ZAJ KAWM 03
Koj Tso Siab Puas Tau Rau Phau Vajlugkub?
Phau Vajlugkub muaj tej lus cog tseg uas zoo kawg li thiab cob qhia peb rau txhua txoj ke. Tej zaum koj kuj xav paub seb phau Vajlugkub qhia txog dab tsi tiam sis koj ho ntshai thiab. Ua li puas tsim nyog rau koj tso siab rau ib phau ntawv uas twb sau txheej thaum ub los lawm? Phau Vajlugkub pab puas tau peb tiam no thiab peb ntseeg puas tau tej yam uas hais txog yav tom ntej? Peb yeej ntseeg tau. Tsheej plhom leej twb ntseeg lawm. Cia peb saib seb yuav ua li cas koj thiaj ntseeg tau thiab.
1. Tej uas phau Vajlugkub qhia puas muaj tseeb tiag?
Phau Vajlugkub tsuas qhia “tej lus tseeb xwb.” (Tej Lus Qhia 12:10) Tej kws tshawb fawb thiab cov neeg kawm txog keeb kwm nrhiav pom tias tej tib neeg, tej thaj chaw, thiab tej xwm txheej uas hais hauv phau Vajlugkub yeej muaj tiag raws li tau sau tseg.—Nyeem Lukas 1:3; 3:1, 2.
2. Vim li cas peb tso siab tau rau phau Vajlugkub txawm tias twb sau ntev los lawm?
Phau Vajlugkub qhia txog tej yam uas tib neeg twb tsis tau paub txog li. Tiam sis los txog rau tiam no, cov kws tshawb fawb mam pom tias tej uas phau Vajlugkub hais yeej muaj tseeb tiag. Yog li ntawd peb yeej tso siab tau rau phau Vajlugkub vim phau Vajlugkub ‘tej lus qhia kav mus ib txhis thiab qhia qhov tseeb.’—Phau Ntawv Nkauj 111:8.
3. Vim li cas peb thiaj tso siab tau rau tej uas phau Vajlugkub qhia txog yav tom hauv ntej?
Phau Vajlugkub muaj ntau zaj lus faj lem a qhia txog tej ‘uas yuav tshwm sim’ rau yav tom hauv ntej. (Yaxayas 46:10) Tej lus faj lem no yeej qhia ntxaws ntxaws txog tiam uas peb nyob tias yuav muaj li cas tiag. Hauv zaj no peb yuav kawm txog tej lus faj lem hauv phau Vajlugkub. Thaum peb pom tias txhua yam muaj raws nraim li phau Vajlugkub qhia peb yuav xav tsis thoob li!
KAWM NTXIV
Mus saib seb tej uas neeg tshawb tau puas muaj li phau Vajlugkub qhia thiab seb tej lus faj lem hauv phau Vajlugkub puas muaj tseeb.
4. Tej uas neeg tshawb pom yeej muaj raws li phau Vajlugkub qhia
Yav puag thaum ub tib neeg feem coob ntseeg hais tias muaj ib yam dab tsi txheem lub ntiaj teb. Saib zaj YEEB YAJ KIAB.
Saib seb phau ntawv Yauj hais li cas 3,500 xyoo dhau los. Nyeem Yauj 26:7 thiab tham txog lo lus no:
-
Puas muaj dab tsi txheem lub ntiaj teb?
Tau 200 xyoo dhau los no, cov kws tshawb fawb nyuam qhuav paub tias lub ntuj lim dej lim nag li cas dej thiaj tsis txawj tu. Tiam sis phau Vajlugkub twb qhia txog qhov no 3,500 xyoo dhau los lawm. Nyeem Yauj 36:27, 28 thiab tham txog ob lo lus no:
-
Yog vim li cas dej thiaj tsis txawj tu li?
-
Ob nqe Vajlugkub no puas ua rau koj tso siab tau rau phau Vajlugkub?
5. Phau Vajlugkub qhia txog tej yam tseem ceeb uas yuav tshwm sim
Nyeem Yaxayas 44:27–45:2 thiab tham txog lo lus no:
-
Ob puas xyoo ua ntej lub nroog Npanpiloos raug puas tsuaj phau Vajlugkub twb qhia li cas lawm?
Tej keeb kwm thaum ub qhia tias teb chaws Pawxias tus vaj ntxwv Xailas coj nws pab tub rog tuaj txeeb lub nroog Npanpiloos nyob rau xyoo 539 ua ntej Yexus. Lawv muab tus dej uas ntws puag ncig lub nroog Npanpiloos cais mus rau lwm qhov. Thaum lawv hla mus txog tim lub nroog, lub rooj vag nyob qhib lug cia. Lawv twb tsis tas sib ntaus sib tua li twb txeeb tau lub nroog lawm. Lub nroog Npanpiloos tseem nyob qhuav qhawv tau 2,500 xyoo los txog peb tiam no. Cia peb mus saib phau Vajlugkub tej lus faj lem txog qhov no.
Nyeem Yaxayas 13:19, 20 thiab tham txog lo lus no:
-
Zaj lus faj lem hauv ob nqe Vajlugkub no muaj tiav li cas?
Niaj hnub no lub nroog Npanpiloos tseem nyob qhuav qhawv hauv teb chaws Ailaj (Iraq)
6. Phau Vajlugkub qhia txog tej uas tshwm sim niaj hnub no
Phau Vajlugkub qhia tias peb twb nyob rau ‘lub sij hawm kawg’ lawm. (2 Timautes 3:1) Mus saib seb phau Vajlugkub qhia tias yuav muaj li cas rau lub sij hawm kawg.
Nyeem Mathais 24:6, 7 thiab tham txog lo lus no:
-
Phau Vajlugkub qhia tias yuav muaj tej xwm txheej twg rau tiam uas peb nyob?
Nyeem 2 Timautes 3:1-5 thiab tham txog ob lo lus no:
-
Raws li cov nqe Vajlugkub no hais, tib neeg yuav coj li cas rau tiam kawg?
-
Niaj hnub no koj pom tias tib neeg coj li cas xwb?
IB TXHIA HAIS TIAS: “Phau Vajlugkub yog dab neeg xwb yeej tsis muaj tseeb.”
-
Ua li koj ne, dab tsi pab tau koj tso siab rau phau Vajlugkub?
KOJ KAWM TAU DAB TSI
Tej keeb kwm, tej uas tib neeg tshawb fawb tau, thiab tej lus faj lem qhia tias koj yeej tso siab tau rau phau Vajlugkub.
Rov Tham Dua
-
Tej uas phau Vajlugkub qhia puas muaj tseeb?
-
Tej uas tib neeg tshawb fawb tau puas muaj raws li phau Vajlugkub qhia?
-
Phau Vajlugkub puas qhia txog yav tom hauv ntej?
TSHAWB NTXIV
Txhua yam phau Vajlugkub qhia puas muaj raws li tej uas neeg tshawb nrhiav tau?
“Tej Kev Tshawb Txuj Puas Qhia Li Tej Uas Phau Vajlugkub Hais?” (Nyeem hauv jw.org/hmn)
Yuav muaj li cas rau tiam kawg?
“Rau Zaj Lus Faj Lem Uas Tab Tom Muaj Tiav” (Phau Tsom Faj lub 5 Hlis tim 1 xyoo 2011)
Mus kawm phau Vajlugkub tej lus faj lem seb teb chaws Kilis sawv los kav lwm lub teb chaws li cas.
Saib seb phau Vajlugkub tej lus faj lem hloov tau ib tug txiv neej lub siab li cas.
“Kuv Ntseeg Tias Tsis Muaj Vajtswv” (Phau Tsom Faj Phau 4 Xyoo 2017)
a Lus faj lem yog tej lus Vajtswv hais uas yuav muaj tshwm sim rau yav tom ntej.
Tej Yam No Yuav Pab Tau Koj Thiab
TEJ UAS COOB TUS NUG TXOG
Kev Kawm Vajlugkub Nrog Yehauvas Cov Tim Khawv Zoo Li Cas?
Yehauvas Cov Tim Khawv qhia Vajlugkub dawb xwb. Koj xav siv phau Vajlugkub twg los kawm los yeej tau. Koj yeej caw tau tag nrho koj tsev neeg thiab koj tej phooj ywg tuaj nrog koj kawm.
