Tsev Neeg Thiab Cov Phoojywg
Yuav ua li cas peb txojkev sib raug zoo nrog peb tsev neeg thiab cov phoojywg thiaj yuav ruaj khov? Cia peb mus saib seb tej hauv paus ntsiab lus hauv phau Vajlugkub twg thiaj pab tau peb txojkev sib raug zoo nrog lwm tus.
XAM POM LWM TUS UA NTEJ
VAJLUGKUB TEJ HAUV PAUS NTSIAB LUS: “Nej tsis txhob xav txog nej xwb, tiamsis nej yuav tsum xav txog lwm tus thiab.”—Filipis 2:4.
YOG LI CAS? Yog peb xav muaj kev sib raug zoo nrog lwm tus, peb yuav tsum xav seb peb yuav xub pab lawv li cas. Yog peb tsis xam pom lwm tus ua ntej, peb txojkev sib raug zoo yuav tsis ruaj. Zoo li thaum ib tug tsis xam pom nws tus txij nkawm, tej zaum nws yuav mus ua tej yam tsis zoo xws li deev luag poj luag txiv. Thaum hais txog kev ua phoojywg, tsis muaj leejtwg xav ua phoojywg nrog tus uas khav tias nws muaj nyiaj thiab nws txawj ntse. Vim li no, phau ntawv The Road to Character ua lus Askiv thiaj hais tias, “cov tibneeg uas xam pom txog lawv tus kheej xwb thiab tsis xav txog lwm tus yuav muaj teeb meem ntau heev.”
KOJ YUAV UA LI CAS?
-
Pab lwm tus. Cov phoojywg zoo paub sib pab thiab ib leeg tso siab rau ib leeg. Ib txhia tshawb pom tias cov tibneeg uas zoo siab hlo pab lwm tus, saib lawv tus kheej muaj nqis dua thiab tsis tshua muaj kev nyuaj siab.
-
Paub nrog luag nyuaj siab. Yog peb mob siab tibneeg thiab nrog lawv nyuaj siab, tej uas lawv raug kuj cuag li raug peb thiab. Tsis tas li ntawd, peb yuav tsis hais lus ntsw lwm tus lossis tso dag txog tej yam uas yuav ua rau lwm tus tu siab.
Yog peb nrog lwm tus nyuaj siab, peb yuav ua siab ntev thiab tsis xaiv ntsej muag. Peb cov phoojywg tsis yog peb haiv neeg xwb tiamsis yuav yog lwm haiv neeg thiab.
-
Siv sijhawm nrog lwm tus. Yog peb niaj hnub nrog lwm tus ua ke, peb yuav paub lawv zoo. Yuav kom muaj phoojywg zoo, peb yuav tsum nrog lawv sib txuas lus. Thaum nrog lawv tham, ua tib zoo mloog peb thiaj paub tias lawv nyiam dabtsi thiab yam twg tseem ceeb rau lawv. Muaj neeg tshawb pom tias “thaum peb sib qhia siab, peb yuav kaj siab dua.”
UA TIB ZOO XAIV PHOOJYWG
VAJLUGKUB TEJ HAUV PAUS NTSIAB LUS: “Tus uas mus nrog tus uas ua phem nyob ua ke, nws yeej yuav ua phem li tus ntawd.”—1 Kauleethaus 15:33.
YOG LI CAS? Cov tibneeg uas peb poo yuav txw tau peb mus ua qhov zoo lossis qhov phem. Cov neeg kawm txujci hais tias peb cov phoojywg yuav yaum tau peb ua ntau yam. Xws li yog koj nrog cov uas nyiam haus luam yeeb lossis nrog cov uas xav nrauj lawv tej txij nkawm ces tej zaum koj yuav ua ib yam li lawv.
KOJ YUAV UA LI CAS? Ua phoojywg nrog cov uas coj tus cwjpwm zoo thiab nyiam qhov zoo. Yog koj nrog cov neeg no ces koj yuav xyaum li lawv. Zoo rau koj xaiv cov uas txawj xav, saib taus luag, ua siab dawb siab dav, thiab paub cai.
LWM TEJ HAUV PAUS NTSIAB LUS HAUV VAJLUGKUB
Saib tej yeeb yaj kiab txog cov txij nkawm, cov hluas, thiab cov menyuam seb lawv siv phau Vajlugkub los pab lawv tsev neeg li cas
TXHOB HAIS TEJ LUS UA RAU LUAG TU SIAB.
“Tej lus tsis zoo chob luag siab ib yam li rab ntaj.”—PAJLUG 12:18.
UA SIAB DAWB.
“Ua neeg siab dawb siab zoo, koj lub neej thiaj yuav vammeej.”—PAJLUG 11:25.
UA RAU LWM TUS LI KOJ XAV KOM LWM TUS UA RAU KOJ.
“Yog nej xav kom lwm tus ua li cas rau nej, nej yuav tsum ua ib yam li ntawd rau lwm tus.”—MATHAIS 7:12.
