Lagani idia hanaia lalonai, headava taudia haida be ta ta lalokau henia karana idia hamaragia matamaia. Bema emu headava lalonai unai ia vara, do oi lalohekwarahi be namo, a?

•  Dahaka oi diba be namo

•  Dahaka oi karaia diba

 Headava ia goada totona lalokau be mai anina bada. Hanaihanai aniani maorodia bona ranu abia noho karana be mai anina bada, unai ese iseda helt ia durua. Unai hegeregerena, lalokau ese hanaihanai headava ia hagoadaia. Herevana tau bona hahine idia headava lagani momo vadaeni, to lalokau bona ta ta ena namo laloa bada karana idia hahedinaraia noho be namo.

 Lalokau korikorina be ma ta ena namo ia laloa. Ia ese ta ia moale diba dalana do ia laloa. Danu, do ia gwau lasi ia ura negadia sibona ai unai kara do ia hahedinaraia. To ma ta ena namo ia laloa tau eiava hahine be, iena adavana ena hemami ia laloa, bona do ia gaukara goada ena ura ia hagugurua totona.

 Nega momo hahine idia ura edia adavadia ese idia lalodia bada. Tau be iena hahine do ia lalokau henia bada. To bema unai lalokau be mahuta hebou negana sibona ai ia hahedinaraia, bena murinai iena adavana ena hemami ia laloa lasi, adavana do ia daradara, bema iena tau ese mai momokani ida ia laloa bada. Unai dainai, namona be dina ta ta ai lalokau hahedinaraia noho.

 Hereva amo lalokau hahedinaraia. Inai bamona herevadia hegeregere, “Oi lau lalokau henia” eiava “Oi lau laloa bada” unai bamona herevadia amo, adavana do ia mamia ia be mai anina bada.

 Baibel ena hakaua hereva: “Kudouna ai idia honu gaudia be uduna ese ia gwauraia.”​—Mataio 12:34.

 Inai karaia: Lalokau be hereva amo oi hahedinaraia noho. Emu hereva be nouti, e-mail, eiava teks meseij ai oi toredia.

 Lalokau be kara amo hahedinaraia. Emu adavana oi rosia (hug), eiava iena imana oi dogoatao, bona ia dekenai oi gwau, “Oi lau lalokau henia.” Danu nega haida, ia dekenai harihari gaudia oi henia, do ia mamia mai momokani ida ia oi laloa bada. Bona emu adavana durua totona gaukara haida do oi karaia,​—reana ena baege oi huaia, ia totona iduara oi kehoa, mereki huridia, dabua huria, o aniani do oi nadua, ani? Gaukara be momo, to unai be heduru henia karana sibona lasi​—to unai amo oi hahedinaraia emu adavana oi lalokau henia!

 Baibel ena hakaua hereva: “Namo lasi iseda lalokau be hereva eiava uduna sibona amo, to mai momokani ida iseda kara amo ita hahedinaraia.”​—1 Ioane 3:18.

 Inai karaia: Umui hetura matamaia negana ai umui karaia bamona, emu adavana ena namo laloa karana oi hahedinaraia noho.

 Ta ta totona nega atoa. Umui rua sibona umui noho karana ese headava dekenai goada do ia henia, bona oi hamomokania emu adavana ena hebamo karana oi moalelaia. Momokani, bema mai emui natudia, eiava dina ta ta ai umui ura karaia gaukaradia be momo neganai, umui rua totona nega be lasi. Reana palani umui karaia, dina ta ta ai umui rua sibona umui raka hebou totona.

 Baibel ena hakaua hereva: “Mai anina bada gaudia do umui diba.”​—Filipi 1:10.

 Inai karaia: Headava taudia haida ena be idia bisi, to nega idia atoa adorahi o wikeni ai idia moale hebou totona.

 Emu adavana oi dibaia. Tau bona hahine ese lalokau be dala idauidau ai idia hahedinaraia. Umui herevahereva hebou edena dala ma haida ai lalokau do umui hahedinaraia. Bena, emu adavana ena ura gaudia oi hagugugura totona do oi gaukara goada. Laloatao, mai anina bada gauna be lalokau hahedinaraia karana amo headava do ia goada.

 Baibel ena hakaua hereva: “Lalokau . . . be sibona ena namo ia tahua lasi.”​—1 Korinto 13:4, 5.

 Inai karaia: Oi naria lasi emu adavana ese oi dekenai lalokau ia hahedinaraia totona. Sibona oi henanadai, ‘Dahaka lau karaia diba egu adavana ese lau ia lalokau henia totona?’