Baibel ai, inai hereva “toreisi lou” be Greek herevana a·naʹsta·sis amo idia abia, ena anina be “toreisi” o “gini toreisi lou.” Ia toreisi lou tauna be mase amo ia toreisi lou bona ia mauri lou guna bamona.​—1 Korinto 15:12, 13.

 “Toreisi lou” ena hahediba herevadia be Heberu Toretoredia (Taravatu Gunana) ai ia noho danu. Hegeregere, peroveta tauna Hosea amo, Dirava ia gwauhamata: “Mase Gurina ena siahu amo idia do lau ruhaia, mase amo idia do lau hatorea isi lou.”​—Hosea 13:14; Iobu 14:13-15; Isaia 26:19; Daniela 12:2, 13.

 Taunimanima be edeseni do idia toreisi lou? Taunimanima haida be idia toreisi lou guba dekenai Keriso ida idia lohia totona. (2 Korinto 5:1; Apokalupo 5:9, 10) Baibel ese ia gwauraia “toreisi lou ginigunana,” unai ese ia hahedinaraia toreisi lou ma ta do ia vara danu. (Apokalupo 20:6; Filipi 3:11) Gabeai do ia vara toreisi louna be tanobada ai do idia noho taudia totona, bona hutuma ese do idia moalelaia.​—Salamo 37:29.

 Taunimanima be edena bamona do idia toreisi lou? Dirava ese Iesu dekenai siahu ia henia mase taudia ia hatorea isi lou totona. (Ioane 11:25) Iesu ese “gara gabudia ai idia noho taudia ibounai” do ia hamauria lou, idia ta ta edia toana, kara, bona memori ibounai do idia abia lou. (Ioane 5:28, 29) Guba dekenai do idia daekau taudia be lauma tauanina ai do idia toreisi lou, to tanobada ai do idia noho taudia be tauanina goadana bona goevadaena ida do idia toreisi lou.​—Isaia 33:24; 35:5, 6; 1 Korinto 15:42-44, 50.

 Daidia do idia toreisi lou? Baibel ia gwau, “kara maoromaoro taudia bona kara maoromaoro lasi taudia be do idia toreisi lou.” (Kara 24:15) Kara maoromaoro taudia hegeregere, Noa, Sara, bona Aberahamo danu do idia toreisi lou. (Genese 6:9; Heberu 11:11; Iamesi 2:21) Kara maoromaoro lasi taudia be Dirava ena taravatu idia badinaia lasi taudia, idia be unai taravatudia idia dibaia lasi neganai idia mase.

 To, mai ura ida kara dikadia idia karaia bona idia ura lasi edia kara idia haidaua taudia be do idia toreisi lou lasi. Unai bamona taudia idia mase neganai, idia be idia ore momokani.​—Mataio 23:33; Heberu 10:26, 27.

 Toreisi lou be edena negai do ia vara? Baibel ia gwau idia toreisi lou bona guba dekenai daekau karana be Keriso ena noho negana ai do ia vara, bona unai be lagani 1914 ai ia matamaia. (1 Korinto 15:21-23) Idia toreisi lou tanobada ai idia mauri totona be Iesu Keriso ena Lagani 1,000 Lohia Negana ai do ia vara, unai nega ai tanobada be paradaiso ai do ia lao.​—Luka 23:43; Apokalupo 20:6, 12, 13.

 Dahaka dainai toreisi lou ita abidadama henia be namo? Baibel lalonai idia toreisi lou taudia 9 edia sivarai ia noho, idia ta ta be unai idia itaia taudia ese idia hamomokania. (1 King Taudia 17:17-24; 2 King Taudia 4:32-37; 13:20, 21; Luka 7:11-17; 8:40-56; Ioane 11:38-44; Kara 9:36-42; 20:7-12; 1 Korinto 15:3-6) To, Iesu ese Lasaro ia hatorea isi lou karana be idau, badina Lasaro be dina 4 ia mase vadaeni bona Iesu ese unai hoa karana be taunimanima hutuma vairanai ia karaia. (Ioane 11:39, 42) Iesu idia dagedage henia taudia be unai idia hakoikoia diba lasi, unai dainai palani idia karaia Iesu bona Lasaro idia hamasea totona.​—Ioane 11:47, 53; 12:9-11.

 Baibel ese ia hahedinaraia Dirava be mai ena siahu bona ia ura mase taudia ia hatorea isi lou. Iena siahu be bada herea dainai, do ia hatorea isi lou taudia ta ta ia lalodia tao diba. (Iobu 37:23; Mataio 10:30; Luka 20:37, 38) Dirava ese mase taudia ia hamauria lou diba, bona ia ura unai ia karaia! Toreisi lou karana dekenai Baibel ese Dirava be inai bamona ia gwauraia: “Do oi ura dikadika oi karaia gauna oi itaia lou totona.”​—Iobu 14:15.

Toreisi lou dainai idia vara lalohadai kereredia

 Lalohadai kererena: Toreisi lou negana ai lauma bona tauanina be idia hakapua lou.

 Lalohadai maorona: Baibel ia gwau ta ia mase neganai, ia be gau ta ia diba lasi, bona ia dekenai mase diba lasi laumana ta ia noho lasi. (Genese 2:7; Hadibaia Tauna 9:5, 10) Ia toreisi lou tauna be ena lauma ida ia hakapua lou lasi, to tauanina namona bona goadana ida do ia toreisi lou.

 Lalohadai kererena: Taunimanima haida be do idia toreisi lou bena maoromaoro do idia hamasedia ore.

 Lalohadai maorona: Baibel ia gwau “kara dika idia karaia taudia be do idia toreisi lou hahemaoro abia totona.” (Ioane 5:29) Guna idia karaia karadia dainai lasi, to idia toreisi lou murinai idia karaia karadia dainai hahemaoro do idia abia. Iesu ia gwau: “Mase taudia ese Dirava ena Natuna ena gadona do idia kamonai, bona ia idia badinaia taudia be do idia mauri.” (Ioane 5:25) Idia toreisi lou murinai, idia dibaia gaudia idia “badinaia” taudia edia ladadia be “mauri bukana” lalonai do idia torea.​—Apokalupo 20:12, 13.

 Lalohadai kererena: Ta ia toreisi lou neganai, ia do mase lasi neganai ia abia tauanina do ia abia lou.

 Lalohadai maorona: Ta ia mase murinai, ena tauanina be do ia bodaga bona tano kahu ai do ia lao.​—Hadibaia Tauna 3:19, 20.