Yehauvas xav kom cov Yixalayees yog ib haiv neeg dawb huv. Nws thiaj hais rau lawv tias: “Nej yuav tsum tau pab hais raws li qhov tseeb kom daws tau nws dim. Kuv yog [Yehauvas].”​—Levis Kevcai 19:2, 16.

Vim li cas thiaj tau hais tias “nej yuav tsum tau pab hais raws li qhov tseeb kom daws tau nws dim”? Cov Yudais muaj ib phau ntawv uas qhia txog phau Levis Kevcai hais tias: “Nqe Vajlugkub no yeej tsis yoojyim nkag siab vim tej lus Henplais txhais tawm tias ‘tsis pub sawv sab saud, ib sab lossis ze ib tug twg.’”

Cov neeg tshawb fawb ib txhia hais tias yuav kom peb nkag siab Levis Kevcai 19:16, peb yuav tau mus nyeem Levis Kevcai 19:15. Nqe ntawd hais tias: “Tsis txhob tu plaub ntug tsis ncaj, thiab tsis txhob saib tsis taus cov pluag lossis tsa cov npluanuj cai. Tiamsis nej yuav tsum txiav txim raws li kev ncaj ncees rau nej cov kwvtij zejzog.” Yog li ntawd, thaum Levis Kevcai 19:16 hais tias “nej yuav tsum tau pab hais raws li qhov tseeb kom daws tau nws dim,” twb yog hais kom cov Yixalayees ib tug twg tsis txhob khwv tswvyim phem thaum mus hais plaub ntug, ua lag ua luam, lossis tu teeb meem hauv vaj hauv tsev. Cia peb mus tham kom huab yam nkag siab Levis Kevcai 19:16.

Nyob rau Levis Kevcai 19:16 thawj thawj kab, Vajtswv sam hwm kom tsis txhob iab liam ib tug twg thiab coj mus nkawg xaiv rau ub rau no. Thaum iab liam lwm tus tsis muaj pov thawj, tsim ntau yam kev kub ntxhov. (Pajlug 10:19; Tej Lus Qhia 10:12-14; 1 Timautes 5:11-15; Yakaunpaus 3:6) Vim li cas thiaj hais li no? Vim tus iab liam tus tod, nws rhuav tus tod lub koob lub npe. Nws tsis quav ntsej tias tus tod txojsia yuav tu taus. Nyob rau hauv Vajtswv Txojlus, muaj ob tug txivneej txawm tuaj iab liam Nanpaus. Tom qab ntawd, nkawd txawm xuas pob zeb ntaus Nanpaus yam tsis muaj nuj nqis dabtsi. (1 Vajntxwv 21:8-13) Twb yog vim muaj tej xwm zoo li no, Levis Kevcai 19:16 thiaj xaus lus hais tias: “Nej yuav tsum tau pab hais raws li qhov tseeb kom daws tau nws dim.”

Thaum ib tug twg hais lus iab liam nkawg xaiv txog lwm tus, twb yog nws ntxub ntxaug tus ntawd ntag. Ib Yauhas tshooj 3 nqe 15 thiaj hais tias: “Tus uas ntxub nws kwv nws tij, tus ntawd ua txhaum ib yam li tus neeg uas tua neeg; nej twb paub lawm hais tias tus neeg tua neeg yeej tsis tau txojsia ntev dhawv mus ibtxhis li.” Twb yog vim li no, Yehauvas thiaj hais tseg cia hauv Levis Kevcai 19:17 tias: “Tsis txhob ntxub ib leeg tus twg rau nruab siab.”

Ua li, peb khaws tau tej lus hauv Levis Kevcai 19:16 li cas? Ua neej nyob, tsis txhob iab liam tus ub tus no yog tsis muaj pov thawj dabtsi. Yog peb ho muaj ib nplooj siab xav ua phem los cia li tswj tuag nthi peb lub siab lub ntsws. Yog peb pheej tsis tswj, peb yuav khib luag, ntxub luag, thiab yuav tsis “hais raws li qhov tseeb” kom daws tau luag dim. Yog li ntawd, cia peb cov uas ntseeg Yehauvas thiab cov xyaum coj raws li Yexus lub neej, txav kom deb ntawm tej cwjpwm zoo li no.​—Mathais 12:36, 37.