Yuav kom cov txij nkawm muaj kev zoo siab xyiv fab ib leeg yuav tsum ris ib leeg txiaj ntsig. Tiamsis tom qab sib yuav tau ntev loo, feem coob tsis nco qab pom qhov zoo, lawv kuj tsis qhuas lossis hais lus zoo txog tej uas lawv tus txij nkawm ua lawm. Ib tug kws pab ntuas cov txij nkawm hais hauv phau ntawv Emotional Infidelity, tias: “Lawv yws txog tej uas lawv tsis nyiam, tsis xis. Thaum lawv tuaj cuag kuv, lawv tsis piav txog tej yam zoo hauv lawv lub neej, lawv piav tej yam tsis zoo xwb. Lawv muaj teeb meem vim lawv ib leeg tsis ris ib leeg txiaj, txojkev hlub thiaj tsuag zuj zus lawm.”

Koj thiab koj tus txij nkawm yuav ua li cas zam dhau tej teeb meem no?

Yog ib leeg qhuas ib leeg, yuav muaj kev kaj siab dua. Yog ob niam txiv xam pom qhov zoo xwb, nkawd yuav muaj kev sib raug zoo. Txawm tej niam txiv hais tsis sib haum li los, yog ib tug ris ib tug txiaj, yuav kho tau nkawd lub neej zoo zuj zus tuaj.

Rau cov niam tsev. Phau ntawv Emotional Infidelity hais ntxiv tias: “Coob tus pojniam tsis to taub tias lawv cov txiv ntxhov siab vim lawv xav khwv kom tsev neeg tau noj.” Txawm ob niam txiv ua haujlwm tibsi los, tus txiv yeej tseem txhawj txog kev noj kev haus.

Rau cov txiv tsev. Txivneej feem coob tsis paub tias pojniam tes haujlwm hnyav npaum li cas, tsis hais tu vaj tu tsev, tu metub menyuam, los yog mus ua dej ua num sab nraud. Niam Tsab Lis * twb yuav txiv tau 2 xyoo ntau lawm. Nws hais tias: “Peb txhua tus puavleej ua yuam kev, thaum kuv ua yuam kev, kuv tsis kaj siab li. Tiamsis thaum kuv tus txiv qhuas tias kuv tu tau vaj tse du lug, ces kuv pom tias txawm kuv zoo tsis txaus los nws tseem hlub kuv. Nws txhawb tau kuv heev thiab ua rau kuv kaj siab lawm ntau!”

Yog ob niam txiv ib tug tsis ris ib tug txiaj ntsig, nkawd txojkev txij nkawm yuav tsis ruaj khov. Valerie yog ib tug niam tsev. Nws hais tias: “Yog nws ua li cas los tus  txij nkawm tsis ris txiaj li, tej zaum yuav yoojyim nws qaug siab rau lwm tus.”

Tsom qhov zoo xwb. Lub lim tiam no tsom seb koj tus txij nkawm ua tau dabtsi zoo ntxim koj siab. Nws pab tau lub cuab lub yig li cas? Koj puas nco nws txiaj ntsig? Thaum xaus lub lim tiam no, sau seb (1) koj nyiam nws tej yeeb yam twg, thiab (2) nws tau ua dabtsi los pab lub cuab lub yig?—Hauv paus ntsiab lus: Filipi 4:8.

Vim li cas koj yuav tsum tsom qhov zoo xwb? Erika hais tias: “Tom qab yus sib yuav tau ob peb xyoos, nyuaj heev rau yus ris nws txiaj, yus cia li tsis nco pom tej yam zoo lawm, yus tsuas pom tej yam nws ua tsis tau zoo xwb.”

Nug koj tus kheej tias: ‘Kuv puas txaus siab rau tej uas kuv tus txij nkawm ua tau?’ Yog koj tus txiv kho vaj kho tsev koj puas ua nws tsaug? Los koj xav tias twb yog txivneej haujlwm ces tsis tas qhuas. Yog koj tus pojniam rau siab ntso tu vaj tu tsev, tu metub menyuam koj puas xav tias twb yog pojniam haujlwm xwb. Tsom qhov zoo, txawm nws ua tau ntau tau tsawg los xij, yog koj tus txij nkawm tab cuab tab yig, zoo siab hlo qhuas thiab qhia rau nws tias koj nco nws txiaj ntsig.—Hauv paus ntsiab lus: Loos 12:10.

Nco ntsoov qhuas. Phau Vajlugkub hais tias peb yuav tsum ua luag tsaug. (Khaulauxi 3:15) Yog li ntawd, nco ntsoov qhuas koj tus txij nkawm. Ib tug txiv tsev hu ua James hais tias: “Thaum kuv pojniam nco kuv txiaj ntsig, ua rau kuv hajyam nquag khwv noj khwv haus thiab xav txhawb wb txojkev txij nkawm.”—Hauv paus ntsiab lus: Khaulauxi 4:6.

Lub neej yeej yuav nyob ruaj khov yog ib leeg ris ib leeg txiaj ntsig. Michael yog ib tug txiv tsev uas hais tias: “Kuv paub tias yog cov txij nkawm tsom ntsoov qhov zoo xwb, yuav kho tau lawv lub neej. Txawm muaj teeb meem los lawv yuav nco ntsoov tias lawv tus txij nkawm yog tus zoo kawg lawm, lawv yuav tsis xav muab nws tso tseg.”