas ang napabakod sang ila pagtuo sa Dios kag sa mga promisa sini. Binagbinaga ang apat ka halimbawa.

•  YEIMY

•  MATTEO

•  BRUNA

•  ANDRÉ

 Sang 11 anyos ako, kinahanglan ko na mag-wheelchair. Indi ko mahimo ang simple nga mga obra, pareho sang paghakwat sang mamag-an nga mga butang.

 Sang lima ako ka tuig, nadiskobrehan nga may muscular dystrophy ako, isa ka balatian nga nagalala kag ginalimitehan sini ang akon mahimo. Kon kaisa naluyahan ako kay indi ko mahimo ang mahimo sang mga pamatan-on nga pareho ko. Pero ginsuportahan gid ako sang akon mga ginikanan kag sang akon mga upod sa kongregasyon sa pisikal, emosyonal, kag espirituwal. Daku nga tion ang ginagamit ko sa pagwali bilang ministro, kag ginaupdan ako sang pareho ko nga mga Cristiano sa paghiwat sang mga pagtuon sa Biblia sa mga interesado.

 Si Jesus nagsiling nga ang tagsa ka adlaw may kaugalingon nga kabalaka. (Mateo 6:34) Gani wala ko na ginakabalak-an ang masunod nga adlaw kag nagahimo ako sing mga tulumuron nga masarangan ko lab-uton. Nalipay ako sa pagpaabot sang bag-ong kalibutan sang Dios sa diin mabaton ko ang “matuod nga kabuhi,” nga wala na sing balatian.—1 Timoteo 6:19.

 Binagbinaga ini: Nakabulig kay Yeimy ang paghimo sing mga tulumuron nga masarangan niya lab-uton. Paano mo man ini mahimo?—1 Corinto 9:26.

 Nagsugod sakit ang akon likod sang seis anyos ako, kag abi sang doktor sang una natural lang ini kay nagadaku ako. Pero pagligad sang isa ka tuig, nadiskobrehan nga may tumor nga nagtubo sa akon taludtod.

 Gin-operahan ako, pero 40 porsiento lang sang tumor ang nakuha. Kag pagligad sang duha lang ka bulan, nagtubo ini liwat. Sugod sadto, madamo na sing ginhimo nga pag-eksamin kag pagbulong sa akon kag nagdamo man ang akon kapaslawan.

 Kon kaisa, daw ginabuno sang kutsilyo ang bilog ko nga lawas, masami sa akon likod kag dughan, bangod sa tumor. Pero wala ako nagpadaug sa sini. Ginapanumdom ko nga may ginabatas man nga kabudlayan ang iban kag positibo gihapon sila. Ang nakabulig gid sa akon nga mangin positibo amo ang akon pagsalig nga magaabot ang adlaw nga tumanon ni Jehova nga Dios ang iya promisa nga dulaon ang tanan nga pag-antos.—Bugna 21:4.

 Binagbinaga ini: Paano makabulig sa imo nga makabatas ang pagpanumdom sa promisa sang Dios nga dulaon niya ang pag-antos, pareho sang nabulig man sini kay Matteo?—Isaias 65:17.

 Indi bal-anon nga may masakit ako, ano pa abi sang mga tawo matamad ako. Pero ang matuod, mabudlay ang tanan para sa akon lakip na ang mga ulubrahon sa balay, pagtuon, kag bisan ang pagbangon lang.

 Sang 16 anyos ako, nabal-an nga may multiple sclerosis ako, ang nagalala nga balatian nga nagaapektar indi lang sa akon pag-obra kundi sa akon man pagpakigbahin sa mga hilikuton sang mga Cristiano. Pirme ko ginabasa ang 1 Pedro 5:7 nga nagasiling: ‘Itugyan ninyo sa Dios ang tanan ninyo nga kabalaka, bangod nagaulikid sia sa inyo.’ Napabakod gid ako sa pagdumdom nga nagaulikid si Jehova sa kada isa sa aton. Nagapabakod gihapon ini sa akon asta subong.

 Binagbinaga ini: Paano makabulig sa imo ang pagtugyan sang imo kabalaka kay Jehova, pareho sang ginhimo ni Bruna?—Salmo 55:22.

 Pagkabig sang iban nga tawo sa akon daw 10 anyos lang ako nga bata. Indi ko man sila mabasol kay ang hitsura ko daw amo gid man.

 Sang duha ako ka tuig, nabal-an nga may tumalagsahon ako nga klase sang kanser. Nagtubo ini sa akon taludtod kag nagasaka asta sa utok. Natapna sang mga doktor ang balatian, pero ang pagbulong nag-apektar sa akon pagdaku. Subong, nagataas lang ako sing 1.37 metros. Abi sang mga tawo nagabinutig ako kon hambalon ko sila nga 18 anyos na ako!

 Sa Cristianong kongregasyon, ginatratar nila ako nga may dignidad. Wala nila ako ginasunlog, pareho sang ginahimo sang mga bata sa amon eskwelahan. Ginatinguhaan ko nga mangin positibo sa akon sitwasyon. Kay man ara sa akon ang pinakamaayo nga butang nga maagom sang tawo—ang makilala si Jehova! Ano man ang akon batason, sigurado ako nga buligan gid ako ni Jehova. Ang pagdumdom pirme sang matahom nga bag-ong kalibutan nga ginpromisa ni Jehova nga Dios nakabulig sa akon nga mangin positibo.—Isaias 33:24.

 Binagbinaga ini: Ngaa ang pagkilala kay Jehova, subong sang ginsiling ni André, amo ang “pinakamaayo nga butang nga maagom sang tawo”?—Juan 17:3.