Edena Dala ai Iesu ena Boubou ese “Taunimanima Momo Edia Dika Davana” ia Karaia?
Baibel ena haere
Iesu ena boubou gauna amo Dirava ese taunimanima be kara dika bona mase amo ia ruhaia o hamauria. Baibel ia gwau Iesu ese ia bubu rarana be taunimanima edia mauri ena davana. (Efeso 1:7; 1 Petero 1:18, 19) Unai dainai Iesu ia gwau, ia mai “taunimanima momo edia mauri davana ia karaia totona.”—Mataio 20:28, King James Version.
Dahaka dainai “taunimanima momo edia mauri davana” ia karaia?
Dirava ese tau ginigunana, Adamu, ia karaia neganai ia be goevadae tauna, eiava ia dekenai kara dika be lasi. Ia be do ia mauri hanaihanai diba, to Dirava dekenai ia gwau-edeede neganai, unai ia haboioa. (Genese 3:17-19) Ena natudia ia havaraia neganai, kara dika be idia dekenai ia henia hanai. (Roma 5:12) Unai dainai, Baibel ia hahedinaraia Adamu ese ia sibona bona ena natudia be kara dika bona mase dekenai ia “hoihoilaia.” (Roma 7:14, futnote) Idia be goevadae lasi dainai, idia ta ese Adamu ia haboioa gauna idia hoia lou diba lasi.—Salamo 49:7, 8.
Dirava ese Adamu ena natudia ia hebogahisi henidia. (Ioane 3:16) To, Dirava ena hahemaoro goeva taravatuna dainai unai hekwakwanai ia itaia kava be hegeregere lasi. (Salamo 89:14; Roma 3:23-26) Dirava be taunimanima ia lalokau henidia dainai, dala ia karaia unai amo edia kara dika ia gwauatao sibona lasi, to ia kokia momokani diba. (Roma 5:6-8) Iesu ese ia henia boubou gauna be unai mauri davana.
Edena dala ai mauri davana ese ita ia durua?
Baibel ese ia herevalaia “mauri davana” be inai gaudia toi ia hagugurua:
Ia be gau ta ena davana.—Numera 3:46, 47.
Ta ena mauri ia hoia lou, o ia ruhaia.—Esodo 21:30.
Ia be ia hoia lou gauna ena davana hegeregerena, o ia koua. a
Mani Iesu Keriso ena mauri davalaia boubouna ese unai gaudia toi ia karaia dalana ita itaia.
Davana. Baibel ia gwau Keristani taudia be Dirava ese “dava bada amo [idia] ia hoia.” (1 Korinto 6:20; 7:23) Unai davana be Iesu ena rara. Unai rara “amo iduhu, gado, kopina, bona bese idauidau taudia [ia] hoia, Dirava idia hesiai henia totona.”—Apokalupo 5:8, 9.
Ruhaia. Iesu ena boubou gauna amo mauri davana ia karaia bona taunimanima be kara dika amo ia ruhaia.—1 Korinto 1:30; Kolose 1:14; Heberu 9:15.
Davana hegeregerena. Iesu ese ia bouboulaia mauri goevadaena be Adamu ese ia haboioa mauri goevadaena ida ia hegeregere. (1 Korinto 15:21, 22, 45, 46) Baibel ia gwau: “Tau tamona [Adamu] ena gwau-edeede karana dainai, taunimanima momo be kara dika taudia ai idia lao. Unai hegeregerena, tau tamona [Iesu Keriso] ena kamonai karana dainai, taunimanima momo be kara maoromaoro taudia ai do idia lao.” (Roma 5:19) Unai ese ia hahedinaraia tau tamona ena mase ese kara dika taudia momo ia hoia lou diba. Oibe, Iesu ena boubou gauna be ia idia abidadama henia taudia “ibounai edia mauri davana karaia totona.”—1 Timoteo 2:5, 6.
a Baibel lalonai Heberu gado herevadia idia hahanaia “mauri davana” ena anina be dava bada gauna ta bona idia gaukaralaia gau ta idia hoia totona. Hegeregere, Heberu gado herevana ka·pharʹ ena anina be “koua.” (Genese 6:14) Unai hereva be kara dika gwauatao karana ia hahedinaraia. (Salamo 65:3) Unai hereva hegeregerena ta be koʹpher, bona ena anina be gau ta hoia lou ena davana. (Esodo 21:30) Unai hegeregerena, Grik gado herevana lyʹtron, nega momo idia hahanaia “mauri davana” be inai bamona idia hahanaia diba: “Tau ta ena mauri hoia lou ena davana.” (Mataio 20:28; The New Testament in Modern Speech, by R. F. Weymouth) Grik gado toretore taudia ese unai hereva idia gaukaralaia tuari ai idia abia mauri tauna o igui hesiai tauna ruhaia ena davana idia herevalaia totona.
Reana Inai Danu Oi Ura
BAIBEL HENANADAI EDIA HAERE
Iesu ese Ita ia Hamauria—Edena dala ai?
Dahaka dainai Iesu ese ita totona Dirava ia noinoi henia? Iesu ita abidadama henia sibona be hegeregere, a?
MAI ANINA BADA BAIBEL HADIBAIA HEREVADIA
Dahaka Dainai Iesu Ia Mase?
Baibel ia hahedinaraia Iesu ena mase be mai anina bada. Iesu ena mase be mai ena badina, a?
