1, 2. Tibneeg xav li cas txog Vajtswv xwb?

NIAJ HNUB NO coob leej ntau tus xav tias Vajtswv tsis quav ntsej txog tej uas lawv raug. Txawm tibneeg yuav raug kev txom nyem li cas los Vajtswv tsis mob siab txog lawv. Lub 11 Hlis xyoo 2013 tau muaj cua daj cua dub loj heev los raug ib koog pov txwv hauv tebchaws Philippines. Ib tug tswv zos tau hais li no: “Tej zaum Vajtswv mus dua twg lawm ho.”

² Muaj dua ib co xav tias Vajtswv tsis pom tej uas lawv ua. (Yaxaya 26:10, 11; 3 Yauhas 11) Tiam uas Povlauj nyob los tibneeg xav ib yam li ntawd thiab. Povlauj thiaj hais li no: “Lawv pom tias qhov uas paub Vajtswv tsis tseem ceeb.” Cov neeg phem ntawd coj tsis ncaj, coj limhiam thiab ua neeg siab hlob heev.​—Loos 1:28, 29.

3. (1) Peb yuav tau xav txog tej lus nug twg? (2) Hauv phau Vajlugkub, Vajtswv “txhais tes” piv txog dabtsi?

³ Ua li, peb xav li cas txog Vajtswv xwb? Peb yeej paub tias Yehauvas pom txhua yam uas peb ua. Tiamsis peb puas ntseeg tias Yehauvas mob siab txog peb tiag? Peb puas pom nws txhais tes pab? Hauv phau Vajlugkub, Vajtswv “txhais tes” piv txog nws lub hwjchim. Nws siv nws lub hwjchim los pab nws cov tub qhe thiab kov yeej nws cov yeeb ncuab. (Nyeem Kevcai 26:8.) Yexus hais  tias ib txhia yuav “pom Vajtswv.” (Mathai 5:8) Peb puas yog cov uas Yexus hais ntawd? Peb yuav ua li cas thiaj “pom Vajtswv”? Cia peb kawm seb, yav thaud cov uas pom Vajtswv thiab cov uas tsis pom txawv li cas. Thiab peb yuav kawm tias yuav tsum muaj kev ntseeg thiaj pom Vajtswv txhais tes.

4. Vim li cas cov Yixayee tej yeeb ncuab tsis xam pom Vajtswv txhais tes?

⁴ Yav tas los Vajtswv cawm nws haiv neeg tab meeg ib tsoom tebchaws. Yehauvas cawm tau nws haiv neeg dim tebchaws Iyi thiab ntaus yeej coob tus vajntxwv, cov Yixayee thiaj tau mus nyob lub tebchaws uas Vajtswv cog tseg. (Yausua 9:3, 9, 10) Txawm ntau lub tebchaws twb hnov thiab pom Yehauvas cawm nws haiv neeg lawm los, tseem muaj ntau tus vajntxwv “sau tub rog tuaj ua rog rau Yausua thiab cov Yixayee.” (Yausua 9:1, 2) Thaum lawv tuaj ntaus cov Yixayee lawv pom Yehauvas txhais tes ua rau ‘lub hnub lub hli nres mus txog thaum cov Yixayee ua pauj rau cov yeeb ncuab tag.’ (Yausua 10:13) Tiamsis Yehauvas ua rau tej vajntxwv ntawd “lub siab tawv,” lawv thiaj sau ib pab zuj zus tuaj ntaus cov Yixayee. (Yausua 11:20) Vim lawv tsis lees tias Yehauvas txhais tes pab nws haiv neeg, tej vajntxwv ntawd thiaj swb tag.

5. Vajntxwv Ahaj tsis kam lees dabtsi?

⁵ Vajntxwv Ahaj yog ib tug limhiam kawg li, nws twb pom Vajtswv txhais tes pab ntau zaus tiamsis nws tsis kam lees. Eliya hais tias: “Yeej yuav tsis muaj lwg tsis muaj nag los li tsuas yog kuv hais kom muaj ces thiaj muaj xwb.” (1 Vajntxwv 17:1) Ahaj tsis kam lees tias yog Vajtswv txhais tes ua tej no. Ahaj kuj pom thaum Eliya thov Vajtswv tso hluavtaws poob saum ntuj los hlawv tus tsiaj xyeem. Tom qab ntawd, Eliya hais rau Ahaj tias Yehauvas tso nag los lawm. (1 Vajntxwv 18:22-45) Ahaj pom tej no huvsi tiamsis nws tsis kam lees tias yog Yehauvas lub hwjchim ua. Peb kawm tau li cas los ntawm tus qauv no? Peb kawm tau tias peb yuav tsum xam pom Vajtswv txhais tes pab peb.

6, 7. Cov Kinpe-oo thiab Lahaj xam pom li cas?

⁶ Yav thaum ub, muaj ntau haiv neeg tsis xam pom Vajtswv txhais tes pab, tiamsis cov Kinpe-oo coj txawv. Lawv xav kom muaj kev sib raug zoo lawv thiaj tsis tawm tsam cov Yixayee. Vim li cas? Vim lawv hnov txog tej uas Yehauvas tau ua lawd. (Yausua 9:3, 9, 10) Lawv muaj tswvyim lawv thiaj xam pom tias Yehauvas yog tus pab cov Yixayee ntaus yeej rog.

⁷ Lahaj kuj yog ib tug uas pom Yehauvas txhais tes pab. Nws tsis yog neeg Yixayee, tiamsis nws muaj kev ntseeg vim nws hnov txog tej uas Yehauvas tau cawm cov Yixayee dim Iyi teb. Thaum 2 tug tub soj tebchaws tuaj txog ntawm nws, nws hais rau nkawd tias: “Kuv paub tseeb tias [Yehauvas] pub lub tebchaws no rau nej.” Lahaj ntseeg tias Yehauvas muaj hwjchim cawm nws thiab nws tsev tibneeg dim. Txawm nws yuav raug li cas los xij, nws tuav rawv kev ntseeg rau Yehauvas.​—Yausua 2:9-13; 4:23, 24.

8. Cov Yixayee ib txhia xam pom Vajtswv txhais tes li cas?

⁸ Muaj ib co Yixayee tsis coj li Vajntxwv Ahaj. Lawv xam pom Vajtswv txhais tes. Thaum Eliya thov Vajtswv tag nrho, hluavtaws poob saum ntuj los hlawv tus tsiaj xyeem. Ib txhia quaj qw tias: “[Yehauvas] nws yog Vajtswv tiag.” (1 Vajntxwv 18:39) Cov neeg ntawd pom tseeb tias yeej yog Vajtswv lub hwjchim ntag!

9. Yuav ua li cas peb thiaj pom Yehauvas txhais tes?

⁹ Cov qauv uas peb kawm tas los no qhia tias muaj ib txhia xam “pom Vajtswv”  tiamsis muaj ib txhia tsis lees pom nws. Yuav ua li cas peb thiaj pom Vajtswv? Peb lub siab yuav “qheb pom” Yehauvas txhais tes yog peb los paub zoo txog nws thiab nws tus cwj pwm. (Efexau 1:18) Peb xav kom peb pom Vajtswv tseeb npaum li nws cov tub qhe ncaj ncees yav thaum ub thiab tamsim no, puas yog? Tiamsis puas muaj pov thawj qhia tias nimno Vajtswv tseem pab peb?

10. Muaj dabtsi ua pov thawj tias Yehauvas tseem pab tibneeg niaj hnub no? (Saib daim duab ntawd sab 10.)

¹⁰ Niaj hnub no, muaj ntau yam ua pov thawj tias Yehauvas tseem pab tibneeg. Peb twb hnov tias Vajtswv teb coob tus tej lus thov. (Ntawv Nkauj 53:2) Zoo li tus kwvtij Allan [a·lee] uas tshaj tawm txoj xov zoo hauv ib koog pov txwv me me, nyob tebchaws Philippines. Nws tau ntsib ib tug pojniam uas txawm cia li pib quaj. Tus kwvtij piav tias: “Hnub ntawd thaum sawv ntxov xwb, tus pojniam ntawd tau thov Yehauvas kom cov Timkhawv nrhiav tau nws.” Thaum tus pojniam ntawd tseem hluas, nws kawm Vajlugkub nrog Yehauvas Cov Timkhawv. Tiamsis thaum nws yuav txiv mus nyob lub koog pov txwv ntawd, nws tso tseg tsis kawm lawm. Txhawb tau nws lub zog heev rau qhov tib hnub ntawd xwb Vajtswv teb kiag nws tej lus thov. Nws kawm Vajlugkub twb tsis tau muaj 1 xyoos ces nws muab nws tus kheej cob rau Yehauvas thiab ua kevcai raus dej.

11, 12. (1) Yehauvas pab nws cov tub qhe li cas? (2) Piav seb Yehauvas tau pab ib tug muam li cas.

¹¹ Yehauvas cov tub qhe coob tus twb pom Nws txhais tes pab lawv. Muaj ib txhia hais tias thaum lawv xav thum yeeb thum tshuaj thiab tso tseg tsis saib tej duab liab qab, lawv peem npaum li cas los hloov tsis tau li. Tiamsis thaum lawv pib thov Yehauvas ces nws pub nws “lub hwjchim uas loj kawg nkaus” pab lawv tso tau tej kev phem ntawd tseg.​—2 Khaulee 4:7; Ntawv Nkauj 37:23, 24.

¹² Yehauvas kuj pab nws cov tub qhe tiv dhau kev nyuaj siab thiab. Ib tug muam hu ua Amy [e·mim] tau pom li ntawd tiag. Cov kwvtij tau txib nws mus pab tsa Tsev Nceeg Vaj thiab ib lub tsev rau cov tubtxib uas tshaj tawm txawv tebchaws nyob, hauv ib koog pov txwv me me. Cov neeg ntawd tej kev coj noj coj ua txawv heev ntawm nws haiv neeg. Nws mus nyob hauv ib lub tsev so uas nqaim heev. Ntau zaus tsis muaj hluavtaws xob lossis fai fab, thiab tsis muaj dej siv hauv tsev li. Dej nyab tej kev tas los nws tseem niaj hnub taug dej mus ua haujlwm. Amy nco nws tsev neeg heev. Muaj ib hnub, nws txawm cem ib tug viv ncaus uas nrog nws ua haujlwm ua ke. Tom qab ntawd, nws tu siab heev. Thaum nws mus txog tsev fai fab tuag tas tsaus ntuj nti xwb. Nws txawm thov Yehauvas pab nws. Thaum fai fab rov ciaj tuaj, nws mus nyeem Phau Tsom Faj txog cov kwvtij uas kawm tiav Kile-a. Zaj ntawd piav txog tej teeb meem uas nws tabtom ntsib thiab. Amy hais tias: “Cuag li yog Yehauvas hais kiag rau kuv ntag.  Kuv thiaj rov muaj siab ua kuv tes haujlwm ntxiv.”​—Ntawv Nkauj 44:25, 26; Yaxaya 41:10, 13.

13. Muaj dabtsi ua pov thawj tias Yehauvas pab nws cov tibneeg “hwj xwm txoj xov zoo”?

¹³ Yehauvas kuj pab nws cov tibneeg “hwj xwm txoj xov zoo” thiab. (Filipi 1:7) Thaum tej lub tebchaws txwv tsis pub tshaj tawm txoj xov zoo, cov kwvtij mus kom zaj ntawd hauv tej tsev tu plaub. Thoob ntiajteb, hauv tej tsev tu plaub loj peb twb hais yeej ntau tshaj li 268 rooj plaub lawm. Txij xyoo 2000 los, 24 rooj yog hais hauv lub tsev tu plaub loj uas nyob sab Yus Luv (European Court of Human Rights). Tej no ua pov thawj tias tsis muaj leejtwg tav tau Yehauvas txhais tes!​—Yaxaya 54:17; nyeem Yaxaya 59:1.

14. Puas muaj pov thawj dabtsi qhia tias Vajtswv nrog nraim nws cov tibneeg tiag?

¹⁴ Tes haujlwm tshaj tawm txoj xov zoo thoob ntiajteb ua pov thawj tias Vajtswv txhais tes pab peb tiag. (Mathai 24:14; Tubtxib Tes Haujlwm 1:8) Twb yog muaj Yehauvas pab, nws cov tub qhe thoob ntiajteb thiaj koom tau ib lub siab. Tsis muaj ib lub koom haum nyob qhovtwg yuav koom siab tau li no! Txawm cov neeg tsis pe hawm Yehauvas los tseem lees tias: “Vajtswv nrog nraim nej tiag tiag li.” (1 Khaulee 14:25) Yeej muaj pov thawj qhia tseeb tias Vajtswv nrog nraim nws cov tibneeg tiag. (Nyeem Yaxaya 66:14.) Ua li, hauv koj lub neej koj puas pom Yehauvas txhais tes pab koj thiab?

15. Vim li cas muaj tej lub sijhawm nyuaj rau peb pom Yehauvas txhais tes?

¹⁵ Muaj tej lub sijhawm peb nyuaj siab dhau ces ua rau peb tsis nco qab tias Yehauvas twb pab peb lawm. Tau muaj li no rau Eliya thiab. Eliya muaj lub siab tawv qhawv tiamsis thaum tus poj vaj Yexenpee nrhiav kev muab nws tua, Eliya ntshai heev. Nws cia li tsis nco qab tias Yehauvas twb pab nws dua los lawm. Phau Vajlugkub hais tias Eliya thov kom Yehauvas muab nws txojsia rho mus. (1 Vajntxwv 19:1-4) Leejtwg thiaj yuav txhawb tau nws lub zog? Nws yuav tsum vam khom Yehauvas xwb!​—1 Vajntxwv 19:14-18.

16. Thaum peb muaj ntau yam kev nyuaj siab, peb yuav ua li cas peb thiaj pom Vajtswv?

 ¹⁶ Yauj xav ntsoov txog nws tej kev nyuaj siab xwb, nws thiaj tsis pom txog tej uas Yehauvas pom. (Yauj 42:3-6) Muaj tej lub sijhawm, peb tej kev nyuaj siab yuav ua rau peb tsis pom Yehauvas. Thaum zoo li ntawd, peb yuav tsum ua li cas xwb? Peb yuav tsum ua tib zoo xav seb phau Vajlugkub qhia li cas txog peb tej teeb meem. Qhov ntawd yuav ua rau peb pom tim ntsej tim muag tias Yehauvas niaj hnub txhawb peb, thiab peb yuav pom tseeb tias muaj Yehauvas tiag. Peb yuav hais tau li Yauj hais no: “Kuv lub qhov ntsej txeev hnov txog koj, tiamsis nimno kuv lub qhov muag pom kiag koj ntag.”

17, 18. (1) Yehauvas txhais tes pab koj li cas xwb? (2) Piav cov qauv seb niaj hnub no Vajtswv tau pab peb li cas.

¹⁷ Koj puas pom Vajtswv txhais tes pab koj? Xav txog 5 yam no: (1) Yehauvas pab koj los paub qhov tseeb. (2) Thaum koj mus kev sib txoos tej zaum koj hnov ib zaj lus qhuab qhia raug siab heev, zoo li yog hais kiag rau koj ntag. (3) Yehauvas tau teb koj tej lus thov. (4) Yehauvas pab koj ncav cuag koj tej hom phiaj ntawm sab kev ntseeg. (5) Tej zaum koj tso haujlwm tseg vim txoj haujlwm ntawd tab kaum Vajtswv tes num, tiamsis koj pom tias Vajtswv yeej ua raws li nws cog tseg no: “Kuv yuav tsis ncaim koj thiab yuav tsis tso koj tseg kiag li.” (Henplais 13:5) Yog peb nrog Yehauvas sib cog phoojywg ruaj khov lawm, yuav yoojyim rau peb pom nws txhais tes pab peb.

¹⁸ Xala nyob tebchaws Kenya. Nws qhia Vajlugkub rau ib tug pojniam tiamsis zoo li nws lam kawm xwb. Xala hais tias: “Kuv thiaj thov Yehauvas seb puas tsim nyog kuv mus qhia ntxiv lawm. Thaum kuv thov tas kiag xwb, ua ciav tus pojniam ntawd txawm hu tuaj. Nws hais tias nws xav mus kev sib txoos! Ua rau kuv xav tsis thoob hlo li!” Yog peb ua tib zoo xav seb Yehauvas pab peb li cas, peb yeej yuav pom nws txhais tes. Muaj dua ib tug muam nyob sab Axia hu ua Rhonna [la·na] hais tias ntev mus ntev tuaj peb mam li pom Yehauvas pab peb. Nws hais tias: “Thaum yus to taub tias Yehauvas pab yus lawm, yus mam li paub tias nws mob siab yus npaum li cas tiag!”

19. Peb yuav tsum ua dabtsi ntxiv peb thiaj pom Vajtswv?

¹⁹ Yexus hais tias cov uas “pom Vajtswv” yuav tsum muaj “lub siab dawb huv.” (Mathai 5:8) Qhov no txhais li cas? Txhais tias peb yuav tsum xav txog tej yam dawb huv xwb thiab muab tej kev phem kev qias tso tseg. (Nyeem 2 Khaulee 4:2.) Hauv zaj no, peb kawm tau tias yog peb xav pom Vajtswv ces peb yuav tsum txhawb peb txojkev sib raug zoo nrog nws kom ruaj khov. Zaj tom ntej, peb yuav kawm tias kev ntseeg pab tau peb pom Yehauvas txhais tes hauv peb lub neej li cas.