Ib txhia xaiv ntsej muag vim lawv khav theeb. Tus khav theeb tsuas khav txog nws zaj xwb. Nws saib nws tus kheej muaj nqis dua luag lwm tus thiab nyiam txiav txim tias lwm tus coj tsis zoo cuag li nws. Yog peb tsis ua zoo ceev faj ces peb yuav xav tib yam li no. Phau ntawv hu ua Encyclopædia Britannica hais tias: “Feem coob xav hais tias lawv lub neej, tej zaub mov, khaub ncaws, kev coj noj coj ua, kev ntseeg, thiab lwm yam zoo dua lwm pab lwm pawg.” Peb yuav ua li cas peb thiaj tsis xav ib yam ntawd?

“Nej yuav tsum txo hwjchim thiab ib tug tsis txhob khav hais tias ib tug zoo dua ib tug.”​—FILIPIS 2:3.

Nqi no qhia tias yuav kom peb tsis txhob xav txog peb tus kheej, peb yuav tau ua neeg txo hwjchim. Yog peb txo hwjchim, ces peb yuav pom tias lwm tus nyias ib leeg yeej muaj ib yam zoo dua peb. Tsis muaj ib haiv tibneeg twg yuav zoo tshaj ib haiv.

Muaj ib tug txivneej hu ua Xatefe (Stefan). Nws loj hlob hauv tebchaws koos mus niv. Txawm li ntawd los, nws tswj tau nws tus kheej kom txhob xaiv ntsej xaiv muag rau  cov uas nyob lwm lub tebchaws. Nws hais tias: “Thaum yus saib luag lwm tus muaj nuj nqis dua yus ces yuav ua rau yus tsis txhob xaiv ntsej xaiv muag. Kuv yeej tsis paub txhua tsav txhua yam ces kuv yeej kawm tau ib yam tshiab ntawm lwm leej lwm tus.”

Ua tib zoo xav tias qho zaug koj yeej ua tau yuam kev thiab lwm tus yeej ua tau zoo dua koj. Tsis txhob xav hais tias lwm pab lwm pawg neeg ua tsis tau zoo.

Zoo rau peb xav li no ua ntej peb yuav xav tsis zoo txog ib tug ntawm ib pab ib pawg twg:

• ‘Qhov kuv tsis nyiam tus tibneeg ntawd puas yog nws ib txwm phem, los yog nws coj txawv dua ntawm kuv xwb?’

• ‘Ua li tus tibneeg no puas yuav pom kuv ua qhovtwg tsis zoo?’

• ‘Puas muaj tej yam uas tus tibneeg ntawd txawj tshaj kuv?’

Yog koj muab tej no coj los ua tib zoo xav, koj yuav pom tias tus tibneeg ntawd muaj tej yam koj nyiam ces yuav pab tau kom koj tsis txhob xaiv ntsej xaiv muag lawm.