Malakaus Sau 13:1-37
13 Thaum Yexus tawm hauv lub tuam tsev mus, nws ib tug thwj tim hais rau nws tias, “Xib Hwb, koj saib luag muab tej pob zeb zoo zoo los ua tau lub tuam tsev zoo nkauj kawg li!”
2 Tiam sis Yexus teb nws tias, “Koj qhuas lub tuam tsev zoo nkauj no lod? Muaj ib hnub tej pob zeb no yuav pluam tas tib si nyias nyob nyias.”
3 Thaum Yexus zaum saum lub Roob Txiv Aulib uas nyob ncaj lub tuam tsev, Petus, Yakaunpaus, Yauhas, thiab Anrus txawm los nug nws twj ywm tias,
4 “Thov qhia rau peb seb thaum twg mam li muaj tej ntawd, thiab yuav muaj pov thawj dab tsi qhia tias tej no twb yuav kawg mus?”
5 Yexus thiaj qhia lawv tias, “Ceev faj tsis txhob cia leej twg ntxias tau nej yuam kev.
6 Yuav muaj coob leej tuav kuv lub npe dag tias, ‘Kuv yog tus Khetos,’ mas lawv yuav ntxias tau ntau leej yuam kev.
7 Tsis tas li ntawd, nej yuav hnov suab ntaj suab riam thiab yuav hnov txog kev tsov kev rog. Txawm li ntawd los tsis txhob poob siab. Yeej yuav muaj tej no, tiam sis lub sim ceeb* tseem tsis tau kawg.
8 “Ib haiv neeg yuav sawv tawm tsam ib haiv neeg thiab ib lub teb chaws yuav sawv tawm tsam ib lub teb chaws. Yuav muaj av qeeg ib qho rau ib qho thiab yuav muaj kev tshaib kev nqhis. Tej no zoo yam li tus poj niam uas pib mob plab yuav yug me nyuam xwb.
9 “Nej yuav tau ceev faj, vim luag yuav ntes nej mus kom hauv tej tsev tu plaub thiab yuav muab nej nplawm hauv tej tsev pe hawm. Luag yuav coj nej mus kom ntawm tej tswv xeev thiab tej vaj ntxwv vim nej yog kuv cov thwj tim. Thaum ntawd nej yuav ua tim khawv rau lawv.
10 Tsis tas li ntawd, yuav tsum muab txoj xov zoo txog Vajtswv txoj kev kav* tshaj tawm rau txhua haiv neeg ua ntej tso.
11 Thiab thaum luag ntes nej mus hais plaub los tsis txhob txhawj tias nej yuav teb li cas. Lub sij hawm ntawd Vajtswv lub hwj huam dawb huv yuav pab nej teb. Thaum ntawd yuav tsis yog nej teb, tiam sis yog lub hwj huam dawb huv teb ntag.
12 Tsis tas li ntawd xwb, txawm ob kwv tij los ib tug yuav muab ib tug cob rau luag tua. Ob txiv tub los leej txiv yuav muab tus me nyuam cob rau luag tua. Me nyuam los yuav sawv tawm tsam niam txiv thiab muab nkawd cob rau luag tua.
13 Tib neeg yuav ntxub nej vim nej yog kuv cov thwj tim. Tiam sis tus uas thev mus txog thaum kawg yuav dim.
14 “Yog li ntawd, thaum nej pom yam qias vuab tsuab uas ua rau txhua yam puas tsuaj nyob hauv qhov chaw uas tsis tsim nyog yam ntawd nyob (tus nyeem yuav tau ua tib zoo xav, nws thiaj to taub tej no) ces cov nyob hauv Yudias yuav tsum khiav tawm mus rau pem tej roob.
15 Tus uas nyob saum txheej tsev las tshav tsis txhob nqes los vuag ib yam dab tsi hauv tsev.
16 Thiab tus uas nyob tom teb tsis txhob rov los nqa nws lub tsho.*
17 Cov poj niam uas suab me nyuam thiab cov uas muaj me nyuam mos noj mis yuav txom nyem lauj!
18 Yeej meem thov Vajtswv kom tsis txhob muaj tej no tshwm sim rau lub caij ntuj no.
19 Rau qhov lub sij hawm ntawd yuav muaj kev txom nyem loj kawg nkaus li. Txij thaum Vajtswv tsim ntuj tsim teb los txog niaj hnub nim no yeej tsis tau muaj dua thiab yav tom ntej los yuav tsis muaj ntxiv lawm.
20 Thiab vim muaj cov uas xaiv tseg, Vajtswv Yehauvas* yuav txiav hnub txiav nyoog kom luv. Yog Vajtswv tsis ua li ntawd ces yuav tsis muaj leej twg dim li.
21 “Thaum ntawd yog muaj leej twg hais rau nej tias, ‘Saib seb! Tus Khetos nyob ntawm no,’ los sis hais tias, ‘Nws nyob tod!’ nej tsis txhob ntseeg.
22 Rau qhov yuav muaj cov Khetos cuav thiab cov neeg ua txuj cev Vajtswv lus los ua ntau yam txuj ci tseem ceeb ntxias tib neeg yuam kev, tsis hais cov uas xaiv tseg huv si.
23 Yog li ntawd, nej yuav tsum ceev faj. Kuv twb qhia tej no huv si rau nej ua ntej lawm.
24 “Thaum ntawd, tom qab lub caij muaj kev txom nyem loj kawg nkaus dhau lawm, lub hnub yuav tsaus, lub hli yuav tsis ci,
25 thiab tej hnub qub yuav poob saum ntuj los. Tej yam uas muaj hwj chim saum nruab ntug yuav ua zog koog.
26 Lawv yuav pom neeg Leej Tub muaj hwj chim loj ci ntsa iab nrog huab nrog cua saum ntuj los.
27 Nws yuav txib kom cov tub txib saum ntuj mus qaws cov uas Vajtswv xaiv tseg nyob plaub ceg kaum ntuj,* txij qab ntuj mus txog qaum ntuj los ua ke.
28 “Cia li saib tsob txiv cev. Thaum tej ceg mos pib hlav nplooj, koj yeej paub tias yuav txog lub caij ntuj so.
29 Ib yam li ntawd, thaum nej pom tej no ces nej yeej paub tias neeg Leej Tub los ze lawm, twb txog ntawm taw rooj lawm.
30 Kuv hais ncaj qha rau nej tias yuav tsum muaj tiav raws li tej no ua ntej tiam no dua mus.
31 Txawm lub ntuj lub teb yuav ploj mus los kuv tej lus yeej yuav tsis ploj ib los li.
32 “Hais txog hnub ntawd thiab teev ntawd, tsis muaj leej twg paub. Txawm cov tub txib saum ntuj thiab Leej Tub los yeej tsis paub, tsuas yog Leej Txiv thiaj paub xwb.
33 Ceev faj zov tos, txhob tsaug zog, rau qhov nej tsis paub lub sij hawm uas Vajtswv teem cia.
34 Ib yam li tus yawg uas mus ncig teb ncig chaw. Nws txib nws cov tub qhe saib xyuas nws lub vaj lub tsev. Nws cob lawv nyias ua nyias hauj lwm thiab nws kom tus tub qhe uas zov qhov rooj ceev faj zov tos.
35 Cia li ceev faj zov tos, rau qhov nej tsis paub tias tus tswv tsev yuav rov los rau thaum twg. Xyov nws yuav rov los thaum tsaus ntuj, thaum ib tag hmo, thaum qaib qua, thaum kaj ntug, nej yeej tsis paub.
36 Nyob tsam nws ho los rau thaum nej tsaug zog ncaws nruj nris.
37 Tej uas kuv hais rau nej no, kuv yeej hais rau sawv daws ib yam nkaus tias, cia li ceev faj zov tos.”
Cov taw ntawv
^ Los sis “caij nyoog.” Mus saib Cov Lus Txhais.
^ Los sis “lub Nceeg Vaj.” Mus saib Cov Lus Txhais.
^ Yog lub tsho sab nraud los sis yog daim ntaub vas. Mus saib Cov Lus Txhais.
^ Mus saib Cov Lus Txhais.
^ Lus Kilis yog “plaub ntswg cua.”
