Emai tanobada hegegemadai gaukara be Iehova ena Witnes taudia ta ta ese idia henia volantia doneisen moni amo ai durua. a Hebou gabudia ai kontribiusen maua idia noho, bona doneisen karaia daladia ma haida be websait dekenai oi itaia diba. Websait ai unai daladia ta oi abia hidi diba emai tanobada hegegemadai gaukara o kongrigeisen kontribiusen oi henia totona eiava unai rua oi abia hidi diba.

 Iehova ena Witnes taudia edia orea ia gwau lasi Witnes taudia be edia moni gaukara amo, moni hida do idia henia (tithe). (2 Korinto 9:7) Emai hebou dekenai moni ai gogoa lasi o davana ai gwauraia lasi, bona bapatiso, fineral, wedin, o tomadiho ena gaukara totona davana ai noia lasi. Moni abia totona aniani o kohu ai hoihoilaia lasi, loto gadara, aria idauidau, pati, tiketi, o unai bamona gaudia ai karaia lasi, danu doneisen totona moni ai noia lasi. Doneisen idia henia taudia edia infomeisen be pablik dekenai ai hahedinaraia lasi. (Mataio 6:2-4) Emai websait bona pablikeisen ai advataismen ia noho lasi.

 Iehova ena Witnes taudia edia kongrigeisen ibounai be hua ta ta ai moni ena ripoti idia gwauraia hedinarai. Hanaihanai kongrigeisen ta ta ese edia moni ena rekodi idia sekea, unai amo idia diba kontribiusen moni be edena bamona idia naria namonamo.—2 Korinto 8:20, 21.

•   Kontribiusen maua: Kingdom Hall, Assembly Hall o hebou gabudia dekenai idia noho kontribiusen maua ai emu moni o seke oi udaia diba.

•   Onlain doneisen: Tano momo ai, emai websait dekenai “Donate to Jehovah’s Witnesses” ena kahana oi gaukaralaia diba emu kredit kadi, debit kadi, banika transfer, bona dala ma haida amo doneisen oi henia totona. b Witnes taudia haida be hua ta ta ai ‘moni sisina do idia haboua,” unai dala ta amo doneisen idia henia.—1 Korinto 16:2.

•   Henia karana ena palani: Doneisen henia totona palani oi karaia guna, bona gavamani ena taravatu (legal standards) oi badinaia. Unai bamona palani oi karaia neganai, reana oiemu tano ena takisi taravatu amo namo oi abia diba. Taunimanima haida be unai bamona infomeisen idia dibaia namonamo dainai, idia mauri noho lalonai edia harihari gaudia be idia ura henia taudia dekenai idia henia diba eiava dala idia karaia diba bema idia mase, edia kohu be daika ese do ia abia. Mani emu kara, oiemu gabu ai ia noho Iehova ena Witnes taudia edia brens ofesi oi kontek henia infomeisen ma haida totona, bema henunai idia torea daladia amo emu doneisen oi ura henia:

  •   banika akaun

  •   insurens bona ritaiamen palani

  •   tano bona ruma

  •   share monina

  •   will bona trast gaudia

 Emu gabu ai idia gaukaralaia doneisen daladia ena infomeisen ma haida oi diba totona inai kahana “Donate to Jehovah’s Witnesses” oi itaia.