“Lau ura Baibel lau duahia, to ia be bukana badana dainai, lau hesiku!”​​—Briana, 15.

 Unai bamona oi mamia danu, a? Inai atikol ese oi ia durua diba!

•  Dahaka dainai Baibel lau duahia be namo?

•  Baibel be edena bamona lau duahia diba?

•  Emu turadia edia hereva

 Oi laloa Baibel duahia karana be borin, a? Bema oibe, unai ai lalopararalaia. Reana oi laloa Baibel be mai ena rau momo herea bona laulau be lasi​​—to TV bona vidio itaia karana oi moale!

 To mani inai oi laloa: Bema dava bada gaudia amo ia honu idaunega maua badana ta oi davaria, do oi ura ia lalonai idia noho gaudia oi diba, ani?

 Baibel be dava bada gaudia amo ia honu mauana ta bamona. Ia lalonai aonega herevadia momo idia noho bona oi do idia durua

•   Disisen maorodia oi karaia

•    Emu tama sina ida oi hetura namonamo

•    Tura namodia oi davaria

•    Lalohekwarahi oi haheaukalaia

 Dahaka dainai unai idaunega bukana be mai anina bada hari iseda negai? Badina “Toretore Helagadia be Dirava ena siahu amo idia torea.” (2 Timoteo 3:16) Anina be Baibel ena sisiba be tanobada bona guba ai ia noho aonega bada Tauna amo idia mai.

 Dala ta be Baibel ena matamana ela bona dokona oi duahia. Unai ese oi do ia durua Baibel ena sivarai ibounai oi lalopararalaia totona. Baibel duahia daladia be momo herea. Mani inai dala rua ita herevalaia:

•    Baibel ena buka 66 idia atoa hegeregerena oi duahia diba, Genese amo ia lao Apokalupo.

•    Reana Baibel lalonai idia vara sivaraidia edia oda hegeregerena ai oi duahia diba.

 Heduru: Nega Matamata Trensleisen ena Apendiks A7 ai Iesu ena tanobada maurina ai idia vara gaudia be edia oda hegeregerena ai idia torea.

 Dala namba 2 be oi davaria hekwakwanai ta ia herevalaia Baibel sivaraina ta oi abia hidi. Hegeregere:

•   Oi ura tura namodia oi davaria, a? Ionatana bona Davida edia sivarai oi duahia. (1 Samuela, karoa 18-​20) Mani oi tahua Davida be edena kara namodia idia hahedinaraia dainai, Ionatana ese ia ura henia.

•   Oi ura oi goada hahetoho oi dadaraia totona, a? Iosepa ese hahetohoa ia dadaraia ena sivarai oi duahia. (Genese, karoa 39) Mani oi tahua Iosepa be edeseni amo goada ia abia unai hahetoho ia dadaraia totona.

•   Oi ura diba edena dala ai guriguri ese oi do ia durua, a? Nehemia ena sivarai oi duahia. (Nehemia, karoa 1 bona 2) Dirava ese Nehemia ena guriguri ia haerelaia daladia oi tahua.

 Heduru: Baibel oi duahia neganai, namona be regerege lasi gabunai oi helai unai amo gau ta ese emu lalona do ia veria lasi.

 Dala namba 3 be Baibel lalonai sivarai ta o Salamo ena siri ta oi abia hidi bona oi duahia, bena oi ia durua dalana oi laloa. Oi duahia murinai, inai henanadai oi laloa:

•    Dahaka dainai Iehova ese Baibel lalonai inai ia torea?

•    Edena dala ai Iehova ena kara namodia bona ena gaukara dalana ia hahedinaraia?

•    Edena dala ai unai be egu mauri lalonai lau badinaia diba?

 Heduru: Tahua gauna ta oi atoa! Emu Baibel duahiduahi oi hamatamaia totona deiti ta oi abia hidi.