Hadibaia Tauna 12:1-14
12 Emu matamata negana ai, emu Havaraia Tauna Badana oi laloatao be namo,+ badina dika hisihisi dinadia idia ginidae neganai,+ do oi gwau: “Egu mauri dekenai lau moale lasi.”
2 Dika dina, hisiu bona hua edia diari ia ore,+ bona medu bada herea ia diho murinai ori ma idia haboua lou,
3 unai nega ai ruma ena gadi taudia* idia heudeheude, bona goada taudia edia doruna ia gageva, bona hahine be momo lasi dainai witi idia moia lasi, bona windo amo idia roha lao hahine idia itaia gabu be ia dibura,+
4 bona dala ia lao henia iduara idia koua, witi moia nadi ena regena ia maragi ia lao, manu ena boiboi dekenai ta ia noga, bona ane abia kekeni iboudiai edia gado regena be ia maragi.+
5 Danu, ta be ataiai gabudia dainai ia gari, bona dika gaudia be dala dekenai idia noho. Bona alamono au be ena flaoaflaoa ia atoa,+ bona kwadi be metairametaira ia raka, bona keipa au ena huahua* ia pou, badina tau be iena noho hanaihanai rumana dekenai ia raka lao noho+ bona taitai taudia be dala dekenai idia raka noho,+
6 dika siliva varona ia kokia, bona golo hoduna ia makohi, bona ranu lohilohi ena uro ia makohi, bona ranu guri amo ranu ia veria daekau wili ia makohi.
7 Bena kahu be tano dekenai ia giroa lou,+ guna ia noho gabuna unai, bona mauri siahuna be Dirava momokanina dekenai ia giroa lou. Dirava ese taunimanima dekenai unai ia henia.+
8 Hadibaia tauna* ia gwau:+ “Unai be anina lasi momokani! Gau ibounai be anina lasi.”+
9 Hadibaia tauna be aonega tauna ai ia lao sibona lasi, to ia dibaia gaudia be taunimanima dekenai ia hadibaia noho,+ bona ia laloa dobu bona tahua gaukarana ia karaia namonamo, aonega herevadia momo ia haboua* totona.+
10 Hadibaia tauna be hereva namodia ia tahua,+ bona hereva momokani bona maorodia ia torea.
11 Aonega taudia edia hereva be au mai matana bamona,+ bona edia hereva ibounai be idia kokoa auka ikokodia bamona. Unai aonega herevadia be mamoe naria tauna tamona amo idia mai.
12 Egu natuna e, hereva ma haida dekenai inai oi diba be namo: Buka momo idia torea noho, doko lasi, bona unai buka duahia karana dainai tau ta* ia hesiku diba.+
13 Oi kamonai gaudia ibounai amo hereva dokona be inai: Dirava momokanina do oi gari henia+ bona ena oda herevadia do oi badinaia,+ badina taunimanima edia mauri lalonai unai be mai anina bada.+
14 Badina Dirava momokanina ese taunimanima edia kara ibounai do ia hahemaoro henia, hunia gaudia ibounai danu, bena Dirava do ia abia hidi bema idia be maoro eiava kerere.+
Futnout
^ Eiava “naria taudia.”
^ “Ia be aniani urana ia havaraia au huahua.”
^ Heb., “Taunimanima ia haboua tauna.”
^ Eiava “edia gabu korikori ai ia toredia.”
^ Heb., “ena tauanina.”
