HENANADAI 2
Edena Dala ai Dirava Do Oi Dibaia?
“Inai Taravatu bukana be nega ibounai emu udu bibina dekenai do ia noho, bona dina bona hanuaboi ai do oi duahia gado maragina ai, unai amo unai buka lalonai idia torea herevadia oi badinaia namonamo diba. Vadaeni do oi karaia gaudia lalonai do oi kwalimu bona mai aonega ida do oi kara.”
“Dirava momokanina ena Taravatu bukana idia duahia badabada, bona taravatu herevadia edia anina idia gwauraia hedinarai namonamo. Vadaeni idia ese taunimanima idia durua idia duahia gauna idia lalopararalaia totona.”
“Inai bamona ia karaia tauna be ia moale, ia be kara dika taudia edia sisiba ia badinaia lasi. . . . To ia be Iehova ena taravatu dekenai ia moale, bona dina bona hanuaboi ai Dirava ena taravatu be gado maragi ai ia duahia. . . . Unai tauna be ia karaia gaudia ibounai lalonai do ia kwalimu.”
“Filipo be unai kariota badinai ia heau bona ia kamonai unai tauna be peroveta tauna Isaia ena buka ia duahia badabada noho, bona ia nanadaia: ‘Oi duahia gaudia oi diba, a?’ Ia gwau: ‘Edena bamona do lau diba bema ta ese lau ia hadibaia lasi?’”
“Gau ibounai ia havaraia negana amo, taunimanima ese Dirava ena siahu bona ena kara idauidau idia dibaia diba. Bona unai be ia karaia gaudia amo idia lalopararalaia, danu idia diba iena siahu be ia doko diba lasi bona ia be Dirava. Unai dainai Dirava ia noho lasi herevana do idia gwauraia diba lasi.”
“Unai gaudia oi laloa dobu. Unai gaudia dekenai emu lalona ibounai oi henia, vadaeni taunimanima ibounai do idia itaia oi be oi goada noho.”
“Namona be ta ta ita laloa bada bona ita hagoadaia heheni, unai amo ita lalokau heheni bona kara namodia ita karaia. Iseda hebou karana ita rakatania lasi.”
“Bema umui ta ena aonega be hegeregere lasi, namona be Dirava dekenai ia noinoi noho, bona Dirava ese ia dekenai do ia henia, badina ia be ibounai dekenai mai hariharibada ida ia henia, bona ia gwau henidia lasi.”
