Lasi, tanobada be do ia ore lasi, lahi ese do ia gabua lasi, o gau ta ese ena gabu do ia abia lasi. Baibel ia gwau Dirava ese tanobada ia karaia taunimanima ese idia noholaia hanaihanai totona.

•   “Kara maoromaoro taudia be tanobada do idia abia, bona tanobada ai do idia noho ela bona hanaihanai.”​—⁠Salamo 37:29.

•   “[Dirava] ese tanobada be badina aukana latanai [ia] haginia, Bona ena gabu amo do idia kokia lasi ela bona hanaihanai.”​—⁠Salamo 104:5.

•   “Tanobada be ia noho hanaihanai.”​—⁠Hadibaia Tauna 1:4.

•   “Tanobada ia karaia bona haginia auka Diravana, Ia karaia kava lasi, to taunimanima ese idia noholaia totona ia karaia.”​—⁠Isaia 45:18.

 Dirava ese inai tanobada do ia gimaia, unai amo taunimanima ese hodahoda mirona, tuari, o dala ma ta amo do idia hadikaia ore lasi. To, ia ese “tanobada idia hadikaia taudia do [ia] hadikaia ore.” (Apokalupo 11:18) Edena bamona unai do ia karaia?

 Dirava ese tanobada gavamanidia do ia kokia, idia be hegeregere lasi tanobada idia gimaia, bona edia gabu ai guba Basileia goevadaena do ia lohia. (Daniela 2:44; Mataio 6:9, 10) Unai Basileia be Dirava ena Natuna, Iesu Keriso ese do ia lohiaia. (Isaia 9:6, 7) Iesu be tanobada ai ia noho neganai, hoa karana ia karaia bona lai bona davara ia biagua. (Mareko 4:35-41) Iesu be Dirava ena Basileia ena King dainai, ia ese tanobada bona ia lalonai idia noho gaudia do ia biagua. Tanobada do ia hamatamataia lou, bona Eden umana bamona do ia lao.​—⁠Mataio 19:28; Luka 23:43.

 Lasi, unai ia gwauraia lasi. Inai lalohadai kererena ia vara badina 2 Petero 3:7 ena hereva idia lalopararalaia lasi, ia gwau “guba bona tanobada be lahi ese do ia araia negana idia naria noho.” Inai hereva lalopararalaia totona, mani inai point rua ita laloa:

1.   Baibel ese inai hereva “guba,” “tanobada,” bona “lahi” ia gaukaralaia gau idauidau ia herevalaia totona. Hegeregere, Salamo 97:1 ia gwau: “Iehova be King ai ia lao vadaeni! Tanobada ia moale bada. Motumotu idauidau idia moale bada.” Iniseniai, “tanobada” be taunimanima ia herevalaia.

2.   Petero Iharuana 3:7 ena badina siridia ese guba, tanobada, bona lahi edia anina idia hahedinaraia. Siri 5 bona 6 ese Noa ena nega ai ia vara Abata ia herevalaia. Unai nega ai ia noho tanobada be ranu ese ia hadikaia ore, to tanobada korikorina be ia ore lasi. To, Abata ese taunimanima dikadia, o “tanobada,” ia haorea. (Genese 6:11) Danu, Abata ese unai nega ai idia lohia taudia, o “guba,” ia haorea. Oibe, kara dika taudia ia hadikaia ore, to tanobada korikorina lasi. Abata ese unai tanobada ia hadikaia ore neganai, Noa bona ena ruma bese idia roho mauri bona tanobada ai idia noho.​—⁠Genese 8:15-18.

 Abata ena ranu hegeregerena, 2 Petero 3:7 ese ia herevalaia “lahi” be kara dika taudia do ia ore karana ia herevalaia, to Tanobada korikorina lasi. Dirava ia gwauhamata “guba matamata bona tanobada matamata” lalonai, “kara maoromaoro sibona do ia noho.” (2 Petero 3:13) “Tanobada matamata,” o kara maoromaoro taudia, be “guba matamata,” o lohia matamata, Dirava ena Basileia unai, ese do ia lohiaia. Unai Basileia ena lohia henunai, tanobada be maino paradaisona ai do ia lao.​—⁠Apokalupo 21:1-4.