NTU 2
Ib Leeg Npuab Siab Rau Ib Leeg
“Yam uas Vajtswv muab lo tsheej xeeb ua ke lawm, neeg tsis txhob muab ua kom ncaim.”—Malakau 10:9
Yehauvas xav kom nws cov tub qhe “muab siab npuab nws.” (Ntawv Nkauj 31:23) Tseem ceeb heev rau koj thiab koj tus txij nkawm ib leeg npuab siab rau ib leeg li ntawd thiab. Yog neb xyaum coj li no neb ib leeg yuav tso siab rau ib leeg. Thaum tso siab lawd, neb yuav hajyam txawj sib hlub ntxiv.
Niaj hnub no, muaj ntau yam los rhuav tau yus txojkev txij nkawm. Yog koj xav tiv thaiv koj txojkev txij nkawm, koj yuav tsum coj raws li 2 lub ntsiab hauv ntu no.
1 MUAB KOJ TXOJKEV TXIJ NKAWM SAIB HLOB
PHAU VAJLUGKUB QHIA TIAS: Koj yuav tsum “xam pom tias yam twg tsim txiaj kawg nkaus.” (Filipi 1:10) Tsim nyog koj muab txojkev txij nkawm saib hlob rau qhov koj tus txij nkawm tseem ceeb kawg nkaus rau koj lub neej.
Yehauvas xav kom koj xam pom koj tus txij nkawm ua ntej thiab “zoo siab xyiv fab” nrog nws ua neej. (Laj Lim Tswvyim 9:9) Yehauvas qhia meej tias koj yuav tsum saib xyuas koj tus txij nkawm, txhob muab nws tso nyob ua khab ua khuav. Nrhiav kev los pab kom nws muaj kev zoo siab. (1 Khaulee 10:24) Ua li koj puas pom tias, koj kuj vam khom koj tus txij nkawm thiab? Koj puas nco nws txiaj ntsig thiab?
XYAUM UA LI NO:
-
Neb yuav tsum nrhiav sijhawm los nyob ua ke tsis tu ncua. Lub sijhawm no yog rau neb ob niam txiv xwb, txhob pub ib yam dabtsi los tab kaum neb
-
Thaum koj hais txog ib yam dabtsi twg, siv lo lus “wb” txhob siv lo lus “kuv.” Qhov uas koj ua li no qhia tias koj xav txog koj tus txij nkawm thiab
2 TSWJ KOJ LUB SIAB
PHAU VAJLUGKUB QHIA TIAS: “Kuv hais rau nej tias, txhua tus uas saib ib tug pojniam twg thiab xav ntxias nws mas twb deev tus pojniam ntawd hauv lub siab lawm.” (Mathai 5:28) Yog tias hauv yus lub siab yus pheej xav txog tej yam tsis huv, ces twb zoo ib yam li yus ntxeev siab rau yus tus txij nkawm lawm ntag.
Yehauvas hais tias peb yuav tsum ‘tswj peb lub siab.’ (Paj Lug 4:23; Yelemi 17:9) Yuav kom koj ua tau li no, koj yuav tsum tsis txhob cia koj lub qhov muag saib tej yam tsis zoo. (Mathai 5:29, 30) Yehauvas tus tub qhe Yauj hais tias, nws yuav tsis cia nws lub qhov muag mus saib tej ntxhais rau qhov phem. (Yauj 31:1) Txiav txim siab tuag nthi tias, koj yuav tsis saib tej duab liab qab ua nkauj ua nraug. Thiab tsis txhob lam nyiag nyiam ib tug twg kiag li.
XYAUM UA LI NO:
-
Sawvdaws yuav tsum pom tias koj muab siab npuab koj tus txij nkawm tiag tiag
-
Xav txog koj tus txij nkawm. Yog tias koj nrog ib tug twg ua ke, yuav ua rau koj tus txij nkawm khib los yog tu siab rau koj ces txhob nrog nws ua ke ntxiv lawm
