KOJ xav, phau Vajlugkub puas yog Vajtswv lub tswvyim los yog neeg lub xwb?

Xyoo 2014 lub koom haum Gallup tau nug cov Khixatia hauv tebchaws U.S.A. li saum no. Feem coob hais tias phau Vajlugkub yeej yog Vajtswv muab rau tibneeg. Tiamsis muaj 20 feem puas hais tias phau Vajlugkub tsuas yog “tej keeb kwm, tej kwv huam, tej dab neeg thiab tej kev lig kevcai uas neeg xev xwb.” Tej no qhia tias txawm cov uas hais tias lawv ntseeg Vajtswv los yeej hais tsis haum li. Ua li, puas yog Vajtswv “tshoov” neeg sau phau Vajlugkub tiag? Nws “tshoov” li cas?​—2 Timaute [2 Timautes] 3:16, TMZ.

Phau Vajlugkub muaj 66 phau ntawv me me nyob rau hauv thiab muaj 40 tus txivneej siv li 1,600 xyoo los sau mam tiav. Tibneeg sau phau Vajlugkub xwb, ua li cas ho hais tias yog Vajtswv “tshoov”? Vim tej lus hauv phau Vajlugkub yog Vajtswv lub tswvyim. Phau Vajlugkub hais tias: “[Lub hwj huam] dawb huv kav neeg lub siab lawv thiaj hais tej lus uas los ntawm Vajtswv los.” (2 Petus 1:21) Vajtswv siv nws lub hwj huam, lossis hwjchim, cev lus rau cov uas sau Vajlugkub. Zoo ib yam li tus lospav uas xav sau ib tsab ntawv tseem ceeb mus rau lwm tus, nws txib tus tub ceev ntawv sau tiamsis lub tswvyim yog tus lospav lub.

Cov neeg sau Vajlugkub ib txhia hnov kiag Vajtswv tus tubtxib saum ntuj hais, ib txhia ua yog toog pom, ho muaj dua lwm cov ua npau suav pom. Vajtswv cia lawv sau raws li lawv txawj xwb, tiamsis muaj tej nqe Vajlugkub, Vajtswv kom lawv sau raws nkaus li nws tau hais tseg. Txawm li cas los, txhua lo hauv phau Vajlugkub puavleej yog Vajtswv tshoov neeg sau.

Ua li cas peb ho paub tias Vajtswv tshoov neeg sau phau Vajlugkub tiag? Cia peb saib 3 qhov pov thawj uas qhia tias phau Vajlugkub yeej yog Vajtswv tshoov neeg sau.