Tej Twj Siv Is Taws Nej Muaj Peevxwm Rhuav Tau Peb Txojkev Txij Nkawm
Yog ob niam txiv txawj siv nkawd lub xov tooj thiab nkawd tej twj nkag Is Taws Nej, yuav pab tau nkawd txojkev txij nkawm nyob ruaj khov.
Tiamsis yog nkawd tsis txawj siv yuav ua rau nkawd . . .
-
tsis muaj sijhawm los nyob ua ke.
-
coj haujlwm los ua rau hauv tsev.
-
ib leeg tsis ntseeg ib leeg siab.
TEJ UAS KOJ YUAV TSUM PAUB
THAUM NYOB UA KE
Ib tug txiv tsev hu ua Mais Khaum (Michael) tau hais tias: “Txawm kuv pojniam wb nyob ua ke los zoo li nws twb tsis nyob ntawd vim nws saib ntsoov nws lub xov tooj xwb. Kuv pojniam pheej hais tias nws tsis tau saib nws lub xov tooj es nws thiaj saib xwb.” Hos ib tug txiv tsev hu ua Yaunathas ho hais tias: “Txawm ob niam txiv nyob kiag hauv tib chav xwb los cuag li nyias nyob nyias ib sab ntuj.”
MUAB XAV LI NO: Thaum koj tus txij nkawm neb los nyob ua ke koj puas ntaus ntawv rau lwm tus lossis teb xov tooj?—EFEXUS 5:33.
HAUJLWM
Ib txhia ua tej txoj haujlwm uas yuav tau txais xov tooj txhua lub sijhawm. Hos ib txhia twb mus ua haujlwm ib hnub lawm los tseem coj haujlwm los ua hauv tsev thiab. Ib tug txiv tsev hu ua Lis lees hlo tias: “Thaum kuv twb los nrog pojniam nyob tom tsev lawm los kuv tseem saib kuv lub xov tooj tsis tseg vim haujlwm ib sij hu tuaj.” Ib tug pojniam hu ua Ntsais hais tias: “Kuv ua haujlwm hauv tsev ces yeej nyuaj rau kuv tsum thaum txog caij tsum. Yog li kuv yuav tsum paub luj kuv lub sijhawm.”
MUAB XAV LI NO: Puas yog koj ke kov xov tooj ke mloog koj tus txij nkawm?—LUKAS 8:18.
KEV NTSEEG SIAB
Cov txij nkawm coob tus tau hais tias tos lawv muaj lus sib cav sib ceg los twb yog vim ib tug mus tso duab zais ntshis hauv Is Taws Nej. Kaum feem pua ntawm cov neeg no yeej lees hlo tias lawv tau zais siab li ntawd lawm tiag.
Yog li, coob leej thiaj hais tias txojkev siv Is Taws Nej ua tau rau yus lub neej tawg. Tej kws lij choj los kuj hais tias tej vej xaij zeem phoojywg yeej ua tau rau cov txij nkawm niaj hnub no sib nrauj tau thiab.
MUAB XAV LI NO: Koj puas muaj hluas nkauj lossis hluas nraug uas koj tham zais ntshis tsis pub koj tus txij nkawm paub?—PAJLUG 4:23.
KOJ YUAV TAU UA LI CAS
NTSUAS SEB YAM TWG TSEEM CEEB DUA
Yog peb tsis noj mov ces peb txojsia yuav yau zuj zus. Ib yam li ntawd, yog peb tsis lauj sijhawm los nrog peb tus txij nkawm ces peb txojkev sib hlub yuav tsuag zuj zus mus.—Efexus 5:28, 29.
VAJLUGKUB TEJ HAUV PAUS NTSIAB LUS: “Paub hais tias yam twg yog yam uas [tseem ceeb] dua ntais.”—FILIPIS 1:10.
Nrog koj tus txij nkawm tham seb neb yuav tau hloov yam twg lossis sau seb dabtsi thiaj yuav pab kom neb txhob kov tej twj ntawm tes tas li.
-
Ib hnub yuav tsum noj ib pluag mov ua ke
-
Teem sijhawm muab xov tooj cia es txhob kov li
-
Teem caij nyoog coj koj tus txij nkawm mus ua si
-
Muab xov tooj lossis tej twj siv Is Taws Nej cia txhob kov thaum yuav mus pw
-
Ib hnub twg siv li 15 feeb los sib tham
-
Teem ib lub caij muab Is Taws Nej tua
Tej Yam No Yuav Pab Tau Koj Thiab
KEV TXIJ NKAWM THIAB TSEV NEEG
Yuav Ua Li Cas Koj Thiaj Tsis Saib Tej Twj Tseem Ceeb Dua Koj Tus Txij Nkawm
Tej twj ntawm tes yeej pab tau koj txoj kev txij nkawm, tiam sis kuj yuav rhuav tau koj txoj kev txij nkawm thiab. Ua li, tej twj cuam tshuam koj txoj kev txij nkawm li cas?
