PEB yeej pom lwm tus npau taws dua los lawm. Tej zaum kuj muaj tej lub caij uas peb npau taws heev thiab. Peb sawvdaws yeej pom tias tsis zoo rau peb ua neeg siab kub siab ceev. Thaum luag lwm tus ua tsis ncaj rau peb, feem coob yeej hais tias tsim nyog peb npau taws. Lub koom haum American Psychological Association hais tias yeej tsis txhaum rau neeg npau taws. Txojkev npau taws tseem pab tau yus noj qab nyob zoo thiab.

Tus tubtxib Povlauj yeej paub zoo tias muaj tej lub sijhawm uas neeg yuav npau taws heev. Nws thiaj sau tias: “ ‘Thaum nej chim tsis txhob ua txhaum,’ tsis txhob cia hnub poob tseem chim.”(Efexau 4:26) Thaum coob tus nyeem raug nqe ntawd, lawv xav tias yeej tsis txhaum rau peb ua neeg npau siav. Ua li, puas yog li lawv xav ntawd? Los yog peb yuav tsum nrhiav lwm txojkev los pab kom peb tswj tau peb lub siab.

Thaum Povlauj qhuab qhia txog txojkev npau taws, twb yog nws xav txog tus sau nkauj cov lus no: “Thaum nej chim tsis txhob ua txhaum.” (Ntawv Nkauj 4:4) Vim li cas Vajtswv ho tshoov kom Povlauj sau cov lus ntawd? Twb yog Povlauj ntuas kom cov Khixatia tsis txhob ua neeg npau siav npau nco. Povlauj piav tias: “Cia li muab txhua yam kev cib nyeej, kev chim, kev npau taws, kev sib cav sib ceg, kev xyav luag moo thiab txhua yam kev phem tso tseg.” (Efexau 4:31) Lub koom haum American Psychological Association hais ntxiv tias raws li lawv tau tshawb nrhiav, tus neeg npau taws tsuas hajyam tsij taws rau nws txojkev npau nco xwb. Yeej pab daws tsis tau nws qhov teeb meem li.

Yuav ua li cas peb thiaj txo tau lub siab chim tseg? Vajntxwv Xalaumoo sau li no: “Qhov uas thoob tsib to nrog ua rau neeg tsis chim sai, thiab qhov uas nws tsis quav ntsej tej uas luag ua txhaum rau nws, kuj yog meej mom rau nws.” (Paj Lug 19:11) Txojkev “thoob tsib to nrog” yuav pab tau peb tswj peb lub siab li cas?

Tus neeg thoob tsib to nrog coj li cas? Nws paub qhov tob qhov ntiav. Thaum lwm tus ua tau siab  peb lawm, kev thoob tsib to nrog yuav pab peb ua siab ntev li cas?

Thaum peb pom lwm tus coj tsis ncaj, tej zaum ua rau peb npau taws heev. Yog tias peb ua nruj ua tsiv pauj ces tej zaum peb yuav ua rau peb tus kheej lossis lwm tus raug mob los muaj thiab. Txojkev npau taws zoo ib yam li hluav taws hlawv. Yog tias tsis muab dej tua ces hluav taws muaj peevxwm kub ib lub tsev puam tsuaj tag nrho. Txojkev npau taws kuj muaj peevxwm rhuav tau peb txojkev sib raug zoo nrog lwm tus thiab nrog Vajtswv. Yog li ntawd, thaum peb pib npau taws peb yuav tsum ua tib zoo xav seb yog tim li cas peb thiaj npau taws ua luaj. Yog peb yoog li no, peb yuav tswj tau peb lub siab chim.

Xav txog Vajntxwv Davi. Thaum Davi tsis tau los ua vajntxwv, nws thiab nws cov neeg pab saib xyuas ib tug txivneej hu ua Nanpas pab yaj hauv tebchaws moj sab qhua. Thaum txog caij txiav plaub yaj, Davi thov kom Nanpas pub mentsis mov rau Davi lawv tau noj. Tiamsis Nanpas teb Davi li no: “Tsim nyog kuv yuav muab kuv tej ncuav tej dej thiab tej nqaij uas kuv tua rau kuv cov neeg txiav plaub yaj noj pub rau cov neeg uas tuaj qhovtwg tuaj kuv tsis paub lov?” Tej lus ntawd ntsawv Davi siab heev. Davi thiaj npaj 400 leej tub rog nrog nws sawv kev mus tua Nanpas thiab Nanpas tsev neeg.​—1 Xamuyee 25:4-13.

Thaum Nanpas tus pojniam Anpikayi hnov li ntawd nws thiaj mus cuag Davi. Thaum nws ntsib nthav lawv, nws txawm pe khwb nkaus ntawm Davi xub ntiag. Nws hais tias: “Thov cia koj tus nkauj qhev piav rau koj mloog, thov koj mloog kuv uas yog koj tus nkauj qhev tej lus.” Ces nws piav rau Davi tias nws tus txiv Nanpas yeej tsiv ncauj tsiv lus heev. Yog tias Davi tua Nanpas ces nws yuav xav txog lig.​—1 Xamuyee 25:24-31.

Anpikayi cov lus pab tau Davi ua siab txias li cas? Anpikayi cov lus pab tau Davi pom tias Nanpas yog ib tug neeg uas tsis txawj xav, tsis txawj hais lus li. Thiab Davi pom tias yog nws muab Nanpas tua, nws yuav tau ris Nanpas lub txim. Ib yam li Davi, muaj tej lub sijhawm peb yuav npau taws heev. Peb yuav tsum coj li cas? Lub koom haum Mayo Clinic hais tias tseem ceeb rau yus tso pa thiab suav 1 txog 10. Xav seb yog vim li cas yus ho npau taws ua luaj. Ua tib zoo xav, yog yus lam npau taws cem luag lwm tus tseem yuav tsim teeb meem li cas ntxiv thiab? Yog tias peb thoob tsib li no, yuav txo tau peb txojkev npau taws.​—1 Xamuyee 25:32-35.

Niaj hnub no phau Vajlugkub pab tau coob leej tswj lawv lub siab heev. Muaj ib tug hu ua Sebastian hauv tebchaws Poland tau xyaum li hais no. Thaum nws muaj 23 xyoos nws nyob hauv tsev loj cuj, nws thiaj pib kawm Vajlugkub. Nws yog ib tug neeg siab ceev heev, tiamsis Vajtswv Txojlus pab tau nws tswj nws lub siab. Thaum nws npau taws, nws ua li cas xwb? Nws hais tias: “Kuv xav seb yog tim li cas kuv thiaj npau taws ua luaj li. Ces tom qab ntawd kuv mam li xav seb phau Vajlugkub qhia kom peb coj li cas. Kuv pom tias tsis muaj ib phau ntawv coj tau peb txoj hau kev zoo npaum li phau Vajlugkub.”

Muaj dua ib tug hu ua Setsuo uas xyaum ib yam li ntawd thiab. Nws tau hais li no: “Thaum cov neeg tom tsev haujlwm ua meem txom kuv, kuv cia li nthe lawv xwb. Nimno kuv kawm Vajlugkub, kuv thiaj tsis nthe li yav tas los lawm. Kuv xav txog cov lus nug no: ‘Leejtwg yog tus tsim teeb meem? Twb yog kuv los sav.’ ” Thaum nws muab xav li no nws thiaj tswj tau nws lub siab chim.

Thaum yus npau taws heev, tsis yoojyim rau yus tswj yus lub siab. Tiamsis Vajtswv Txojlus muaj hwjchim dua tibneeg lub siab. Yog tias peb siv lub tswvyim hauv phau Vajlugkub thiab thov Vajtswv pab peb, ces peb yuav ua tau neeg thoob tsib thiab tswj tau peb lub siab chim.